ನಿಯಮದಂತೆ ಕಾರ್ಯಕರ್ತರು, ಮುಖಂಡರು ಸ್ವಾಗತಿಸಿ ನಮಸ್ಕರಿಸಿ ಹಿಂದೆ ನಿಲ್ಲಬೇಕು. ಆದರೆ ಪ್ರಧಾನಿ ಮೋದಿ ಸ್ವತಃ ಎಲ್ಲ ಕಾರ್ಯಕರ್ತರನ್ನು ಬಳಿ ಕರೆದು ವಿವಿಧ ವಿಷಯಗಳ ಕುರಿತು ಸಮಾಲೋಚನೆ ನಡೆಸಿದರು. ಈ ಭಾಗದಲ್ಲಿ ರೋಡ್ ಶೋದಿಂದ ಲಾಭವಾಗುತ್ತಾ ಎಂದು ಪ್ರಶ್ನಿಸಿದ್ದಕ್ಕೆ, ಕೇಂದ್ರ ಸರ್ಕಾರದ ಯೋಜನೆ, ನಿಲುವುಗಳನ್ನು ಜನ ಮೆಚ್ಚಿದ್ದಾರೆ. ನಿಮ್ಮನ್ನು ಹತ್ತಿರದಿಂದ ನೋಡಲು ಬಯಸಿದ್ದಾರೆ. ಇಂದು ನೀವು ಬಂದಿದ್ದರಿಂದ ಕಾರ್ಯಕರ್ತರಲ್ಲಿ ಸಹಜವೇ ಜೋಶ್ ಹೆಚ್ಚಲಿದೆ ಎಂದು ಮುಖಂಡರು ತಿಳಿಸಿದರು. ಈ ಭಾಗದಲ್ಲಿ ಎಷ್ಟು ಸೀಟ್ ಬರುತ್ತವೆ? ಪಕ್ಷದ ಸಂಘಟನೆ ಹೇಗೆ ನಡೆದಿದೆ? ಕೇಂದ್ರದ ಯಾವ ಯೋಜನೆ ಬಗ್ಗೆ ಜನರ ಒಲವಿದೆ ಎಂದು ಮೋದಿ ಕೇಳಿದಾಗ, ಮೆಗಾ ಟೆಕ್ಸ್ಟೈಲ್ ಪಾರ್ಕ್ ನಿರ್ಮಾಣವಾಗುತ್ತಿದೆ. ಪಿಎಂ ಕಿಸಾನ್ ಸಮ್ಮಾನ್ ಯೋಜನೆ ರೈತರಿಗೆ ಭಾರಿ ಅನುಕೂಲ ಕಲ್ಪಿಸಿದೆ ಎಂದು ಮುಖಂಡರು ತಿಳಿಸಿದರು. ಮಹಿಳಾ ಮೋರ್ಚಾದವರೊಂದಿಗೂ ಮಾತನಾಡಿದ ಮೋದಿ, ಮಹಿಳೆಯರು ಯಾವ ಯೋಜನೆಗಳ ಬಗ್ಗೆ ಒಲವು ಹೊಂದಿದ್ದಾರೆ ಎಂದು ಕೇಳಿ ಮಾಹಿತಿ ಪಡೆದು ಕುಶಲೋಪರಿ ವಿಚಾರಿಸಿದರು.
