ಕಲಿಕೆ 'ಕಲೆಯೊಂದಿಗೆ' ಗಳಿಕೆ..!

ಈಗಷ್ಟೇ ದ್ವಿತೀಯ ಪಿಯುಸಿ ಮುಗಿಸಿರುವ ಮಾರ್ಪಳ್ಳಿಯ ಕೊರಂಗ್ರಪಾಡಿಯ ಮಾನ್ಯಾ, ಕಾಲೇಜು ಶಿಕ್ಷಣದೊಂದಿಗೆ ವಿವಿಧ ಬಗೆಯ ಪೇಂಟಿಂಗ್ಸ್​ ರಚಿಸಿ, ಸಿಗುವ ಆದಾಯದಿಂದ ಕುಟುಂಬಕ್ಕೂ ಆಸರೆಯಾಗಿದ್ದಾಳೆ.

ಚಿತ್ರಕಲೆಗಳ ವಿವಿಧ ಪ್ರಕಾರಗಳಾದ ಎಕ್ರೆಲಿಕ್​, ಕ್ಯಾನ್​ವಾಸ್​, ವಾಟರ್​ ಕಲರ್​, ಬಾಲ್​ಪೆನ್​ ಆರ್ಟ್​, ವಾಲ್​ ಪೇಂಟ್​ಗಳಲ್ಲಿ ಬಗೆಬಗೆಯ ಚಿತ್ರಗಳನ್ನು ರಚಿಸಿ ಜೀವಕಳೆ ನೀಡುತ್ತಾಳೆ. ಲೈವ್​ ಆರ್ಟ್​ ಕಲೆಯನ್ನೂ ಕರಗತ ಮಾಡಿಕೊಂಡಿದ್ದು ಈವರಗೆ 5 ಪ್ರದರ್ಶನ ನೀಡಿದ್ದಾಳೆ. ಸಾವಿರಾರು ಚಿತ್ರಗಳನ್ನು ರಚಿಸಿ, ಮಾರಾಟ ಮಾಡಿದ್ದಾಳೆ.

ಮಾನ್ಯಾಳ ಕಲೆಗೆ ಮಾನ್ಯತೆ ಲಭಿಸತೊಡಗಿದೆ. ಫ್ರೇಮ್​ ಹಾಕಿರುವ ಸಣ್ಣ ಫೋಟೋ ಕನಿಷ್ಠ 600 ರೂ.ನಿಂದ, 3ರಿಂದ 4 ಅಡಿ ಉದ್ದದ ಫೋಟೋಗಳು 20 ಸಾವಿರ ರೂ.ಬೆಲೆ ಹೊಂದಿದೆ. ಕ್ಯಾನ್​ವಾಸ್​ಗಳಲ್ಲಿ ರವಿವರ್ಮ ಚಿತ್ರಿಸಿದ ಖ್ಯಾತ ಚಿತ್ರಗಳು, ಮೈಸೂರಿನ ಎಸ್​.ಎಲ್​. ಹಲ್ಡನಕರ್​ ಅವರ 'ಹೋಪ್​ ಆಫ್​ ಲೈಟ್​' (ದೀಪದ ಬೆಳಕಿನ ಹಿಂಭಾಗದಲ್ಲಿ ಕಾಣುವ ಮಹಿಳೆ)ನ ಎಕ್ರೆಲಿಕ್​ ಪೇಂಟಿಂಗ್ಸ್​, ಪೊಟ್ರೇಟ್​ (ಮನುಷ್ಯರ ಚಿತ್ರ)ಗಳಲ್ಲಿ ಸಾಹಿತಿಗಳಾದ ಕುವೆಂಪು, ದ.ರಾ. ಬೇಂದ್ರೆ ಹಾಗೂ ಧ್ಯಾನ ಸ್ಥಿತಿಯಲ್ಲಿರುವ ಗೌತಮ ಬುದ್ಧನ ಫೋಟೋಗಳಿಗೆ ಬೇಡಿಕೆ ಇದೆ. ಯಾರ ಭಾವಚಿತ್ರವನ್ನಾದರೂ ಸಿದ್ಧಪಡಿಸುತ್ತಾಳೆ.

ತಂದೆ ಫೋಟೋಗ್ರಾರ್​, ತಾಯಿ ಕಾಲೇಜೊಂದರಲ್ಲಿ ಲೈಬ್ರೇರಿಯನ್​, 8ನೇ ತರಗತಿಯಲ್ಲಿ ಕಲಿಯುತ್ತಿರುವ ಸಹೋದರನಿರುವ ಪುಟ್ಟ ಕುಟುಂಬ ಆಕೆಯದ್ದು. ಮನಸ್ಸಿದ್ದಲ್ಲಿ ಮಾರ್ಗವಿದೆ ಎಂಬ ಮಾತಿಗೆ, ಹೆತ್ತವರಿಗೆ ಹೊರೆಯಾಗದೆ ಸಂಪಾದನೆಯನ್ನೂ ಮಾಡುತ್ತಿರುವ ಮಾನ್ಯಾ, ಯುವ ಸಮುದಾಯಕ್ಕೆ ಮಾದರಿಯಾಗಿದ್ದಾಳೆ.

ಏಳನೇ ತರಗತಿಯಲ್ಲಿದ್ದಾಗ ಮಾನ್ಯಾಳಿಗೆ ಚಿತ್ರಕಲೆಯತ್ತ ಆಸಕ್ತಿ ಮೂಡಿತು. 2020ರಲ್ಲಿ ಕರೊನಾ ಲಾಕ್​ಡೌನ್​ ಸಂದರ್ಭದಲ್ಲಿ ಶಾಲೆ ಇಲ್ಲದ್ದರಿಂದ ಹೆಚ್ಚಿನ ಸಮಯ ಚಿತ್ರ ಬಿಡಿಸುತ್ತಿದ್ದಳು. ಇಂದಿನ ಸಾಧನೆ ಹಂತಕ್ಕೆ ಲಾಕ್​ಡೌನ್​ ವರವಾಯಿತು. ಹೈಸ್ಕೂಲ್​ಗೆ ಹೋಗುವಾಗ ವಿವಿಧ ಸ್ಪರ್ಧೆಗಳಲ್ಲಿ ಬಹುಮಾನ ಪಡೆದಳು. 2018ರಲ್ಲಿ ವಾಜಪೇಯಿ ಜನ್ಮದಿನದ ಪ್ರಯುಕ್ತ ಬಿಜೆಪಿ ಆಯೋಜಿಸಿದ್ದ ಚಿತ್ರಸ್ಪರ್ಧೆ, 2021ರಲ್ಲಿ ಅಂಚೆ ಇಲಾಖೆ ಆಯೋಜಿಸಿದ್ದ ಜಿಲ್ಲಾ ಮಟ್ಟದ ಸ್ಪರ್ಧೆ, 2022ರಲ್ಲಿ ಉಡುಪಿ ಲೈನ್ಸ್​ ಕ್ಲಬ್​ ಆಯೋಜಿಸಿದ್ದ ಸ್ಪರ್ಧೆಯಲ್ಲಿ ಪ್ರಥಮ, 2021-22ರಲ್ಲಿ ರಾಷ್ಟ್ರೀಯ ವಿಜ್ಞಾನ ದಿನ ನಿಮಿತ್ತ ಮಾಹೆ ಆಯೋಜಿಸಿದ್ದ ಸ್ಪರ್ಧೆಯಲ್ಲಿ ದ್ವಿತೀಯ, 2022ರಲ್ಲಿ ಗದಗದಲ್ಲಿ ನಡೆದ ರಾಜ್ಯ ಮಟ್ಟದ 'ಚಿಣ್ಣರ ಚಿತ್ರ ಚಿತ್ತಾರ' ಸ್ಪರ್ಧೆಯಲ್ಲಿ 'ಲಿಟ್ಲ್​ ಆರ್ಟಿಸ್ಟ್​' ಪ್ರಶಸ್ತಿ, 2023ರಲ್ಲಿ ನೆಹರು ಯುವ ಕೇಂದ್ರ ಆಯೋಜಿಸಿದ್ದ ಸ್ಪರ್ಧೆಯಲ್ಲಿ ದ್ವಿತೀಯ ಹೀಗೆ ಸಾಧನೆಗಳ ಪಟ್ಟಿ ಬೆಳೆಯುತ್ತದೆ.