ಮಳೆಗಾಳಿಗೆ ನೆಲಕಚ್ಚಿದ ರಾಗಿ

ತೆನೆಯಲ್ಲೇ ಕಾಳುಕಟ್ಟುವ ಆತಂಕ - ಕಮರಿದ ರೈತನ ಕನಸು

ಹುಳಿಯಾರು: ಚಿಕ್ಕನಾಯಕನಹಳ್ಳಿ ತಾಲೂಕಿನಲ್ಲಿ ಗುರುವಾರ ಸಂಜೆ ಸುರಿದ ಧಾರಾಕಾರ ಮಳೆಗೆ ಅಪಾರ ಪ್ರಮಾಣದ ರಾಗಿ ಬೆಳೆ ನೆಲಕಚ್ಚಿದೆ. ಇದರಿಂದ ಫಸಲು ನಷ್ಟವಾಗುವ ಆತಂಕ ಶುರುವಾಗಿದೆ.

ಈ ಬಾರಿ ವಾಡಿಕೆಗಿಂತ ಹೆಚ್ಚು ಮಳೆಯಾಗಿದ್ದರಿಂದ ತಾಲೂಕಿನಲಿ 31,500 ಹೆಕ್ಟೇರ್​ ಪ್ರದೇಶದಲ್ಲಿ ರಾಗಿ ಬಿತ್ತನೆಯಾಗಿದೆ. ಆದರೆ, ಸೆಪ್ಟೆಂಬರ್​ನಲ್ಲಿ ಮಳೆ ಬೀಳದೆ ರೈತನಿಗೆ ಆಘಾತ ನೀಡಿತ್ತು. ರಾಗಿ ಕಾಳು ಕಟ್ಟುವ ಹಂತದಲ್ಲಿ ಉತ್ತಮ ಮಳೆಯಾಯಿತು. ಬೆಳೆ ಕೈ ಸೇರಲ್ಲ ಎನ್ನುತ್ತಿದ್ದವರಿಗೆ ಇಡೀ ವಾರ ತುಂತುರು ಮಳೆಯಾಗಿದ್ದರಿಂದ ಆಸೆಯ ಚಿಗುರೊಡೆದು ಈ ವರ್ಷ ಬಂಪರ್​ ಬೆಳೆ ಎನ್ನುವಷ್ಟರಲ್ಲಿ ಮತ್ತೆ ಮಳೆ ಸುರಿದು ರೈತರನ್ನು ಆತಂಕಕ್ಕೀಡು ಮಾಡಿದೆ.

ಬೆಳೆದು ನಿಂತ ರಾಗಿ ತೆನೆಗಳಲ್ಲಿ ತೇವಾಂಶ ಉಳಿದುಕೊಂಡಿದ್ದು, ಬೆಳೆಗಾರರಿಗೆ ನಷ್ಟದ ಆತಂಕ ಎದುರಾಗಿದೆ. ಈಗಾಗಲೇ ಕೊಯ್ಲು ಮಾಡಿರುವ ರಾಗಿ ಒಣಗಿಸಿ, ಕಣ ಮಾಡಿ ತೆನೆ ಬೇರ್ಪಡಿಸಲು ಅಡ್ಡಿಯಾಗಿದೆ.

ಚಾಪೆ ಹಾಸಿದಂತೆ ಮಲಗಿದ ಬೆಳೆ

ನೆಲ ಕಚ್ಚಿರುವ ರಾಗಿ ಪೈರನ್ನು ಎತ್ತಿಕಟ್ಟುವ ಕಾರ್ಯವಾಗಬೇಕು. ಆದರೆ ಬೆಳೆಗಾರರು ಜಮೀನಿನಲ್ಲಿ ಕಾಲಿಡದಂತಾಗಿದೆ. ರಾಗಿ ಬೆಳೆ ಚಾಪೆ ಹಾಸಿದಂತೆ ಮಲಗಿದೆ. ಅಲ್ಲದೆ, ಬಿಸಿಲಿಲ್ಲದೆ ಮೋಡಕವಿದ ವಾತವರಣ ಇರುವುದರಿಂದ ರೈತರಿಗೆ ಸಂಕಷ್ಟ ತಂದೊಡ್ಡಿದೆ. ಅಂತಿಮ ಹಂತದಲ್ಲಿ ಇದೇ ರೀತಿ ಮಳೆ ಸುರಿದರೆ ತೆನೆಯಲ್ಲೇ ರಾಗಿ ಕಾಳು ಮೊಳಕೆ ಬರುವ ಸಾಧ್ಯತೆ ಇದೆ. ರಾಗಿ ಬೆಳೆ ಸಂಪೂರ್ಣ ನೆಲಕ್ಕೆ ಬಿದ್ದಿರುವುದರಿಂದ ಯಂತ್ರಗಳಿಂದ ಕಟಾವು ಮಾಡಲಾಗದೆ, ಕೂಲಿಕಾರ್ಮಿಕರನ್ನು ಆಶ್ರಯಿಸಬೇಕಿದೆ. ಇತ್ತ ಕೂಲಿ ಹಣ ಹೆಚ್ಚಾಗುವ ಸಾಧ್ಯತೆ ಇದೆ. ಒಟ್ಟಾರೆ ಮುಂದಿನ ದಿನಗಳಲ್ಲಿ ಬೀಳುವ ಮಳೆಯನ್ನೇ ಅವಲಂಬಿಸಿದೆ ರಾಗಿ ಬೆಳೆಗಾರರ ಭವಿಷ್ಯ.