ಸಚಿವ ಹಾಲಪ್ಪಗೆ ಘೇರಾವ್ ಹಾಕಿದ ಜನರು
ಸೇತುವೆ ನಿರ್ಮಾಣಕ್ಕೆ ಆಗ್ರಹ

ಕೊಪ್ಪಳ: ಯಲಬುರ್ಗಾ ತಾಲೂಕಿನ ಸಂಕನೂರು ಹಳ್ಳದಲ್ಲಿ ಮಹಿಳೆಯರು ಕೊಚ್ಚಿ‌ ಹೋದ ಸ್ಥಳಕ್ಕೆ ಮಹಿಳಾ ಮತ್ತು ಮಕ್ಕಳ‌ ಕಲ್ಯಾಣ ಸಚಿವ ಹಾಲಪ್ಪ‌ ಆಚಾರ್ ಭೇಟಿ ನೀಡಿದರು. ಈ ವೇಳೆ ಹಳ್ಳಕ್ಕೆ ಸೇತುವೆ ಇಲ್ಲದಿದ್ದರಿಂದಲೇ ಮಹಿಳೆಯರು ಸಾವನ್ನಪ್ಪಿದ್ದಾರೆ. ತಕ್ಷಣ ಸೇತುವೆ ನಿರ್ಮಿಸಬೇಕೆಂದು ಪಟ್ಟು ಹಿಡಿದ ಮೃತ ಮಹಿಳೆಯರ ಸಂಬಂಧಿಗಳು ಹಾಗೂ ಸಾರ್ವಜನಿಕರು ಸಚಿವರಿಗೆ ಘೇರಾವ್ ಹಾಕಿದರು.

ಶನಿವಾರ ರಾತ್ರಿ ಹಳ್ಳ ದಾಟಲು ಮುಂದಾದ ನಾಲ್ವರು ಮಹಿಳೆಯರು ಕೊಚ್ಚಿ‌ಹೋಗಿ ಸಾವನ್ನಪ್ಪಿದ್ದಾರೆ. ಭುವನೇಶ್ವರಿ ಪೋಲಿಸಪಾಟೀಲ(35) ಗಿರಿಜಾ  ಹಾಗೂವೀಣಾ ಬಸವನಗೌಡ ಪಾಟೀಲ(20) ಶವಗಳು ಪತ್ತೆಯಾಗಿವೆ. ಪವಿತ್ರಾ ಸಿದ್ದಯ್ಯ ಪೋಲಿಸಪಾಟೀಲ(40) ದೇಹಕ್ಕಾಗಿ ಶೋಧ ಕಾರ್ಯ ಮುಂದುವರೆದಿದೆ.

ವಿಷಯ ತಿಳಿದು ಹಾಲಪ್ಪ ಆಚಾರ್ ಶೋಧ ನಡೆದಿರುವ ಸ್ಥಳಕ್ಕೆ ಬಂದರು. ತಕ್ಷಣ ರೊಚ್ಚಿಗೆದ್ದ ಮೃತ ಮಹಿಳೆಯೊಬ್ಬರ ಸಂಬಂಧಿ ಸಿದ್ದು ಎಂಬಾತ ಸಚಿವರನ್ನು ಹಿಗ್ಗಾಮುಗ್ಗಾ ತರಾಟೆ ತೆಗೆದುಕೊಂಡ. ಸಾರ್ವಜನಿಕರೂ ದನಿಗೂಡಿಸಿದರು. ಸೇತುವೆ ನಿರ್ಮಾಣಕ್ಕೆ ಸ್ಥಳದಲ್ಲೇ ಆದೇಶ ನೀಡುವಂತೆ ಪಟ್ಟು ಹಿಡಿದರು. ಕೆಲಹೊತ್ತಾದರೂ ಸಮಾಧಾನಗೊಳ್ಳದ ಕಾರಣ ಸಚಿವರು ಅಧಿಕಾರಿಗಳಿಗೆ ಸೇತುವೆ ನಿರ್ಮಿಸಲು ಸೂಚಿಸಿದರು. ಸೇತುವೆ ಆಗುವವರೆಗೆ ಗ್ರಾಮಕ್ಕೆ ಭೇಟಿ ನೀಡುವುದಿಲ್ಲವೆಂದು ಭರವಸೆ ನೀಡಿದರು.

ಮೃತರ ಕುಟುಂಬಕ್ಕೆ ತಲಾ ಐದು ಲಕ್ಷ ರೂ. ಪರಿಹಾರ ಘೋಷಿಸಲಾಯಿತು. ಬಳಿಕ ಜನರು ಘೇರಾವ್ ವಾಪಸ್ ಪಡೆದರು. ಇನ್ನೋರ್ವ ಮಹಿಳೆ ಮೃತದೇಹ ಪತ್ತೆಗೆ ಎನ್ಡಿಆರ್ ಎಫ್ ತಂಡ ಶೋಧ ಮುಂದುವರೆಸಿದೆ.