ಅಪ್ರಾಪ್ತನಿಗೆ ಬೈಕ್​ ಕೊಟ್ಟ ತಂದೆಗೆ 27 ಸಾವಿರ ರೂ. ದಂಡ

 ರಾಣೆಬೆನ್ನೂರ: ಅಪ್ರಾಪ್ತನೊಬ್ಬ ಬೈಕ್​ ಅಪಘಾತ ಪಡಿಸಿದ ಪ್ರಕರಣಕ್ಕೆ ಸಂಬಂಧಿಸಿ ಆತನಿಗೆ ಬೈಕ್​ ನೀಡಿದ ತಂದೆಗೆ 27 ಸಾವಿರ ರೂ. ದಂಡ ವಿಧಿಸಿ ಇಲ್ಲಿಯ ಅಧಿಕ ಸಿವಿಲ್​ ನ್ಯಾಯಾಧೀಶೆ ಮೇಶ್ರೀ ತೀರ್ಪು ನೀಡಿ ಆದೇಶಿಸಿದೆ.

ನಗರದ ದಿಳ್ಳೆಪ್ಪ ಗುತ್ತೆಪ್ಪ ಕಾಟಿ (50) ಎಂಬುವರಿಗೆ ದಂಡ ವಿಧಿಸಿರುವುದು.

ಈತ ಕಳೆದ ಜೂನ್​ 30ರಂದು ತಮ್ಮ ಪುತ್ರ ಅಪ್ರಾಪ್ತ ಎಂದು ಗೊತ್ತಿದ್ದರೂ ಬೈಕ್​ ನೀಡಿದ್ದರು. ಆತ ಬೈಕ್​ನಲ್ಲಿ ತೆರಳುತ್ತಿದ್ದ ಸಮಯದಲ್ಲಿ ಜಾಕೀರ ಎಂಬುವರಿಗೆ ಡಿಕ್ಕಿ ಪಡಿಸಿದ್ದನು. ಇದರಿಂದ ಗಾಯಗೊಂಡ ಜಾಕೀರ ಈ ಕುರಿತು ಸಂಚಾರ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ಪ್ರಕರಣದ ತನಿಖೆ ನಡೆಸಿದ ಪೊಲೀಸರು ನ್ಯಾಯಾಲಯಕ್ಕೆ ದೋಷಾರೋಪಟ್ಟಿ ಸಲ್ಲಿಸಿದ್ದರು. ಸಾಾಧಾರಗಳ ಸಮೇತ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ನ್ಯಾಯಾಧೀಶರು ಬೈಕ್​ ಮಾಲೀಕ ದಿಳ್ಳೆಪ್ಪನಿಗೆ ದಂಡ ವಿಧಿಸಿ ಆದೇಶಿಸಿದ್ದಾರೆ. ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ಪ್ರಶಾಂತ ಯಲಿಗಾರ ವಾದ ಮಂಡಿಸಿದ್ದರು.