ಯಂತ್ರಾಧಾರಿತ ಚಿತಾಗಾರ ಆರಂಭ

ಬೆಳಗಾವಿ: ಸ್ಮಾರ್ಟ್ ಸಿಟಿಯಲ್ಲಿ ಶವಸಂಸ್ಕಾರ ಮಾಡಲು ನಾನಾ ರೀತಿಯ ತೊಂದರೆ ಎದುರಿಸುತ್ತಿದ್ದ ಸಾರ್ವಜನಿಕರಿಗೆ ಇದೀಗ ಬೆಳಗಾವಿ ಮಹಾನಗರ ಪಾಲಿಕೆ ಪುನಃ ಆರಂಭಿಸಿರುವ ಡೀಸೆಲ್ ಯಂತ್ರ ಚಿತಾಗಾರ ಅನುಕೂಲವಾಗಿದೆ. ಕರೊನಾ ಸೋಂಕಿನಿಂದ ಬುಧವಾರ ಮೃತಪಟ್ಟಿದ್ದ ವ್ಯಕ್ತಿಯ ಅಂತ್ಯ ಸಂಸ್ಕಾರವನ್ನೂ ಪಾಲಿಕೆ ಸಿಬ್ಬಂದಿ ಇದೇ ಡೀಸೆಲ್ ಚಿತಾಗಾರದಲ್ಲಿಯೇ ಮಾಡಿದ್ದಾರೆ.

ಬೆಳಗಾವಿ ಸದಾಶಿವ ನಗರದ ರುದ್ರ ಭೂಮಿಯಲ್ಲಿ 3 ತಿಂಗಳ ಹಿಂದೆ ಕಾರ್ಯಾರಂಭ ಮಾಡಿದ್ದ ಡೀಸೆಲ್ ಯಂತ್ರ ಚಿತಾಗಾರದಲ್ಲಿ ಪ್ರಾಯೋಗಿಕವಾಗಿ 4 ಅನಾಥ ಶವಗಳ ಅಂತ್ಯ ಸಂಸ್ಕಾರ ಮಾಡಲಾಗಿತ್ತು. ಇದೀಗ ಕರೊನಾ ಸೋಂಕಿನಿಂದ ಬುಧವಾರ ಮೃತಪಟ್ಟ ವ್ಯಕ್ತಿಯ ಶವವನ್ನು ಅವರ ಕುಟುಂಬ ಸದಸ್ಯರ ಸಮ್ಮುಖದಲ್ಲಿಯೇ ಪಾಲಿಕೆ ಸಿಬ್ಬಂದಿ ಅಂತ್ಯ ಸಂಸ್ಕಾರ ಮಾಡುವ ಮೂಲಕ ಅಧಿಕೃತವಾಗಿ ಡೀಸೆಲ್ ಯಂತ್ರ ಚಿತಾಗಾರಕ್ಕೆ ಚಾಲನೆ ಕೊಟ್ಟರು.

35 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣ: ನಗರದಲ್ಲಿ ಆಯಾ ಸಮುದಾಯದವರಿಗಾಗಿ ಈಗಾಗಲೇ ರುದ್ರಭೂಮಿಗಳಿವೆ. ಆ ಸ್ಥಳಗಳಲ್ಲಿಯೇ ತಮ್ಮ ಸಮುದಾಯದ ವಿಧಿ ವಿಧಾನಗಳಂತೆ ಶವ ಸಂಸ್ಕಾರ ಮಾಡುತ್ತಿದ್ದಾರೆ. ಕೆಲ ಸಮುದಾಯದವರು ಶವವನ್ನು ಮಣ್ಣಿನಲ್ಲಿ ಹೂಳಿದರೆ, ಇನ್ನೂ ಕೆಲ ಸಮುದಾಯದವರು ಚಿತೆಗೆ ಅಗ್ನಿಸ್ಪರ್ಶ ಮಾಡುತ್ತಾರೆ. ಆದರೆ, ಇತ್ತೀಚೆಗೆ ಶವ ಸುಡಲು ಕಟ್ಟಿಗೆ (ಸೌದೆ)ಯ ಅಭಾವವಿದ್ದು, ಮಳೆಗಾಲದ ವೇಳೆ ಶವ ಸುಡಲು ಸಂಬಂಧಿಕರು ಸಮಸ್ಯೆ ಅನುಭವಿಸಬೇಕಿತ್ತು. ಈ ಹಿನ್ನೆಲೆಯಲ್ಲಿ ಡೀಸೆಲ್ ಯಂತ್ರ ಚಿತಾಗಾರದ ಅವಶ್ಯಕತೆ ಮನಗಂಡು 2019-20ನೇ ಸಾಲಿನಲ್ಲಿ ರಾಜ್ಯ ಹಣಕಾಸು ಯೋಜನೆಯಡಿ 35 ಲಕ್ಷ ರೂ. ವೆಚ್ಚದಲ್ಲಿ ಡೀಸೆಲ್ ಯಂತ್ರ ಆಧಾರಿತ ವಿದ್ಯುತ್ ಚಿತಾಗಾರ ನಿರ್ಮಿಸಲಾಗಿದೆ ಎಂದು ಪಾಲಿಕೆ ಅಧಿಕಾರಿಗಳು ತಿಳಿಸಿದ್ದಾರೆ.