ಬಿಜೆಪಿ ಆಡಿಸಿದಂತೆ ಕುಣಿವ ರಾಜ್ಯಪಾಲ, ಸಚಿವ ತಂಗಡಗಿ ಗಂಭೀರ ಆರೋಪ

ಕೊಪ್ಪಳ: ಬಿಜೆಪಿಗರು ತಮ್ಮ ಅವಧಿಯಲ್ಲಿ ಸಾಕಷ್ಟು ಹಗರಣ ಮಾಡಿದ್ದಾರೆ. ಅದರ ಬಗ್ಗೆ ಯಾವುದೇ ತನಿಖೆ ನಡೆಸಿಲ್ಲ. ಈಗ ಸಿಎಂ ಮೇಲೆ ಮುಡಾ ಹಗರಣ ಆರೋಪ ಮಾಡುತ್ತಿದ್ದಾರೆ. ಬಿಜೆಪಿಗರು ಹೇಳಿದಂತೆ ಕುಣಿವ ರಾಜ್ಯಪಾಲ ತಾವರಚಂದ ಗೆಹ್ಲೋತ್​ ನಿಯಮಬಾಹಿರವಾಗಿ ನೋಟಿಸ್​ ನೀಡಿದ್ದಾರೆಂದು ಸಚಿವ ಶಿವರಾಜ ತಂಗಡಗಿ ಆರೋಪಿಸಿದರು.

ದೂರು ನೀಡಿದ ಟಿ.ಜೆ.ಅಬ್ರಹಾಂ ಓರ್ವ ಬ್ಲಾಕ್​ಮೇಲರ್​. ಆತನಿಗೆ ಸುಪ್ರೀಂ ಕೋರ್ಟ್​ 20 ಲಕ್ಷ ದಂಡ ಕಟ್ಟುವಂತೆ ಛೀಮಾರಿ ಹಾಕಿದೆ. ಆತ ಬೆಳಗ್ಗೆ ದೂರು ನೀಡಿದ್ದು, ಸಂಜೆ ವೇಳೆಗೆ ಸಿಎಂಗೆ ರಾಜ್ಯಪಾಲರು ನೋಟಿಸ್​ ನೀಡಿದ್ದಾರೆ. ಬಿಜೆಪಿಯವರ ಅಣತಿಯಂತೆ ಕುಣಿಸುತ್ತಿದ್ದಾರೆ. ಅವರ ನಡೆಯನ್ನು ರಾಜ್ಯದ ಜನ ಸಹಿಸುವುದಿಲ್ಲವೆಂದು ಶನಿವಾರ ಸುದ್ದಿಗಾರರನ್ನುದ್ದೇಶಿಸಿ ಹೇಳಿದರು.

ಬಿಜೆಪಿ ಅವಧಿಯಲ್ಲಿ ಹಲವು ನಿಗಮಗಳಲ್ಲಿ ಕೋಟ್ಯಂತರ ರೂ. ಅವ್ಯವಹಾರ ನಡೆದಿದೆ. ಬೊಮ್ಮಾಯಿ ಅವಧಿಯಲ್ಲಿ ಭೋವಿ ಅಭಿವೃದ್ಧಿ ನಿಗಮದಲ್ಲಿ 60 ಕೋಟಿ ರೂ., ಅರಸು ಟ್ರಕ್​ ರ್ಟಮಿನಲ್​ ನಿಗಮದಲ್ಲಿ 47 ಕೋಟಿ. ಅವ್ಯವಹಾರ ನಡೆದಿದೆ. ಅದರ ಅಧ್ಯಕ್ಷನಾಗಿದ್ದ ವೀರಯ್ಯನನ್ನು ಬಂಧಿಸಿದ್ದೇವೆ. ಈ ಬಗ್ಗೆ ವಿಜಯೇಂದ್ರ, ಆರ್​.ಅಶೋಕ್​ ಮಾತನಾಡಲಿ. ಸಿದ್ದರಾಮಯ್ಯ ಹಿಂದಿನ ಅವಧಿಯಲ್ಲಿ ಹಲವು ಪ್ರಕರಣಗಳನ್ನು ಸಿಬಿಐ ತನಿಖೆಗೆ ನೀಡಿದ್ದರು. ನಾವು ಯಾವ ತನಿಖೆಗೂ ಹೆದರುವುದಿಲ್ಲವೆಂದು ತಿರುಗೇಟು ನೀಡಿದರು.