ಹಾಲಿನ ಪ್ರೋತ್ಸಾಹ ದರ ಯೋಜನೆ ದಿನಾಂಕ ವಿಸ್ತರಣೆ

ಹಾವೇರಿ: ಹಾವೇರಿ ಜಿಲ್ಲಾ ಸಹಕಾರ ಹಾಲು ಒಕ್ಕೂಟ ಮಾ.31ರವರೆಗೆ ಘೋಷಿಸಿದ್ದ ಹೆಚ್ಚುವರಿ 3 ರೂ. ಹಾಲು ಶೇಖರಣಾ ದರ ನೀಡುವ ಯೋಜನೆಯನ್ನು ಜೂನ್ 15ರವರೆಗೆ ವಿಸ್ತರಿಸಿದೆ.
ಅತಿವೃಷ್ಠಿ, ಮೇವಿನ ಕೊರತೆ, ಪಶು ಆಹಾರದ ಬೆಲೆ ಹೆಚ್ಚಳ ಹಾಗೂ ಚರ್ಮಗಂಟು ರೋಗದ ಹಿನ್ನೆಲೆಯಲ್ಲಿ ಹೈನುಗಾರರು ಸಂಕಷ್ಟ ಎದುರಿಸುತ್ತಿದ್ದಾರೆ. ಅವರ ನೆರವಿಗಾಗಿ ಫೆಬ್ರವರಿ 1ರಿಂದ ಮಾ.31ರವರೆಗೆ ಪ್ರತಿ ಲೀಟರ್‌ಗೆ 3 ರೂ. ಪ್ರೋತ್ಸಾಹ ಧನ ನೀಡುವುದಾಗಿ ಒಕ್ಕೂಟ ಘೋಷಿಸಿತ್ತು. ಈಗ ಜಾರಿಯಲ್ಲಿರುವ ಹಾಲು ಖರೀದಿ ದರ, ದರಪಟ್ಟಿಗಳು, ಷರತ್ತು ಹಾಗೂ ನಿಬಂಧನೆಗಳನ್ನು ಜೂನ್ 15ರವರೆಗೆ ಮುಂದುವರಿಸಲು ಆಡಳಿತ ಮಂಡಳಿ ಸಭೆಯಲ್ಲಿ ತೀರ್ಮಾನಿಸಲಾಗಿದೆ ಎಂದು ಒಕ್ಕೂಟದ ಅಧ್ಯಕ್ಷ ಬಸವರಾಜ ಅರಬಗೊಂಡ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.