124 ಕಾಮಗಾರಿಗಳು ರದ್ದು
13 ಜಿಲ್ಲೆಗಳ ವ್ಯಾಪ್ತಿಯಲ್ಲಿ 124 ಕಾಮಗಾರಿಗಳು ರದ್ದಾಗಿವೆ ಎಂದು ಕಾರ್ಯದರ್ಶಿ ಗಾಯತ್ರಿ ಸಭೆ ಗಮನಕ್ಕೆ ತಂದರು. ಶಾಸಕ ಚನ್ನಬಸಪ್ಪ ಮಾತನಾಡಿ, ಕಾಂಗ್ರೆಸ್ ಸರ್ಕಾರ ಬಂದ ಮೇಲೆ ನೂರಾರು ಕಾಮಗಾರಿಗಳು ರದ್ದಾಗಿವೆ. ಇದು ಎಂಎಡಿಬಿಗೆ ಮಾಡಿದ ಅವಮಾನ. ಕಾಮಗಾರಿಗಳನ್ನು ರದ್ದು ಮಾಡಿ ಅನುದಾನ ಹಿಂಪಡೆಯುವ ಶೋಚನೀಯ ಸ್ಥಿತಿಗೆ ಸರ್ಕಾರ ಬಂದಿದೆ. ತಕ್ಷಣವೇ ಅನುದಾನ ಬಿಡುಗಡೆ ಮಾಡಿ ರದ್ದಾಗಿರುವ ಎಲ್ಲ ಕಾಮಗಾರಿಗಳನ್ನು ಶುರು ಮಾಡಬೇಕು ಎಂದು ಒತ್ತಾಯಿಸಿದರು. ಶಿವಮೊಗ್ಗ ನಗರದ ಶಾಲಾ ಕಾಲೇಜುಗಳ ದುರಸ್ತಿ, ಮೂಲಸೌಕರ್ಯಕ್ಕೆ, ನೆಹರು ಕ್ರೀಡಾಂಗಣದಲ್ಲಿ ಕುಡಿಯುವ ನೀರಿನ ಘಟಕ ಗ್ಯಾಲರಿಯ ಮೇಲ್ಛಾವಣಿ, ಹೈ ಮಾಸ್ಟ್ ಅಳವಡಿಕೆ ಹಾಗೂ ಪಶು ವೈದ್ಯಕೀಯ ಕಾಲೇಜಿನಲ್ಲಿ ಕ್ರೀಡಾಂಗಣಕ್ಕೆ ಹೈ ಮಾಸ್ಟ್ ಅಳವಡಿಕೆಗೆ ಅನುದಾನ ನೀಡುವಂತೆ ಮನವಿ ಮಾಡಿದರು.
