ಮಾವು ಚಿಗುರಿನಲ್ಲಿ ಕಾಣಿಸಿಕೊಂಡ ಹೂವು, ಮತ್ತೊಮ್ಮೆ ಔಷಧ ಸಿಂಪಡಣೆಗೆ ಮುಂದಾದ ಬೆಳೆಗಾರ

ಶ್ರೀನಿವಾಸಪುರ: ಹವಾಮಾನ ವೈಪರೀತ್ಯದಿಂದಾಗಿ ಮಾವಿನ ಫಸಲು ಈ ವರ್ಷ ಇಳಿಮುಖವಾಗಿದ್ದರೂ ಮೂರು ಹಂತಗಳಲ್ಲಿ ಗಿಡಗಳಲ್ಲಿ ಹೂವು ಕಾಣಿಸಿಕೊಳ್ಳುತ್ತಿರುವುದರಿಂದ ರೈತನಿಗೆ ಔಷಧ ಸಿಂಪಡಣೆ ಹೊರೆ ಹೆಚ್ಚಾಗಿದ್ದು, ನಷ್ಟದ ಮೇಲೆ ಮತ್ತಷ್ಟು ನಷ್ಟ ಉಂಟಾಗುವಂತಾಗಿದೆ.

ಪ್ರತಿವರ್ಷ ೆಬ್ರವರಿ ಅಂತ್ಯಕ್ಕೆ ಹೂವು ಅಂತ್ಯಗೊಂಡು ಪಿಂದೆಗಳಾಗುತ್ತಿದ್ದವು. ಆದರೆ ಈ ವರ್ಷ ಜನವರಿಯಲ್ಲಿ ಕಾಣಿಸಿಕೊಂಡ ಹೂವು ಶೇ.5 ಮಾತ್ರ. ಫೆಬ್ರವರಿಯಲ್ಲಿ ಶೇ.5ರಷ್ಟು ಹೂವು ಕಾಣಿಸಿಕೊಂಡಿತ್ತು. ನಂತರ ಮರಗಳಲ್ಲಿ ಚಿಗುರು ಕಾಣಿಸಿಕೊಂಡ ಕಾರಣ ಹೂವು ಬರುವುದಿಲ್ಲ ಎಂದು ತಿಳಿದು 2 ಬಾರಿ ಔಷಧ ಸಿಂಪಡಣೆ ಮಾಡಿದರು. ಮಾರ್ಚ್ ಮೊದಲ ವಾರದಲ್ಲಿ ಬಿಸಿಲು ಹೆಚ್ಚಾದ ಕಾರಣ ಚಿಗುರಿದ ಮರಗಳಲ್ಲೂ ಶೇ.5 ಹೂ ಕಾಣಿಸಿಕೊಂಡಿರುವುದರಿಂದ ಆ ಹೂವಿನಲ್ಲಿ ಕಾಯಿ ಕಚ್ಚುತ್ತದೋ ಇಲ್ಲವೋ ಔಷಧವನ್ನಂತೂ ಸಿಂಪಡಣೆ ಮಾಡಲೇಬೇಕಾದ ಅನಿವಾರ್ಯತೆಯಲ್ಲಿ ರೈತರಿದ್ದಾರೆ.

ಒಂದೊಮ್ಮೆ ಔಷಧ ಸಿಂಪಡಣೆ ಮಾಡದಿದ್ದರೆ ಜಿಗಿಹುಳ ಕಾಣಿಸಿಕೊಂಡು ಈಗಾಗಲೆ ಎರಡು ಹಂತಗಳಲ್ಲಿ ಹೂವು ಬಿಟ್ಟು ಕಾಯಿ ಕಚ್ಚಿರುವ ಕಾಯಿಗಳಿಗೂ ಕಪ್ಪುಮಚ್ಚೆ ರೋಗ ಬರುವ ಸಾಧ್ಯತೆ ಇರುವುದರಿಂದ ರೈತರು ಮೂರನೇ ಹಂತದಲ್ಲಿ ಔಷಧ ಸಿಂಪಡಣೆ ಮಾಡಲು ಮುಂದಾಗಿದ್ದು, ಮತ್ತಷ್ಟು ನಷ್ಟ ಅನುಭವಿಸುವಂತಾಗಿದೆ.

ಈಗಿರುವ ಬಿಸಿಲಿನ ತಾಪ ಡಿಸೆಂಬರ್ ತಿಂಗಳಲ್ಲಿ ಇದ್ದಿದ್ದರೆ ಒಂದೇ ಹಂತದಲ್ಲಿ ಜನವರಿಯಲ್ಲಿ ಹೂವು ಕಾಣಿಸಿಕೊಳ್ಳುತ್ತಿತ್ತು. ಹವಾಮಾನ ವೈಪರೀತ್ಯದಿಂದ ಮೂರು ಹಂತಗಳಲ್ಲಿ ಹೂವು ಕಾಣಿಸಿಕೊಂಡಿದೆ. ಜತೆಗೆ ಮರಗಳಲ್ಲಿ ಚಿಗುರು ಕಾಣಿಸಿಕೊಂಡ ಕಾರಣ ಎರಡನೇ ಹಂತದ ಹೂವಿಗೆ ತೃಪ್ತಿ ಪಟ್ಟು ಸುಮ್ಮನಿದ್ದರು. ಮೂರನೇ ಹಂತದಲ್ಲಿ ಹೂವು ಕಾಣಿಸಿಕೊಳ್ಳುತ್ತಿರುವುದರಿಂದ ಔಷಧ ಸಿಂಪಡಣೆ ಮಾಡಲೇಬೇಕಾಗಿದೆ. ಇಲ್ಲದಿದ್ದರೆ ಇರುವ ಫಸಲನ್ನೂ ಕಳೆದುಕೊಳ್ಳಬೇಕಾಗುತ್ತದೆ.