ಗ್ರಾಹಕ ಸೇವೆಯಲ್ಲೂ ಆಧುನಿಕತೆ ಬರಲಿ MESCOM

ವಿಟ್ಲ: ಬಿಲ್ಲಿಂಗ್ ವ್ಯವಸ್ಥೆಯಲ್ಲಿ ಆಧುನಿಕ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡಿರುವ ಮೆಸ್ಕಾಂ ಗ್ರಾಹಕರಿಗೆ ನೀಡುವ ಸೇವೆಯಲ್ಲೂ ಆಧುನಿಕತೆ ಅಳವಡಿಸಿಕೊಂಡು ಉತ್ತಮಗೊಳಿಸಬೇಕು. ಹನಿ ಮಳೆ ಬಿದ್ದರೂ ವಿದ್ಯುತ್ ಕಡಿತಗೊಳಿಸಲಾಗುತ್ತದೆ. ಮರಗಳ ಗೆಲ್ಲು ತೆರವು ಕಾರ್ಯ ಮಾಡಿದ್ದರೂ ಕೆಲವು ಭಾಗಗಳಲ್ಲಿ ದಿನಕ್ಕೆ ೩೦ಕ್ಕೂ ಹೆಚ್ಚು ಸಲ ವಿದ್ಯುತ್ ಕಣ್ಣಾಮುಚ್ಚಾಲೆ ಆಡುತ್ತಿರುತ್ತದೆ. ಈ ಲೋಪದೋಷಗಳನ್ನು ಯಾವಾಗ ಸರಿಪಡಿಸುತ್ತೀರಿ ಎಂದು ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಪದ್ಮನಾಭ ಪೂಜಾರಿ ಸಣ್ಣಗುತ್ತು ಪ್ರಶ್ನಿಸಿದರು.

ವಿಟ್ಲ ಪಂಚಲಿಂಗೇಶ್ವರ ದೇವಸ್ಥಾನದ ಸಭಾಂಗಣದಲ್ಲಿ ಬುಧವಾರ ವಿಟ್ಲ ಉಪ ವಿಭಾಗಮಟ್ಟದ ಜನಸಂಪರ್ಕ ಸಭೆಯಲ್ಲಿ ಸಮಸ್ಯೆಗಳನ್ನು ಮುಂದಿಟ್ಟರು.

ಅಳಿಕೆ ಕೆಳಗಿನ ಮುಳಿಯದಲ್ಲಿ ಟ್ರಾನ್ಸ್-ರ್ಮರ್ ದುರಸ್ತಿಗೆ ಬರೋಬ್ಬರಿ ೧೫ ದಿನ ತೆಗೆದುಕೊಳ್ಳಲಾಗಿದೆ. ಪೆರುವಾಯಿ ಭಾಗದಲ್ಲಿ ಸಂಜೆ ಕಡಿತಗೊಳ್ಳುವ ವಿದ್ಯುತ್ ಮಾರನೇ ದಿನ ಬೆಳಗ್ಗೆ ಬರುತ್ತಿದೆ. ಇಲಾಖೆಯಿಂದ ಸರಿಯಾದ ಸ್ಪಂದನೆಯೂ ಸಿಗುತ್ತಿಲ್ಲ ಎಂದು ದೂರಿದರು.

ಕನ್ಯಾನ ಕರೋಪಾಡಿಯ ಭಾಗಕ್ಕೆ ಸಾಲೆತ್ತೂರು ಕೇಂದ್ರದಿಂದ ವಿದ್ಯುತ್ ವಿತರಣೆಯಾಗುವುದರಿಂದ ಸಮಸ್ಯೆ ನಿವಾರಣೆಯಾಗಿದೆ. ಕೇಪು ಸಬ್‌ಸ್ಟೇಷನ್ ಶೀಘ್ರ ಪೂರ್ಣಗೊಂಡಲ್ಲಿ ಸಮಸ್ಯೆ ಕಡಿಮೆಯಾಗುತ್ತದೆ. ಆದ್ದರಿಂದ ತ್ವರಿತಗೊಳಿಸಬೇಕು ಎಂದು ಹೋರಾಟಗಾರ ರಾಮಣ್ಣ ಪಾಳಿಗೆ ಆಗ್ರಹಿಸಿದರು.

ಒಕ್ಕೆತ್ತೂರು, ಕಳುವಾಜೆ ಭಾಗದಲ್ಲಿ ತಂತಿ ಹಳೆಯದಾಗಿ ತುಂಡಾಗಿ ರಸ್ತೆಗೆ ಬೀಳುತ್ತಿದ್ದು, ಮಕ್ಕಳಿಗೆ ಅಪಾಯ ಆಗುವ ಸಾಧ್ಯತೆಯಿದೆ. ಟೌನ್ ಫೀಡರ್‌ನಿಂದ ಬೇರೆ ಕಡೆಗೆ ಸಂಪರ್ಕ ನೀಡಬೇಕು. ಗ್ರಾಮೀಣ ಭಾಗದಲ್ಲಿ ಸಣ್ಣ ಸಮಸ್ಯೆಯಾದರೂ ವಿದ್ಯುತ್ ಕೈಕೊಡುತ್ತದೆ. ಇದರಿಂದ ಕುಡಿಯುವ ನೀರಿನ ಸಂಪರ್ಕಕ್ಕೆ ತೀವ್ರ ತೊಂದರೆಯಾಗುತ್ತಿದೆ ಎಂದು ಗ್ರಾಹಕರು ಹೇಳಿದರು.

ಪ್ರತಿಭಟನೆ ಎಚ್ಚರಿಕೆ: ಬೈರಿಕಟ್ಟೆ ಕಾಡಮನೆ ಭಾಗದಲ್ಲಿ ವಿದ್ಯುತ್ ಪರಿವರ್ತಕವಿಲ್ಲದೆ, ಮಳೆಗಾಲದಲ್ಲೂ ತ್ರಿ ಫೇಸ್ ಪಂಪ್ ಚಾಲನೆಯಾಗುತ್ತಿಲ್ಲ. ಇಲ್ಲಿ ಐವತ್ತು ಮನೆಗಳಿದ್ದು ಇದ್ದು, ನಾಲ್ಕು ವರ್ಷದಿಂದ ಮನವಿ ನೀಡಿದರೂ ಪ್ರಯೋಜನವಾಗಿಲ್ಲ. ಸಿಂಗಲ್ ಫೇಸ್ ಪಂಪ್ ಕೂಡಾ ಚಾಲನೆಯಾಗದ ಸ್ಥಿತಿಯಿದ್ದು, ಶೀಘ್ರ ಪರಿಹರಿಸದಿದ್ದರೆ ಪ್ರತಿಭಟನೆ ನಡೆಸಬೇಕಾಗುತ್ತದೆ ಎಂದು ನಾಗರಿಕರು ಎಚ್ಚರಿಸಿದರು.

ಉಕ್ಕುಡದಲ್ಲಿ ಆಗಾಗ ವಿದ್ಯುತ್ ಕೈಕೊಡುತ್ತಿದೆ. ರಸ್ತೆಯ ಬದಿಯಲ್ಲಿರುವ ಕಂಬಗಳನ್ನು ದೂರದಲ್ಲಿ ಅಪಾಯವಾಗದ ರೀತಿ ಅಳವಡಿಸುವುದು ಉತ್ತಮ. ವಿಟ್ಲದಲ್ಲಿ ನಡೆಸುವ ಜನಸಂಪರ್ಕ ಸಭೆಯನ್ನು ಮಾಣಿ, ಪೆರ್ನೆ ಭಾಗದಲ್ಲೂ ನಡೆಸಲು ಆದ್ಯತೆ ನೀಡಬೇಕು ಎಂದು ನಾಗರಿಕರು ಆಗ್ರಹಿಸಿದರು.

ಮೆಸ್ಕಾಂ ಅಧೀಕ್ಷಕ ಇಂಜಿನಿಯರ್ ಕೃಷ್ಣರಾಜ ಕೆ., ಕಾರ್ಯನಿರ್ವಾಹಕ ಇಂಜಿನಿಯರ್ ಸಂತೋಷ ನಾಯ್ಕ್, ಸಹಾಯಕ ಕಾರ್ಯನಿರ್ವಹಣಾ ಇಂಜಿನಿಯರ್ ಗೋವಿಂದ ರಾಜು ಎ., ಲೆಕ್ಕಾಧಿಕಾರಿ ಚಂದ್ರಶೇಖರ ಉಪಸ್ಥಿತರಿದ್ದರು.

ಮೆಸ್ಕಾಂ ಅಧೀಕ್ಷಕ ಇಂಜಿನಿಯರ್ ಕೃಷ್ಣರಾಜ ಕೆ. ಮಾತನಾಡಿ, ಒಂದೇ ಫೀಡರ್‌ನಲ್ಲಿ ೮ ಫೀಡರ್ ತಂತಿಗಳು ಹಾದುಹೋಗಿರುವ ಕಾರಣ ಸಮಸ್ಯೆಯಾಗುತ್ತಿದೆ. ಇದಕ್ಕೆ ಶಾಶ್ವತ ಪರಿಹಾರವಾಗಿ ವಿಟ್ಲ ಭಾಗದಲ್ಲಿ ಭೂಗತ ಕೇಬಲ್ ಅಳವಡಿಸಲು ಯೋಜನೆ ಸಿದ್ಧಪಡಿಸಲಾಗಿದೆ. ಅಪಾಯಕಾರಿ ಕಂಬಗಳ ಬದಲಾವಣೆಗೆ ತುರ್ತು ಕ್ರಮ ಕೈಗೊಳ್ಳಲಾಗುವುದು. ಹಳೇ ಮೀಟರ್ ಬದಲಾವಣೆಗೆ ಕ್ರಮ ಕೈಗೊಳ್ಳಲಾಗಿದೆ. ಕಡಿದ ಮರದ ಗೆಲ್ಲುಗಳನ್ನು ರಸ್ತೆಯಲ್ಲೇ ಬಿಡಬಾರದರು. ಕರ್ವೇಲು ಉಪಕೇಂದ್ರ ಸ್ಥಾಪನೆಗೆ ಸಮತಟ್ಟುಗೊಳಿಸುವ ಕೆಲಸ ಪೂರ್ಣಗೊಂಡಿದ್ದು ಟೆಂಡರ್ ಆಗಿ ಕೆಲಸ ನಡೆಯುತ್ತಿದೆ. ತಿಂಗಳ ಮೂರನೇ ಶನಿವಾರ ಗ್ರಾಹಕರ ಸಮಾಲೋಚನಾ ಸಭೆಯನ್ನು ಸ್ಥಳೀಯಮಟ್ಟದಲ್ಲಿ ನಡೆಸಲು ಸೂಚನೆ ನೀಡಲಾಗಿದೆ ಎಂದರು.

"

ಎಚ್‌ಟಿ ಲೈನ್ ಕಂಬಗಳು ತುಂಡಾಗುವ ಹಂತಕ್ಕೆ ಹೋದರೂ ತ್ವರಿತವಾಗಿ ದುರಸ್ತಿ ಮಾಡುವುದಿಲ್ಲ. ಬಿಲ್ ರೀಡಿಂಗ್ ತಡವಾಗಿ ಮಾಡುತ್ತಿರುವುದು ಇಲಾಖೆಯ ಸಮಸ್ಯೆಯಾದರೂ ಗ್ರಾಹಕರಿಗೆ ಬಡ್ಡಿ ಹಾಕಲಾಗಿದೆ. ಸಿಬ್ಬಂದಿ ಸಮಸ್ಯೆಯನ್ನು ಸರಿಯಾಗಿ ಗಮನಿಸುತ್ತಿಲ್ಲ. ಎಲ್ಲೆಡೆ ವಿದ್ಯುತ್ ತಂತಿಗಳಲ್ಲಿ ಗಿಡಗಂಟಿಗಳು ತುಂಬಿಕೊಂಡಿವೆ.

— ಅಶೋಕ್ ಕುಮಾರ್ ಶೆಟ್ಟಿ, ಸ್ಥಾಯಿ ಸಮಿತಿ ಅಧ್ಯಕ್ಷ

"

ವಿಟ್ಲದಲ್ಲಿ ಫೀಡರ್‌ಗಳು ಅಂಡರ್ ಗ್ರೌಂಡ್ ಆಗುವುದರಿಂದ ಸಮಸ್ಯೆ ಕಡಿಮೆಯಾಗಬಹುದೆಂಬ ನಿರೀಕ್ಷೆ ಇದೆ. ವಿಟ್ಲ ಉಪ ವಿಭಾಗಕ್ಕೆ ಮಳೆಗಾಲದಲ್ಲಿ ಉತ್ತಮ ಸೇವೆ ನೀಡುವುದಕ್ಕೆ ಎರಡು ವಾಹನ ನೀಡಲಾಗಿದೆ. ರಾತ್ರಿ ಪಾಳಿಯಲ್ಲಿ ಕೆಲಸ ಮಾಡುವುದಕ್ಕೂ ಲೈನ್‌ಮನ್‌ಗಳನ್ನು ನೇಮಿಸಲಾಗಿದೆ.

— ಸಂತೋಷ್ ನಾಯ್ಕ, ಕಾರ್ಯನಿರ್ವಾಹಕ ಇಂಜಿನಿಯರ್