ಮಣಿಪಾಲ ಮಾತೃಅಮೃತ್​ ಮಿಲ್ಕ್​ ಬ್ಯಾಂಕ್​ ಉದ್ಘಾಟನೆ

ಉಡುಪಿ: ತಾಯಿಯ ಎದೆ ಹಾಲು ಶಿಶುಗಳಿಗೆ ಅಮೃತ ಅಥವಾ ಔಷಧವಿದ್ದಂತೆ. ನವಜಾತ ಶಿಶುಗಳು ಆರಂಭಿಕ ದಿನಗಳಲ್ಲಿ ಎದೆಹಾಲನ್ನು ಪಡೆಯುವುದು ನಿರ್ಣಾಯಕವಾಗಿದೆ. ಏಕೆಂದರೆ ಇದು ಶಿಶುಗಳ ಆರೋಗ್ಯವನ್ನು ಗಮನಾರ್ಹವಾಗಿ ಸುಧಾರಿಸುತ್ತದೆ ಎಂದು ಹೆಚ್ಚುವರಿ ಜಿಲ್ಲಾಧಿಕಾರಿ ಮಮತಾದೇವಿ ಜಿ.ಎಸ್​. ಹೇಳಿದರು.

ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯ ಸಹಯೋಗದೊಂದಿಗೆ ಮಣಿಪಾಲ್​ ಫೌಂಡೇಶನ್​ನ ಮೊದಲ ಮಾನವ ಎದೆಹಾಲು ನಿಧಿ (ಹ್ಯೂಮನ್​ ಬ್ರೆಸ್ಟ್​ ಮಿಲ್ಕ್​ ಬ್ಯಾಂಕ್​) ಮಣಿಪಾಲ ಮಾತೃಅಮೃತ್​ ಮಿಲ್ಕ್​ ಬ್ಯಾಂಕ್​ ಉದ್ಘಾಟಿಸಿ, ಮಾತನಾಡಿದರು.

ವೈದ್ಯಕಿಯ ಅಧೀಕ್ಷಕ ಡಾ.ಅವಿನಾಶ್​ ಶೆಟ್ಟಿ ಮಾತನಾಡಿ, ಹ್ಯೂಮನ್​ ಮಿಲ್ಕ್​ ಬ್ಯಾಂಕ್​ ಲಾಭರಹಿತ ಉಪಕ್ರಮವಾಗಿದೆ. ಹೆಚ್ಚಿನ ದಾನಿಗಳು ಮುಂದೆ ಬರುವಂತೆ ಮಾನವ ಹಾಲಿನ ಬ್ಯಾಂಕ್​ಗಳ ಬಗ್ಗೆ ಸಮುದಾಯಕ್ಕೆ ಶಿಕ್ಷಣ ನೀಡಬೇಕಾಗಿದೆ. ಆರೋಗ್ಯವಂತ ಹಾಲುಣಿಸುವ ತಾಯಂದಿರು, ಶಿಶುಗಳ ವಾಡಿಕೆಯ ತಪಾಸಣೆಗಾಗಿ ಆಸ್ಪತ್ರೆಯ ಓ ಪಿ ಡಿ ಗೆ ಹಾಜರಾಗುವವರು ಮಾನವ ಹಾಲನ್ನು ದಾನ ಮಾಡಬಹುದು ಎಂದು ಹೇಳಿದರು.

ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಐ.ಪಿ.ಗಡಾದ್​ ಅತಿಥಿಯಾಗಿದ್ದರು. ಕೆ ಎಂ ಸಿ ಡೀನ್​ ಡಾ ಪದ್ಮರಾಜ್​ ಹೆಗ್ಡೆ, ನವಜಾತಶಾಸ್ತ್ರ ವಿಭಾಗದ ಮುಖ್ಯಸ್ಥೆ ಡಾ. ಶೀಲಾ ಎಸ್​. ಮಥಾಯಿ ಉಪಸ್ಥಿತರಿದ್ದರು. ಡಾ.ಶ್ರುತಿ ಕೆ.ಭಾರದ್ವಾಜ್​ ಕಾರ್ಯಕ್ರಮ ನಿರೂಪಿಸಿದರು.