ದರ ಕುಸಿದ ನಡುವೆಯೂ ಟೊಮ್ಯಾಟೊ ನಾಟಿ

ಕೃಷ್ಣಮೂರ್ತಿ ಪಿ.ಎಚ್ ಮಾಯಕೊಂಡ

ಟೊಮ್ಯಾಟೊ ಬೆಲೆ ಪಾತಾಳಕ್ಕೆ ಕುಸಿಯುತ್ತಿದ್ದರೂ ಮಾಯಕೊಂಡ, ಆನಗೋಡು ಹೋಬಳಿಗಳ ಹಲವಾರು ಗ್ರಾಮಗಳಲ್ಲಿ ರೈತರು ಮತ್ತೆ ನಾಟಿ ಮಾಡಲು ಮುಂದಾಗಿದ್ದಾರೆ.

ಪ್ರಸ್ತುತ ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆಜಿಗೆ 2 ರಿಂದ 4 ರೂ. ಗಳಿಗೆ ಮಾರಾಟವಾಗುತ್ತಿದೆ. 25 ಕೆಜಿ ಟೊಮ್ಯಾಟೊ ಹಣ್ಣಿನ ಒಂದು ಬಾಕ್ಸ್​ಗೆ ಕೇವಲ 40 ರಿಂದ 50 ರೂ. ಇದ್ದು ರೈತರಿಗೆ ನಷ್ಟ ತಂದೊಡ್ಡಿದೆ. ಹೀಗಾಗಿ ಕೆಲವೆಡೆ ರೈತರು ಜಮೀನಿನ ಟೊಮ್ಯಾಟೊ ಹಣ್ಣನ್ನು ಕೀಳದೆ ಹಾಗೆ ಬಿಟ್ಟಿದ್ದಾರೆ. ಆದರೆ ಇಂತಹ ನಷ್ಟದ ನಡುವೆಯೂ ಟೊಮ್ಯಾಟೊ ಬೆಳೆಯಲು ಮುಂದಾಗಿರುವುದು ವಿಶೇಷ.

ಈಗ ಸಸಿಗಳನ್ನು ನಾಟಿ ಮಾಡಿದರೆ, ಜೂನ್ ತಿಂಗಳ ಮೊದಲ ಅಥವಾ ಎರಡನೇ ವಾರದಲ್ಲಿ ಕಟಾವಿಗೆ ಬರುತ್ತದೆ. ಆ ಸಂದರ್ಭದಲ್ಲಿ ಮಳೆಗಾಲ ಪ್ರಾರಂಭವಾಗಲಿದ್ದು, ಉತ್ತಮ ಧಾರಣೆ ಸಿಗುವ ನಿರೀಕ್ಷೆ ಇದೆ ಎಂದು ಹುಚ್ಚವ್ವನಹಳ್ಳಿ ಗ್ರಾಮದ ಪ್ರಗತಿಪರ ತರಕಾರಿ ಬೆಳೆಗಾರರಾದ ಸಂತೋಷ್, ಹರೀಶ್, ಗಂಗಾಧರ್, ಸಮಿವುಲ್ಲಾ, ಚಿದಾನಂದ, ಅನಿಲ್ ಕುಮಾರ್, ವಿರೂಪಾಕ್ಷಪ್ಪ ಕಾಕಬಾಳ್ ತಿಳಿಸಿದ್ದಾರೆ.

ಸರ್ಕಾರ ತರಕಾರಿ, ಹಣ್ಣು, ಹೂಗಳಿಗೆ ಬೆಂಬಲ ಬೆಲೆಯನ್ನು ನಿಗದಿಗೊಳಿಸುವ ಮೂಲಕ ರೈತರಿಗೆ ನೆರವಾಗಬೇಕು. ಜತೆಗೆ ಆನಗೋಡು, ಮಾಯಕೊಂಡ, ಅಣಜಿ ಹೋಬಳಿಗಳಲ್ಲಿ ಕೋಲ್ಡ್ ಸ್ಟೋರೇಜ್ ಘಟಕಗಳನ್ನು ನಿರ್ಮಾಣ ಮಾಡಬೇಕು ಎಂಬುದು ರೈತರ ಮನವಿಯಾಗಿದೆ.