ಬಾಕ್ಸ್
ಅಣಬೆ ತಯಾರಿಕಾ ಘಟಕ
ತಜ್ಞರ ವರದಿ ಆಧರಿಸಿ ತೀರ್ಮಾನ
ಇರುವೈಲು ವಾರ್ಡ್ನ ಮೆಸರ್ಸ್ ವೈಟ್ ಗ್ರೋವ್ ಅಗ್ರಿ ಅಲ್ಎಲ್ಪಿ ಅಣಬೆ ತಯಾರಿಕಾ ಘಟಕ ಕಾರ್ಯಾಚರಣೆ ಸಂಬಂಧಿಸಿ ಜಿಲ್ಲಾಧಿಕಾರಿ ನೇತೃತ್ವದ ಸಮಿತಿ ನೀಡಿರುವ ನಿಯಮಗಳು ಕಾರ್ಯಗತ ಆಗುತ್ತಿರುವ ಬಗ್ಗೆ ಪಾಲಿಕೆಯ ಸ್ಥಳೀಯ ಸದಸ್ಯರು, ಪ್ರತಿಪಕ್ಷ ನಾಯಕರು ಹಾಗೂ ಪರಿಸರ ಮಾಲಿನ್ಯಕ್ಕೆ ಸಂಬಂಧಿಸಿ ಸರ್ಕಾರೇತರ ಸಂಸ್ಥೆಯ ತಜ್ಞರ ಸಮಿತಿ ರಚಿಸಿ, ಪರಿಶೀಲನೆ ನಡೆಸಬೇಕು. ಸಮಿತಿ ವರದಿ ಆಧಾರದಲ್ಲಿ ಪರಿಷತ್ತಿನಲ್ಲಿ ಸೂಕ್ತ ನಿರ್ಧಾರ ಕೈಗೊಳ್ಳುವುದಾಗಿ ಪಾಲಿಕೆ ಮುಖ್ಯ ಸಚೇತಕ ಪ್ರೇಮಾನಂದ ಶೆಟ್ಟಿ ತಿಳಿಸಿದರು. ಅಣಬೆ ತಯಾರಿಕಾ ಘಟಕದಿಂದ ಸುತ್ತಮುತ್ತಲಿನ ಜನರಿಗೆ ತೊಂದರೆಯಾಗುತ್ತಿದ್ದು, ಅದನ್ನು ಸ್ಥಳಾಂತರಿಸಬೇಕು ಅಥವಾ ಶಾಶ್ವತವಾಗಿ ನಿಲುಗಡೆ ಮಾಡುವಂತೆ ಶಾಸಕ ಡಾ.ಭರತ್ ಶೆಟ್ಟಿ ಮಾಡಿಕೊಂಡ ಮನವಿ ಆಡಳಿತ ಮತ್ತು ಪ್ರತಿಪಕ್ಷಗಳ ನಡುವೆ ತೀವ್ರ ಚರ್ಚೆಗೆ ಅವಕಾಶ ಒದಗಿಸಿತು. ಈ ವಿಷಯದ ಬಗ್ಗೆ ತಿಂಗಳ ಹಿಂದೆ ಪಾಲಿಕೆಗೆ ಮನವಿ ಮಾಡಿದ್ದೇನೆ. ಇದು ಸ್ಥಳೀಯ ಜನರ ಸಮಸ್ಯೆ. ಈ ವಿಷಯದಲ್ಲಿ ರಾಜಕೀಯವಿಲ್ಲ. ಕಳೆದ ಚುನಾವಣೆಯಲ್ಲಿ ಈ ವಿಷಯವನ್ನು ರಾಜಕೀಯವಾಗಿ ತೆಗೆದುಕೊಳ್ಳುವ ಅವಕಾಶ ಇದ್ದರೂ ಈ ಬಗ್ಗೆ ನಾನು ಮಾತನಾಡಿಲ್ಲ. ಕೆಲವು ದಿನಗಳ ಹಿಂದೆ ಆ ಪರಿಸರಕ್ಕೆ ಭೇಟಿ ನೀಡಿದಾಗ 15 ನಿಮಿಷ ನಿಲ್ಲಲೂ ಆಗಿಲ್ಲ. ಘಟಕದಿಂದ ಹೊರಸೂಸುವ ವಾಸನೆ ಸ್ಥಳೀಯರಿಗೆ ಹಿಂಸೆ ನೀಡುತ್ತಿದೆ. ಆ ಸಂಸ್ಥೆಯನ್ನು ನಿಲುಗಡೆ ಮಾಡಬೇಕೆಂದು ನಾನು ಕೇಳುತ್ತಿಲ್ಲ. ಬದಲಾಗಿ ಈಗಾಗಲೇ ಆ ಸಂಸ್ಥೆ ಕಾರ್ಯಾಚರಣೆ ಆರಂಭಿಸಲು ಜಿಲ್ಲಾಧಿಕಾರಿ ನೀಡಿರುವ ನಿಯಮಗಳು ಪಾಲನೆಯಾಗುತ್ತಿವೆಯೇ ಎಂಬ ಬಗ್ಗೆ ಮರು ಪರಿಶೀಲನೆ ಆಗಬೇಕಾಗಿದೆ ಎಂದು ಶಾಸಕರು ತಿಳಿಸಿದರು. ಸ್ಥಳೀಯ ಸದಸ್ಯೆ ಹೇಮಲತಾ ಸಾಲ್ಯಾನ್, ಪ್ರತಿಪಕ್ಷದ ಪ್ರವೀಣ್ಚಂದ್ರ ಆಳ್ವ, ಶಶಿಧರ ಹೆಗ್ಡೆ, ವಿನಯರಾಜ್ ಮುಂತಾದವರು ಈ ಚರ್ಚೆಯಲ್ಲಿ ಭಾಗವಹಿಸಿದ್ದರು.
