ಫೆ.11ಕ್ಕೆ ಮಣಿಪಾಲ ಮ್ಯಾರಥಾನ್​

ಉಡುಪಿ: ಮಣಿಪಾಲ ಉನ್ನತ ಶಿಕ್ಷಣ ಅಕಾಡೆಮಿ (ಮಾಹೆ) ಆಶ್ರಯದಲ್ಲಿ ಬಹು ನಿರೀಕ್ಷಿತ ಮಣಿಪಾಲ್​ ಮ್ಯಾರಥಾನ್​ 6ನೇ ಆವೃತ್ತಿ ಫೆಬ್ರವರಿ 11 ರಂದು ನಡೆಯಲಿದೆ. ಈ ಬಾರಿ ಜೀವನ್ಮರಣ ಕಾಯಿಲೆಯನ್ನು ಅನುಭವಿಸುತ್ತಿರುವ ರೋಗಿಗಳಿಗೆ ಪ್ರಶಾಮಕ ಆರೈಕೆ ಕೇಂದ್ರ 'ಹಾಸ್ಪಿಸ್​ ಕೇರ್​' ಹಾಗೂ ನಾವು ನಿಮ್ಮ ಜೊತೆ ಸದಾ ಇದ್ದೇವೆ ಎಂಬ ಘೋಷವಾಕ್ಯ ನೀಡಲಾಗಿದೆ ಎಂದು ಮಾಹೆ ಮಣಿಪಾಲ ಸಹಕುಲಾಧಿಪತಿ ಡಾ. ಎಚ್​. ಎಸ್​. ಬಲ್ಲಾಳ್​ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ವಿವಿಧ ಹರೆಯದ ಸುಮಾರು 15,000 ಮಂದಿ ಈ ಮ್ಯಾರಥಾನ್​ನಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ. ಈ ಹಿಂದಿನ ಮ್ಯಾರಥಾನ್​ನ ಆವೃತ್ತಿಗಳಲ್ಲಿ ಇಥಿಯೋಪಿಯಾ, ಕೀನ್ಯಾ, ಇಂಗ್ಲೆಂಡ್​, ನೇಪಾಲ, ಮೆಲೇಶ್ಯಾ, ಅಮೆರಿಕ ಮತ್ತು ಶ್ರೀಲಂಕಾದಿಂದ ಆಸಕ್ತರು ಆಗಮಿಸಿದ್ದರು. ಮುಂಬರುವ 2024 ರ ಮ್ಯಾರಥಾನ್​ ಇನ್ನೂ ಹೆಚ್ಚಿನ ಅಂತಾರಾಷ್ಟ್ರೀಯ ಪ್ರತಿಭೆಗಳನ್ನು ಆಕರ್ಷಿಸುವ ಭರವಸೆಯನ್ನು ಹೊಂದಿದೆ. ಅ.15ರಿಂದ ನೋಂದಣಿ ಪ್ರಕ್ರಿಯೆ ಪ್ರಾರಂಭವಾಗಲಿದೆ ಎಂದರು.

ಮಾಹೆ ಮಣಿಪಾಲದ ಉಪಕುಲಪತಿ ಲೆಫ್ಟಿನೆಂಟ್​ ಜನರಲ್​ (ಡಾ.) ಎಂ. ಡಿ. ವೆಂಕಟೇಶ್​ ಮಾತನಾಡಿ, ಮ್ಯಾರಥಾನ್​ನಲ್ಲಿ ಪಾಲ್ಗೊಳ್ಳುವವರಿಗೆ ಓಟ ಮಾತ್ರವಲ್ಲದೆ ಮಣಿಪಾಲ -ಉಡುಪಿ ಕರಾವಳಿಯ ಸೌಂದರ್ಯವನ್ನು ಕಾಣುವ ಅವಕಾಶವೂ ಲಭ್ಯವಾಗಲಿದೆ. 42 ಕಿಮೀ ಪೂರ್ಣ ಮ್ಯಾರಥಾನ್​, 21.1 ಕಿಮೀ ಅರ್ಧ ಮ್ಯಾರಥಾನ್​, 10 ಕಿಮೀ ಹಾಗೂ 5 ಕಿಮೀ ಮ್ಯಾರಥಾನ್​ ನಡೆಯಲಿದೆ. ಒಟ್ಟು ಎಲ್ಲಾ ವಿಭಾಗಗಳಲ್ಲಿ ವಿಜೇತರಿಗೆ 15 ಲಕ್ಷ ರೂ. ಮೊತ್ತದ ಬಹುಮಾನಗಳನ್ನು ವಿತರಿಸಲಾಗುವುದು ಎಂದರು.

ಉಡುಪಿ ಜಿಲ್ಲಾ ಅಮೆಚೂರ್​ ಅಥ್ಲೆಟಿಕ್ಸ್​ ಅಸೋಸಿಯೇಶನ್​ ಗೌರವ ಸಲಹೆಗಾರ ಕೆ. ರಘುಪತಿ ಭಟ್​, ಕಸ್ತೂರ್ಬಾ ಮೆಡಿಕಲ್​ ಕಾಲೇಜಿನ ಅಸೋಸಿಯೇಟ್​ ಡೀನ್​ ಡಾ. ನವೀನ್​ ಸಾಲಿನ್ಸ್​, ರಾಜ್ಯ ಅಥ್ಲೆಟಿಕ್​ ಅಸೋಸಿಯೇಶನ್​ನ ಉಪಾಧ್ಯಕ್ಷ ಮಹೇಶ್​ ಠಾಕೂರ್​, ಜಿಲ್ಲಾ ಅಮೆಚೂರ್​ ಅಥ್ಲೆಟಿಕ್ಸ್​ ಅಸೋಸಿಯೇಶನ್​ನ ಅಧ್ಯಕ್ಷ ಕೆಂಪರಾಜ್​ ಉಪಸ್ಥಿತರಿದ್ದರು. ಮಾಹೆಯ ಕ್ರೀಡಾಮಂಡಳಿಯ ಕಾರ್ಯದರ್ಶಿ ಡಾ. ವಿನೋದ್​ ನಾಯಕ್​ ಸ್ವಾಗತಿಸಿ, ಮೋನಿಕಾ ಜಾಧವ್​ ವಂದಿಸಿದರು.