ಕಾಲು ಸಂಕಕ್ಕೆ 8 ಕೋಟಿ ರೂ. ಮಂಜೂರು...

ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್​ ಮಾಹಿತಿ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಜಿಲ್ಲೆಯಲ್ಲಿ ಲೋಕೋಪಯೋಗಿ ಇಲಾಖೆಯಡಿ 438 ಹಾಗೂ ನರೇಗಾ ಯೋಜನಯಡಿ 420 ಕಾಲು ಸಂಕ ನಿರ್ಮಾಣ ಮಾಡಲಾಗುತ್ತಿದ್ದು, ಇದಕ್ಕಾಗಿ 8 ಕೋಟಿ ರೂ. ಮಂಜೂರು ಮಾಡಲಾಗಿದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್​ ಮಾಹಿತಿ ನೀಡಿದರು.

ಉಡುಪಿ ಜಿಪಂನ ಡಾ. ವಿ.ಎಸ್​. ಆಚಾರ್ಯ ಸಭಾಂಗಣದಲ್ಲಿ ಮೇ 11ರಂದು ಜಿಲ್ಲಾ ಮಟ್ಟದ ವಿವಿಧ ಇಲಾಖೆಗಳ ಅಧಿಕಾರಿಗಳೊಂದಿಗೆ ವಿಶೇಷ ಸಭೆ ನಡೆಸಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಕಡಲ್ಕೊರೆತಕ್ಕೆ 5 ಕೋಟಿ ರೂ.

ಕಳೆದ ವರ್ಷ ಕಡಲ್ಕೊರೆತಕ್ಕೆ ಘೋಷಿಸಿದ್ದ 5 ಕೋಟಿ ರೂ. ಮಂಜೂರು ಮಾಡಲಾಗಿದೆ. ಆದರೆ, ಸಂಪೂರ್ಣ ಕಾಮಗಾರಿಗೆ 200 ಕೋಟಿ ರೂ. ಅನುದಾನ ಬೇಕಾಗುತ್ತದೆ ಎಂದು ಬೇಡಿಕೆ ಇಟ್ಟಿದ್ದಾರೆ. 60ರಿಂದ 70 ಕೋಟಿ ರೂ.ವರೆಗೆ ಅನುದಾನ ಬಿಡುಗಡೆ ಆಗುವ ಭರವಸೆ ಇದೆ. ಅಂಗನವಾಡಿ, ಶಾಲೆಗಳ ರಿಪೇರಿಗೆ ಎನ್​ಡಿಆರ್​ಎಫ್​ ಹಾಗೂ ಎಸ್​ಡಿಆರ್​ಎಫ್ ನಿಂದ ಅನುದಾನ ಕೊಡಲಾಗುತ್ತದೆ ಎಂದು ತಿಳಿಸಿದರು.

ವಿವಿಧೆಡೆ ಮಾಕ್​ ಡ್ರಿಲ್​

ಜಿಲ್ಲಾಧಿಕಾರಿ ಡಾ. ಕೆ.ವಿದ್ಯಾಕುಮಾರಿ ಮಾತನಾಡಿ, ಭಾರತ-ಪಾಕಿಸ್ತಾನ ಯುದ್ಧದ ಹಿನ್ನೆಲೆಯಲ್ಲಿ ಡಿಐಜಿ ಸೂಚನೆಯ ಮೇರೆಗೆ ಜಿಲ್ಲೆಯ ವಿವಿಧೆಡೆ ಮಾಕ್​ ಡ್ರಿಲ್​ ಮಾಡಲಾಗುತ್ತಿದೆ. ಮಣಿಪಾಲದ ಕೆಎಂಸಿಯಲ್ಲಿ ಕಲ್ಪಿತ ಕಾರ್ಯಾಚರಣೆ ಮಾಡಲಾಗಿದೆ. ಅಗ್ನಿಶಾಮಕ ಠಾಣೆಗಳಿಗೂ ಸಹ ಅಗತ್ಯ ಪರಿಕರಗಳೊಂದಿಗೆ ವಿಪತ್ತು ಸಂದರ್ಭ ಎದುರಿಸಲು ಸಿದ್ಧತೆ ಮಾಡಿಕೊಳ್ಳಲು ಸೂಚಿಸಲಾಗಿದೆ. ಒಂದೊಮ್ಮೆ ಸಂದಿಗ್ಧ ಪರಿಸ್ಥಿತಿ ಎದುರಾದರೆ ಜಿಲ್ಲೆಯಲ್ಲಿ 166 ಕಾಳಜಿ ಕೇಂದ್ರ ಮತ್ತು 50 ಬೆಡ್​ಗಳಿರುವ 54 ಆಸ್ಪತ್ರೆಯನ್ನೂ ಗುರುತಿಸಲಾಗಿದೆ ಎಂದರು.

ಮೀನುಗಾರರಿಗೆ ಸೂಚನೆ

ಕಡಲಿನಲ್ಲಿ ಯಾವುದೇ ಶಂಕಾಸ್ಪದ ಬೋಟ್​ ಅಥವಾ ದ್ವೀಪಗಳಲ್ಲಿ ಅಪರಿಚತ ವ್ಯಕ್ತಿಗಳು ಕಂಡು ಬಂದರೆ ಕೂಡಲೇ ಕೋಸ್ಟಲ್​ ಪೊಲೀಸರಿಗೆ ಮಾಹಿತಿ ನೀಡಲು ಮೀನುಗಾರರಿಗೆ ಈಗಾಗಲೇ ಮೀನುಗಾರಿಕಾ ಇಲಾಖೆ ಸೂಚಿಸಿದೆ. ಒಂದೇ ಬೋಟ್​ ಮೂಲಕ ಮೀನುಗಾರಿಕೆಗೆ ತೆರಳದೆ 2-3 ಬೋಟ್​ಗಳು ಒಟ್ಟಿಗೆ ಮೀನುಗಾರಿಕೆ ಮಾಡಲು ತಿಳಿಸಲಾಗಿದೆ. ಮೀನುಗಾರರಲ್ಲಿಯೇ ನುರಿತ ಈಜುಪಟುಗಳು ಹಾಗೂ ಮುಳುಗುತಜ್ಞರನ್ನು ಕೋಸ್ಟಲ್​ ಎಸ್​ಪಿ ಗುರುತಿಸಿದ್ದು ಅವರನ್ನೂ ಸಹ ಕಡಲಿನ ಗಸ್ತು ಸಂದರ್ಭಗಳಲ್ಲಿ ಬಳಸಿಕೊಳ್ಳಲಿದ್ದೇವೆ ಎಂದು ಡಿಸಿ ವಿದ್ಯಾಕುಮಾರಿ ತಿಳಿಸಿದರು.