ಶುಕ್ರವಾರ ಪಾಲಿಕೆಯ ಕೆಲ ಅಧಿಕಾರಿಗಳು ಅಂಗಡಿಕಾರರಿಗೆ ದಂಡ ಹಾಕಿರುವುದಷ್ಟೇ ಅಲ್ಲದೆ, ಅಂಗಡಿಗೆ ಬಂದ ಗಿರಾಕಿಗಳಲ್ಲಿ ಎಷ್ಟು ಜನ ಮಾಸ್ಕ್ ಧರಿಸಿಲ್ಲ ಎಂದು ಲೆಕ್ಕ ಮಾಡಿ, ಅವರ ಪಾಲಿನ ದಂಡವನ್ನೂ ವ್ಯಾಪಾರಿಯಿಂದಲೇ ವಸೂಲಿ ಮಾಡಿದ್ದಾರೆ! ಇದೆಂಥ ನ್ಯಾಯ ಎಂದು ವ್ಯಾಪಾರಿ ಪ್ರಶ್ನಿಸಿದಾಗ, ‘ಹೊಸ ಮಾರ್ಗಸೂಚಿ ಬಂದಿದೆ. ಅದರ ಪ್ರಕಾರ, ಅಂಗಡಿಗೆ ಬಂದವರಲ್ಲಿ ನೀನು ಜಾಗೃತಿ ಮೂಡಿಸಿ ಮಾಸ್ಕ್ ಹಾಕಿಕೊಳ್ಳಲು ಹೇಳಬೇಕಿತ್ತು. ಹಾಗೆ ಮಾಡದೆ ಇದ್ದುದಕ್ಕೆ ನಿನಗೇ ದಂಡ ವಿಧಿಸುವಂತೆ ಸೂಚನೆ ಇದೆ. ಆದ್ದರಿಂದ ದಂಡ ಕಟ್ಟು’ ಎಂದು ಹೇಳಿದ್ದಾರಂತೆ. ಪಾಲಿಕೆ ಅಧಿಕಾರಿಗಳನ್ನು ಎದುರು ಹಾಕಿಕೊಂಡರೆ ಇನ್ನೊಂದು ದಿನ ಇನ್ನೇನೋ ಕಾರಣ ನೀಡಿ ದಂಡ/ಕೇಸ್ ಹಾಕಬಹುದು ಎಂಬ ಭಯದಲ್ಲಿ ಕೆಲ ಅಂಗಡಿಕಾರರು, ಗ್ರಾಹಕರ ಲೆಕ್ಕದ ದಂಡವನ್ನೂ ಸೇರಿಸಿ ಸಾವಿರಗಟ್ಟಲೇ ರೂಪಾಯಿ ತೆತ್ತು ಕಳುಹಿಸಿದ್ದಾರೆ.
