ಮಂಗಳೂರು ಅಬಕಾರಿ ಇಲಾಖೆ ದಾಳಿ 1.64 ಲಕ್ಷ ರೂ. ಮೌಲ್ಯದ ಅಕ್ರಮ ಮದ್ಯ ದಾಸ್ತಾನು ಪತ್ತೆ

ಮಂಗಳೂರು: ನಗರದ ಕೊಡಿಯಾಲಬೈಲ್ ಕಂಬಳಕ್ರಾಸ್‌ನ ಕಟ್ಟಡವೊಂದರ ಮೊದಲನೇ ಮಹಡಿಗೆ ಶುಕ್ರವಾರ ಮಧ್ಯರಾತ್ರಿ ಅಬಕಾರಿ ಇಲಾಖೆಯವರು ದಾಳಿ ನಡೆಸಿ 1.64 ಲ.ರೂ. ಮೌಲ್ಯದ ಮದ್ಯವನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.

ಕರ್ನಾಟಕ ಅಬಕಾರಿ ಕಾಯಿದೆ 1965ಕ್ಕೆ ವಿರುದ್ಧವಾಗಿ ಮಾರಾಟ ಮಾಡುವ ಉದ್ದೇಶದಿಂದ ಸಂಗ್ರಹಿಸಿಡಲಾಗಿದ್ದ 19.5 ಲೀ. ಡಿಫೆನ್ಸ್ ಮದ್ಯ, 52.5 ಲೀ. ಗೋವಾ ರಾಜ್ಯದ ಮದ್ಯ, 3 ಲೀ. ಕರ್ನಾಟಕ ರಾಜ್ಯದ ಮದ್ಯ, 3 ಲೀ. ತೆರಿಗೆ ರಹಿತ ವಿದೇಶ ಮದ್ಯ, 21.5 ಲೀ. ಗೋವಾ ರಾಜ್ಯದ ಬಿಯರ್, 0.33 ಲೀ. ಕರ್ನಾಟಕ ರಾಜ್ಯದ ಬಿಯರ್ 1.300 ಲೀ. ಡಿಫೆನ್ಸ್ ಬಿಯರ್ ಸೇರಿದಂತೆ ಒಟ್ಟು 101.30 ಲೀ. ಮದ್ಯವನ್ನು ವಶಪಡಿಸಿಕೊಂಡು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಆರೋಪಿ ಅಮೀತ್ ಎ.ಪಿ. ತಲೆಮರೆಸಿಕೊಂಡಿದ್ದಾನೆ.

ಮಂಗಳೂರು ವಿಭಾಗ ಅಬಕಾರಿ ಜಂಟಿ ಆಯುಕ್ತ ಡಾ.ಸಿ.ಎಚ್.ಬಾಲಕೃಷ್ಣ ಅವರ ಆದೇಶದಂತೆ, ದ.ಕ ಜಿಲ್ಲಾ ಉಪ ಆಯುಕ್ತ ಟಿ.ಎಂ.ಶ್ರೀನಿವಾಸ ಅವರ ನಿರ್ದೇಶನದಂತೆ, ಮಂಗಳೂರು ಉಪವಿಭಾಗದ ಅಬಕಾರಿ ಉಪ ಅಧೀಕ್ಷಕ ಸಂತೋಷ ಮೊಡಗಿ ಅವರ ನೇತೃತ್ವದಲ್ಲಿ ದಾಳಿ ನಡೆಯಿತು. ಅಬಕಾರಿ ನಿರೀಕ್ಷಕಿ ಸುನಿತಾ, ಉಪನಿರೀಕ್ಷಕ ಸುಧೀರ್ ಎ, ಹಿರಿಯ ಪೇದೆ ಸಂದೀಪ್ ಕುಮಾರ್ ಎ, ಅಬಕಾರಿ ಪೇದೆಯವರಾದ ಮಾರುತಿ ಡಿ.ಜೆ, ನವೀನ್ ನಾಯ್ಕ ಬಿ, ಹಿರಿಯ ವಾಹನ ಚಾಲಕ ರಘುರಾಮ, ಕೊಡಿಯಾಲಬೈಲ್ ಗ್ರಾಮದ ಪ್ರಭಾರ ಗ್ರಾಮ ಆಡಳಿತಾಧಿಕಾರಿ ಪ್ರದೀಪ್ ಶೆಣೈ ದಾಳಿಯಲ್ಲಿ ಪಾಲ್ಗೊಂಡಿದ್ದರು.

ಇತ್ತೀಚೆಗೆ ಕಾರ್ಕಳ ತಾಲೂಕಿನ ಬೋಳ ಗ್ರಾಮದ ಅಬ್ಯನಡ್ಕದಲ್ಲಿ ಪತ್ತೆಯಾದ ಅಕ್ರಮ ಮದ್ಯ ದಾಸ್ತಾನು ಪ್ರಕರಣಕ್ಕೂ ಈ ಪ್ರಕರಣಕ್ಕೂ ಸಂಬಂಧವಿರುವುದು ಮೇಲ್ನೋಟಕ್ಕೆ ತಿಳಿದುಬಂದಿದೆ. ಇದೊಂದು ಅಂತರ್‌ಜಿಲ್ಲಾ ಹಾಗೂ ಅಂತರ್‌ರಾಜ್ಯ ಮಟ್ಟದ ಜಾಲವಾಗಿದೆ ಎಂದು ಅಬಕಾರಿ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.