ನಗರಕ್ಕೆ ಪ್ರತ್ಯೇಕ ಮೆಸ್ಕಾಂ ಕಂಟ್ರೋಲ್​ ರೂಂ ಪ್ರಾರಂಭಿಸಲು ಸೂಚನೆ

ಉಡುಪಿ: ಪೂರ್ವ ಮುಂಗಾರು ಮಳೆಯಿಂದ ನಗರದ ಅನೇಕ ಕಡೆಗಳಲ್ಲಿ ವಿದ್ಯುತ್​ ಕಡಿತ ಸಮಸ್ಯೆ ಉಂಟಾಗಿದ್ದು, ನಗರ ಭಾಗದಲ್ಲಿ 24 ಗಂಟೆಯೊಳಗೆ ದುರಸ್ತಿ ಮಾಡದಿದ್ದರೆ ಶಿಕ್ಷಣ ಸಂಸ್ಥೆಗಳಿಗೆ, ಕೈಗಾರಿಕೆಗಳಿಗೆ, ಆಸ್ಪತ್ರೆಗಳಿಗೆ ತೊಂದರೆಯಾಗುತ್ತಿದೆ. ಮೆಸ್ಕಾಂ ಮತ್ತು ನಗರಸಭೆ ಜಂಟಿಯಾಗಿ ತುರ್ತು ಕಾರ್ಯಾಚರಣೆ ನಡೆಸಬೇಕು. ನಗರಕ್ಕೆ ಪ್ರತ್ಯೇಕ ಕಂಟ್ರೋಲ್​ ರೂಂ ತೆರೆಯಬೇಕು ಎಂದು ಶಾಸಕ ಯಶ್ಪಾಲ್​ ಸುವರ್ಣ ಹೇಳಿದರು.

ನಗರಸಭೆಯಲ್ಲಿ ಮೆಸ್ಕಾಂ ಅಧಿಕಾರಿಗಳೊಂದಿಗೆ ನಡೆದ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಇಂದ್ರಾಳಿ ಭಾಗದಲ್ಲಿ ವಿದ್ಯುತ್​ ಕಡಿತವಾಗಿ 48 ಗಂಟೆ ಕಳೆದರೂ ದುರಸ್ತಿಯಾಗಿರಲಿಲ್ಲ. ಮೆಸ್ಕಾಂ ಅಧಿಕಾರಿಗಳು ದೂರಿಗೆ ಸ್ಪಂದಿಸುತ್ತಿಲ್ಲ. ಕಂಟ್ರೋಲ್​ ರೂಂನಿಂದ ಸೂಕ್ತ ಸ್ಪಂದನೆ ಸಿಗುತ್ತಿಲ್ಲ ಎಂದರು.

ಮೆಸ್ಕಾಂ ಅಧೀಕ್ಷಕ ದಿನೇಶ್​ ಉಪಾಧ್ಯಾಯ ಮಾತನಾಡಿ, ಮಳೆಗಾಲದಲ್ಲಿ ತುರ್ತು ಸಂದರ್ಭದಲ್ಲಿ ಕಾರ್ಯಾಚರಣೆ ನಡೆಸಲು 55 ಮಂದಿ ಗ್ಯಾಂಗ್​ಮೆನ್​ಗಳನ್ನು ತಾತ್ಕಾಲಿಕವಾಗಿ ನೇಮಕ ಮಾಡಿಕೊಳ್ಳಲಾಗಿದೆ. ಉಡುಪಿ ವಿಭಾಗದಲ್ಲಿ ಶೇ. 40ರಷ್ಟು ಪವರ್​ ಮ್ಯಾನ್ಗಳ ಕೊರತೆ ಇದೆ. ಈಗಾಗಲೇ ಮೆಸ್ಕಾಂ ಜೂನಿಯರ್​ ಪವರ್​ ಮೆನ್​ಗ್ಗಳ ನೇಮಕಾತಿ ಪ್ರಕ್ರಿಯೆ ನಡೆಯುತ್ತಿದ್ದು, ಹೊಸದಾಗಿ 100 ಮಂದಿ ಸಿಬ್ಬಂದಿ ಸೇವೆಗೆ ಸೇರ್ಪಡೆಯಾಗಲಿದ್ದಾರೆ. ವಿದ್ಯುತ್​ ಕಂಬ ಮತ್ತು ವಯರ್​ ಕೊರತೆ ಇಲ್ಲ. 5 ವಾಹನ, 400 ಕಂಬ, 16 ಟಿಸಿಗಳು ಲಭ್ಯವಿದೆ ಎಂದರು.

ನಗರಸಭೆ ಅಧ್ಯಕ್ಷ ಪ್ರಭಾಕರ ಪೂಜಾರಿ, ಉಪಾಧ್ಯೆ ರಜನಿ ಹೆಬ್ಬಾರ್​, ಸ್ಥಾಯೀ ಸಮಿತಿ ಅಧ್ಯಕ್ಷ ಸುಂದರ ಕಲ್ಮಾಡಿ, ಪ್ರಭಾರ ಪೌರಾಯುಕ್ತ ಮಹೇಶ್​ ಉಪಸ್ಥಿತರಿದ್ದರು.