ಎಲ್ಲೂರಿನಿಂದ ಕಾಸರಗೋಡಿನವರೆಗೆ 115 ಕಿ.ಮೀ.ನಲ್ಲಿ 278 ಟವರ್ ನಿರ್ಮಾಣವಾಗಲಿದೆ. ಇದರಲ್ಲಿ 101 ಕೇರಳದಲ್ಲಿ, 177 ಕರ್ನಾಟಕದಲ್ಲಿರುತ್ತದೆ. 46 ಮೀಟರ್ ಕಾರಿಡಾರ್ ಇರುತ್ತದೆ. 1,150 ಎಕರೆ ಕಾರಿಡಾರ್ಗೆ ಸೇರಿದಂತೆ 3,450 ಎಕರೆ ನೇರವಾಗಿ ಯೋಜನೆಗೆ ಬಳಕೆಯಾಗಲಿದೆ. ಎಲ್ಲೂರಿನಿಂದ ಪುಣಚದವರೆಗೆ 1.65 ಲಕ್ಷ ಅಡಿಕೆ ಮರ, 10,000 ಕ್ಕೂ ಅಧಿಕ ತೆಂಗಿನ ಮರ, ಇತರ ಸಾವಿರಾರು ಮರಗಳು ಬಲಿಯಾಗಲಿವೆ. ಅರಣ್ಯ ಇಲಾಖೆ ಪ್ರಕಾರ 4,500ಕ್ಕೂ ಅಧಿಕ ಬೃಹತ್ ಮರಗಳಿವೆ. ಅದಕ್ಕಾಗಿ ಅರಣ್ಯ ಇಲಾಖೆ ಅನುಮತಿ ನೀಡುತ್ತಿಲ್ಲ. ಹಾಗಾಗಿ ಕೃಷಿ ಭೂಮಿಯ ಬದಲು ಪರ್ಯಾಯ ಮಾರ್ಗದಲ್ಲಿ ಲೈನ್ ಹಾದು ಹೋಗುವಂತೆ ಮಾಡಬೇಕು. ಹಲವೆಡೆ ಗೆಜೆಟ್ ನೋಟಿಫಿಕೇಶನ್ನಲ್ಲಿ ಉಲ್ಲೇಖಿಸಲಾದ ಜಾಗವನ್ನು ಹೊರತುಪಡಿಸಿ ಬೇರೆ ಕಡೆ ಟವರ್ ನಿರ್ಮಿಸಲಾಗಿದೆ. ರೈತರನ್ನು ಕತ್ತಲಲ್ಲಿಟ್ಟು ಅವರ ಬದುಕು ನಾಶ ಮಾಡುವ ಯತ್ನ ನಡೆಯುತ್ತಿದೆ. ಈ ಬಗ್ಗೆ ಹೆಚ್ಚಿನ ಜನಪ್ರತಿನಿಧಿಗಳು ಕೂಡ ಮೌನವಾಗಿದ್ದಾರೆ. ವಿಮಾನ ನಿಲ್ದಾಣ ಪ್ರಾಧಿಕಾರಕ್ಕೂ ತಪ್ಪು ಮಾಹಿತಿ ನೀಡಿ ನಿಷೇಧಿತ ವಲಯದಲ್ಲಿ ಟವರ್ ಅಳವಡಿಸುವ ಪ್ರಯತ್ನ ನಡೆಯುತ್ತಿದೆ. ಜ.17ರಂದು ಮಂಗಳೂರಿಗೆ ಮುಖ್ಯಮಂತ್ರಿಯವರು ಆಗಮಿಸುವ ಸಂದರ್ಭದಲ್ಲಿ ರೈತರು ಈ ಬಗ್ಗೆ ಹಕ್ಕೊತ್ತಾಯ ಸಲ್ಲಿಸಲಿದ್ದಾರೆ ಎಂದವರು ಹೇಳಿದರು.
