ಇಂಗ್ಲೆಂಡ್‌ನಿಂದ ಫ್ರಾನ್ಸ್‌ಗೆ 'ಇಂಗ್ಲಿಷ್ ಚಾನೆಲ್' ಈಜಿದ ಮಂಗಳೂರಿನ ವೈದ್ಯ

ಮಂಗಳೂರು: ಪುತ್ರನಿಗೆ ಈಜು ಕಲಿಸುವ ಆಸಕ್ತಿಯೊಂದಿಗೆ 40ರ ಹರಯದಲ್ಲಿ ಈಜು ಕಲಿತ ಮಂಗಳೂರಿನ ಆಂಕಾಲಜಿ ವೈದ್ಯರೊಬ್ಬರು ಇಂಗ್ಲೆಂಡ್‌ನಿಂದ ಫ್ರಾನ್ಸ್‌ಗೆ ಇಂಗ್ಲಿಷ್ ಚಾನೆಲ್ (ಸಮುದ್ರ) ಮೂಲಕ ಈಜಿ ಸಾಧನೆ ಮಾಡಿದ್ದಾರೆ.

ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆಗೈದಿರುವ ಮಂಗಳೂರಿನ ಕಣಚೂರು ಆಸ್ಪತ್ರೆಯ ಆಂಕಾಲಜಿ ವೈದ್ಯರಾದ ಡಾ. ಗುರುಪ್ರಸಾದ್ ಅವರು ಸೋಮವಾರ ತಮ್ಮ ಅನುಭವವನ್ನು ಸುದ್ದಿಗೋಷ್ಠಿಯಲ್ಲಿ ಹಂಚಿಕೊಂಡರು.

ಎವರೆಸ್ಟ್ ಪರ್ವತವನ್ನು ಹತ್ತುವುದು ಅದೆಷ್ಟು ಕ್ಲಿಷ್ಟಕರವೋ ಪೆಸಿಫಿಕ್ ಓಷಿಯನ್‌ನಿಂದ ಅಟ್ಲಾಂಟಿಕ್ ಸಾಗರದ ಇಂಗ್ಲಿಷ್ ಚಾನೆಲ್‌ವರೆಗೆ ಸಮುದ್ರವನ್ನು ಈಜುವುದೂ ಅಷ್ಟೇ ದುರ್ಗಮ. ಸಮುದ್ರದ ಉಪ್ಪು ನೀರು, ಅನಿರೀಕ್ಷಿತ ಹವಾಮಾನ, ಈಜುವುದರ ಜೊತೆಗೆ ದೈತ್ಯಾಕಾರದ ಅಲೆಗಳೊಂದಿಗೆ ತೇಲುವ ಕಲೆಯನ್ನು ಅರಗಿಸಿಕೊಂಡವರಿಗೆ ಇಂಗ್ಲಿಷ್ ಚಾನೆಲ್‌ನಂತಹ ಸಮುದ್ರವನ್ನು ಈಜಲು ಸಾಧ್ಯವಾಗುತ್ತದೆ. ಚಾನೆಲ್ ಸ್ವಿಮ್ಮಿಂಗ್ ಅಸೋಸಿಯೇಷನ್ ವತಿಯಿಂದ ಜು. 3ರಂದು ಬೆಳಗ್ಗೆ 1.30ಕ್ಕೆ ಆರು ಭಾರತೀಯ ಈಜುಗಾರರು 13 ಗಂಟೆಗಳ ಕಾಲ ಇಂಗ್ಲೆಂಡ್‌ನಿಂದ ಫ್ರಾನ್ಸ್‌ಗೆ ಇಂಗ್ಲಿಷ್ ಚಾನೆಲ್ ಸಮುದ್ರದಲ್ಲಿ ಈಜುವ ಕಾರ್ಯವನ್ನು ದಾಖಲಿಸಿದ್ದೇವೆ. ಆರು ಮಂದಿಯಲ್ಲಿ ನಾನೂ ಕೂಡ ಒಬ್ಬ. ಇಂಗ್ಲಿಷ್ ಚಾನೆಲ್ ಈಜು ರಿಲೇಯಲ್ಲಿ ಭಾಗವಹಿಸಿದ ಮೊದಲ ಮಂಗಳೂರಿಗೆ ಎನ್ನುವ ಖ್ಯಾತಿ ನನಗೆ ಲಭಿಸಿದೆ ಎಂದರು.

ತಂಡದಲ್ಲಿ 14 ವರ್ಷದ ಅರ್ನವ್ ಜೇರಾ ಕಿರಿಯ ಸದಸ್ಯರಾಗಿದ್ದು 16 ವರ್ಷದ ದಿವ್ಯಾ ಹಿತೇಂದ್ರ ಮಹಾಜನ್ ಈಗಾಗಲೇ ಏಕವ್ಯಕ್ತಿ ಕ್ಯಾಟಲಿನಾ ಚಾನೆಲ್ ಈಜನ್ನು ಪೂರ್ತಿಗೊಳಿಸಿದವರು. 45 ವರ್ಷದ ರಘುನಂದನ್ ಗಂಗಪ್ಪ, ದೀಪಿಕಾ ರಾಣಿ, ಅಂಕಿತಾ ಕೊನ್ವರ್ ಅವರಿದ್ದು, ಈಜುವಿಕೆಯಲ್ಲಿನ ಪ್ರತಿಯೊಬ್ಬರ ಅನುಭವ, ವಿಶೇಷತೆಗಳು ನನಗೆ ವಿಶೇಷ ಸ್ಫೂರ್ತಿಯನ್ನು ನೀಡಿದೆ ಎಂದರು.

ತೆರೆದ ಸಮುದ್ರದಲ್ಲಿ ಈಜುವುದು ಸುಲಭದ ಮಾತಲ್ಲ. ಆದರೆ ಇದೊಂದು ಸಾಹಸಮಯ ಹಾಗೂ ಹೊಸ ಅನುಭವಗಳನ್ನು ನೀಡುವ ಕಾರ್ಯ. ಈಜುವುದು ಕೇವಲ ಈಜುಕೊಳಕ್ಕೆ ಸೀಮಿತವಾಗುವ ಬದಲು ಈ ರೀತಿಯ ಸಮುದ್ರ, ಸಾಗರಗಳಲ್ಲಿ ಈಜುವುದಕ್ಕೂ ತೆರೆದುಕೊಳ್ಳಬೇಕಿದೆ ಎಂದವರು ಅಭಿಪ್ರಾಯಪಟ್ಟರು.

ಈಜು ತರಬೇತುದಾರ ಸಂಕೇತ್ ಬೆಂಗ್ರೆ ಸುದ್ದಿಗೋಷ್ಠಿಯಲ್ಲಿದ್ದರು.