ಶ್ರೀಗಳ ಹಿನ್ನೆಲೆ: ಬೆಳಗಾವಿ ಜಿಲ್ಲೆಯ ಮಲಪ್ರಭೆ ನದಿ ದಡದಲ್ಲಿ ಜನಿಸಿ ಯೋಗ ಸಿದ್ಧಿಯಿಂದ 300 ವರ್ಷ ಬದುಕಿದ್ದ ಅಜ್ಜೇಶ್ವರರು ಯಾವುದೇ ಮತ-ಪಂಥಕ್ಕೆ ಸೀಮಿತವಾಗಿರದೆ ತಮ್ಮ ಜೀವಿತಾವಧಿಯವರೆಗೂ ಶಿಸ್ತು, ಸೌಜನ್ಯ ಮಾನವೀಯ ಮೌಲ್ಯ ಮೈಗೂಡಿಸಿಕೊಂಡಿದ್ದರು. ಸಕಲ ಜೀವರಾಶಿಗಳಿಗೆ ಲೇಸಾಗಲಿ ಎಂಬ ಶರಣರ ವಾಣಿಗೆ ಅನ್ವರ್ಥ ಎಂಬಂತೆ ಬದುಕಿದವರು. ಕಷ್ಟ-ಕಾರ್ಪಣ್ಯಗಳಿಂದ ಬಳಲಿ ಬಂದ ಭಕ್ತರ ಭಾವನೆಗಳನ್ನು ಕಳೆದು ಅವರ ಬಾಳು ಬೆಳಗಿದ ಭಗವತ್ ಸ್ವರೂಪರಾಗಿದ್ದರು. ಅವರು ಭಕ್ತರ ಹೃದಯಸಿಂಹಾಸನದಲ್ಲಿ ಇಂದಿಗೂ ನೆಲೆಸಿದ್ದಾರೆ. ಬದುಕಿರುವಾಗ ಒಂದು ದಿನವೂ ಪಲ್ಲಕ್ಕಿ ಏರಲಿಲ್ಲ, ಮೆರವಣಿಗೆ ಬಯಸಲಿಲ್ಲ, ಗಾದಿಗೊರಗಿ ಕೂರಲಿಲ್ಲ, ಮೃಷ್ಟಾನ್ನ ಉಣ್ಣಲಿಲ್ಲ, ಸಿಂಗಾರ ಬಯಸಲಿಲ್ಲ, ಬಂಗಾರ ಬೇಡಲಿಲ್ಲ, ಕೀರ್ತಿಶನಿಯ ಹಿಂದೆ ಹೋಗಲಿಲ್ಲ, ಸ್ವಾಮಿ ನಾನಲ್ಲ. ನನ್ನದಲ್ಲ- ನನ್ನಿಂದಲ್ಲ. ನೀವೆ ಎಲ್ಲ, ನಿಮ್ಮದೇ ಎಲ್ಲ, ನಿಮ್ಮಿಂದಲೇ ಎಲ್ಲ ಎಂಬ ವಿನೀತ ಭಾವದ ಪೂಜ್ಯರಾಗಿದ್ದರು. ಯಾರಾದರೂ ಬಂದು ಯಪ್ಪಾ ಎಲ್ಲವೂ ತಮ್ಮ ಆಶೀರ್ವಾದ ಎಂದರೆ ‘ನಂದು-ನಿಂದು ಏನಿದೆ? ಈ ಜಗದಲಿ. ಎಲ್ಲವೂ ಆ ಶಿವನಿಚ್ಛೆ’ ಎಂದು ಕೈಮುಗಿಯುತ್ತಿದ್ದರು ಅಜ್ಜೇಶ್ವರರು.
