ಕುಡಿಯುವ ನೀರಿಗೆ ಈ ಬಾರಿ ಸಮಸ್ಯೆಯಾಗದು...

ಶಾಸಕ ಯಶ್​ಪಾಲ್​ ಮಾಹಿತಿ

ಬಜೆ ಅಣೆಕಟ್ಟು ಪರಿಶೀಲನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಉಡುಪಿ ನಗರಕ್ಕೆ ಕುಡಿಯುವ ನೀರು ಪೂರೈಸುವ ಬಜೆ ಅಣೆಕಟ್ಟೆಯಲ್ಲಿ ಸಾಕಷ್ಟು ಪ್ರಮಾಣದಲ್ಲಿ ನೀರಿನ ಸಂಗ್ರಹವಿದೆ. ವಾರಾಹಿ ಯೋಜನೆಯಿಂದಲೂ ನಗರಕ್ಕೆ 25 ಎಂಎಲ್​ಡಿ ನೀರು ಸರಬರಾಜಾಗುತ್ತಿದ್ದು, ಈ ಬಾರಿ ಕುಡಿಯುವ ನೀರಿಗೆ ಸಮಸ್ಯೆಯಿಲ್ಲ ಎಂದು ಶಾಸಕ ಯಶ್​ಪಾಲ್​ ಸುವರ್ಣ ತಿಳಿಸಿದರು.

ಬಜೆ ಡ್ಯಾಂಗೆ ನಗರಸಭಾ ಅಧ್ಯಕ್ಷ ಪ್ರಭಾಕರ ಪೂಜಾರಿ ಅವರೊಂದಿಗೆ ಮೇ 15ರಂದು ಸಂಜೆ ಭೇಟಿ ನೀಡಿ, ನೀರಿನ ಸಂಗ್ರಹಮಟ್ಟ ಪರಿಶೀಲಿಸಿ ಅಧಿಕಾರಿಗಳೊಂದಿಗೆ ಮಾಹಿತಿ ಪಡೆದು ಮಾತನಾಡಿದರು.

ರೇಶನಿಂಗ್​ ಅನಿವಾರ್ಯತೆ ಇಲ್ಲ

ಕಳೆದ ಒಂದು ತಿಂಗಳಿಂದ ಆಗಾಗ ಮಳೆಯಾಗುತ್ತಿರುವುದರಿಂದ ಡ್ಯಾಂನಲ್ಲಿ ಒಳಹರಿವು ಇದೆ. ನಗರವಾಸಿಗರಿಗೆ ನೀರು ಸರಬರಾಜಿಗೆ ತೊಂದರಯಾಗದು. ಹೀಗಾಗಿ ಈ ಬಾರಿ ನೀರು ಪೂರೈಕೆಯಲ್ಲಿ ವ್ಯತ್ಯಯ ಆಗದು. ರೇಶನಿಂಗ್​ ಮಾಡುವ ಅನಿವಾರ್ಯತೆ ಇಲ್ಲ ಎಂದರು.

ನಗರಸಭಾ ಪೌರಾಯುಕ್ತ ಮಹೇಶ, ನಗರಸಭಾ ಸದಸ್ಯರಾದ ಟಿ.ಜಿ. ಹೆಗ್ಡೆ, ಹರೀಶ ಶೆಟ್ಟಿ, ಗಿರಿಧರ ಆಚಾರ್ಯ, ಸಹಾಯಕ ಅಭಿಯಂತ ಚೇತನ, ವಾರಾಹಿ ಯೋಜನೆಯ ಅರ್ಕೇಶ ಗೌಡ ಇದ್ದರು.