ರೈಲು ಹಳಿ ದ್ವಿಗುಣಕ್ಕೆ ಪಶ್ಚಿಮಘಟ್ಟ ಸವಾಲು; ಮಂಗಳೂರು- ರಾಜಧಾನಿ ಸುಲಭ ಸಂಪರ್ಕಕ್ಕೆ ಸರ್ವೇ

• ಪ್ರಕಾಶ್ ಮಂಜೇಶ್ವರ ಮಂಗಳೂರು

ಕೇಂದ್ರದಲ್ಲಿ ಹೊಸ ಸರ್ಕಾರ ಸ್ಥಾಪನೆಯಾಗುವ ಹೊತ್ತಿಗೆ ಮಂಗಳೂರು ಮತ್ತು ರಾಜ್ಯ ರಾಜಧಾನಿ ಬೆಂಗಳೂರು ನಡುವೆ ರೈಲು ಹಳಿ ದ್ವಿಗುಣಗೊಳಿಸುವ ಯೋಜನೆ ಮತ್ತೆ ಚರ್ಚೆಗೆ ಬಂದಿದೆ.
ಈ ಮಾರ್ಗ ಹಾದುಹೋಗುವ ಪಶ್ಚಿಮ ಘಟ್ಟದ ಸಾಲಿನಲ್ಲಿ ಹಳಿ ದ್ವಿಗುಣ ಕಾಮಗಾರಿ ನಡೆಸಲು ಕೇಂದ್ರ ಸರ್ಕಾರದ ಅನುಮತಿ ಬೇಕು. ಪರಿಸರ ಸೂಕ್ಷ್ಮ ಹಾಗೂ ಅಪರೂಪದ ಜೀವ ವೈವಿಧ್ಯವನ್ನು ಒಳಗೊಂಡಿರುವ ಈ ಪ್ರದೇಶದಲ್ಲಿ ಹಳಿ ದ್ವಿಗುಣ ಕಾಮಗಾರಿಗೆ ಅರಣ್ಯ ಇಲಾಖೆ ಶಿಫಾರಸು ಮಾಡುವುದು ಕಷ್ಟ. ಪ್ರಭಾವ ಬೀರಿ ಶಿಫಾರಸು ಮಾಡಿದರೂ, ಪರಿಸರವಾದಿಗಳು ನ್ಯಾಯಾಲಯದ ಮೆಟ್ಟಿಲು ಹತ್ತಿದರೆ ಯೋಜನೆ ಕೈಬಿಡುವ ಪ್ರಸಂಗ ಎದುರಾಗುವ ಸಾಧ್ಯತೆಯೇ ಹೆಚ್ಚು ಎನ್ನುವುದು ಇಲಾಖೆ ತಜ್ಞರ ಅಭಿಪ್ರಾಯ.

• ಪರಿಹಾರ ಏನು?: ಜಮ್ಮು ಕಾಶ್ಮೀರದಲ್ಲಿ ಚಿನಾಬ್ ನದಿಗೆ ಅಡ್ಡಲಾಗಿ ನಿರ್ಮಿಸಿದ ಸೇತುವೆ ಮಾದರಿ ಸುಬ್ರಹ್ಮಣ್ಯ ರೋಡ್ ಮತ್ತು ಸಕಲೇಶಪುರ ನಡುವಿನ ಪಶ್ಚಿಮ ಘಟ್ಟದ ಕಣಿವೆಗಳನ್ನು ಎತ್ತರದ ಸೇತುವೆ ಮೂಲಕ ಜೋಡಿಸುವುದರಿಂದ ಒಂದು ಐತಿಹಾಸಿಕ ಯೋಜನೆ ರೂಪುಗೊಳ್ಳಬಹುದು ಎನ್ನುತ್ತಾರೆ ರೈಲ್ವೆ ಇಲಾಖೆಯ ಹಿರಿಯ ಪರಿಣಿತರು. ಪ್ರಸ್ತುತ ಸುತ್ತು ಬಳಸಿ ಸಾಗುವ ರೈಲು ಮಾರ್ಗದ ಬದಲು ಕಡಿಮೆ ದೂರದ ಈ ಎತ್ತರದ ನೇರ ಸೇತುವೆ ನಿರ್ಮಾಣದಿಂದ ಹೈಸ್ಪೀಡ್ ರೈಲುಗಳ ಓಡಾಟ ಹಾಗೂ ಹತ್ತಿರದ ಮಾರ್ಗ ಲಭ್ಯ ವಾಗಲಿದೆ. ಸುಬ್ರಹ್ಮಣ್ಯ ರೋಡ್ ನಿಲ್ದಾಣದಿಂದ ಸಕಲೇಶಪುರ ತನಕ ಪ್ರಸ್ತುತ 55 ಕಿ.ಮೀ ರೈಲು ಹಳಿ ದೂರವಿದ್ದು, ನೇರ ಸೇತುವೆ ನಿರ್ಮಿಸಿದರೆ ಈ ಮಾರ್ಗವನ್ನು 30 ಕಿ.ಮೀ ನಲ್ಲಿ ತಲುಪಬಹುದು ಎನ್ನುತ್ತಾರೆ ಈ ಅಧಿಕಾರಿ.
• ಪ್ರಗತಿಯಲ್ಲಿ ಸಮೀಕ್ಷೆ
• ಸೇತುವೆ ನಿರ್ಮಿಸುವುದರಿಂದ ಸುಬ್ರಹ್ಮಣ್ಯ ರೋಡ್ ನಿಲ್ದಾಣದಿಂದ ಸಕಲೇಶಪುರಕ್ಕೆ ಈ ಮಾರ್ಗದ ಪ್ರಧಾನ ಭಾಗ ಮಂಗಳೂರು- ಹಾಸನ ಹಳಿ ದ್ವಿಗುಣ ಕಾಮಗಾರಿ ಸಾಧ್ಯತೆ ಕುರಿತು ಸರ್ವೇ ಪ್ರಗತಿಯಲ್ಲಿದೆ. ಇಂಜಿನಿಯರಿಂಗ್ ಹಾಗೂ ಪ್ರಯಾಣಿಕರ ದಟ್ಟಣೆ ಸಂಬಂಧಿಸಿ ಸರ್ವೇ ಲಕ್ಷೃ ವಹಿಸಿದೆ. ಸರ್ವೇ ವರದಿಯಲ್ಲಿ ಪರಿಣಿತರ ತಂಡ ಯಾವೆಲ್ಲ ಅಂಶಗಳನ್ನು ಮುಂದಿಡುತ್ತದೆ? ಎನ್ನುವುದು ಕೂಡ ಯೋಜನೆ ಅನುಷ್ಠಾನ ಪ್ರಕ್ರಿಯೆಯಲ್ಲಿ ಮುಖ್ಯ.
• ಮಂಗಳೂರು-ಬೆಂಗಳೂರು ನಡುವೆ ರೈಲು ಸಂಚಾರಕ್ಕೆ 8 ಗಂಟೆ ಬೇಕಿರುವುದು ದೌರ್ಭಾಗ್ಯ. ಪರಿಸರ ಸಂರಕ್ಷಣೆ ಗಮನದಲ್ಲಿರಿಸಿ, ತಾಂತ್ರಿಕ ಪರಿಣತಿ ಬಳಸಿ ಮಂಗಳೂರು-ಬೆಂಗಳೂರು ಮಧ್ಯೆ ಕಡಿಮೆ ಅವಧಿಯಲ್ಲಿ ತಲುಪುವ ಹತ್ತಿರದ ಹೊಸ ರೈಲ್ವೆ ಲೈನ್ ಆಗಬೇಕು. ಇದರಿಂದ ಸರಕು ಸಾಗಾಟ-ಪ್ರಯಾಣಿಕರಿಗೆ ಅನುಕೂಲ. ರಾಜಧಾನಿಗೆ ಹೈಸ್ಪೀಡ್ ರೈಲು ಆರಂಭಿಸುವುದು ಇಂದಿನ ಅನಿವಾರ್ಯತೆ.
• ಕ್ಯಾ.ಬ್ರಿಜೇಶ್ ಚೌಟ,
• ಸಂಸದರು, ದಕ್ಷಿಣ ಕನ್ನಡ
• ---------------

ರೈಲು ಹಳಿ ದ್ವಿಗುಣದಿಂದ ಮಂಗಳೂರು-ಬೆಂಗಳೂರು ನಡುವೆ ಹೈಸ್ಪೀಡ್ ರೈಲುಗಳ ಓಡಾಟ ಕನಸು ನನಸಾಗಲಿದೆ. ಪೂರ್ವ ಕರಾವಳಿ (ಚೆನ್ನೈ) ಮತ್ತು ಪಶ್ಚಿಮ ಕರಾವಳಿ(ಮಂಗಳೂರು) ಸಮೀಪವಾಗಲಿದೆ. ರಸ್ತೆ ಮಾರ್ಗದ ಒತ್ತಡ ಕಡಿಮೆಯಾಗಲಿದೆ. ಪಶ್ಚಿಮ ಘಟ್ಟದ ದಾರಿಯಲ್ಲಿ ಪ್ರಸ್ತುತ ಗಂಟೆಗೆ 40 ಕಿ.ಮೀ.ವೇಗ ನಿಗದಿಪಡಿಸಲಾಗಿದ್ದು, ರೈಲುಗಳು ಸುರಕ್ಷತೆ ದೃಷ್ಟಿಯಿಂದ 30 ಕಿ.ಮೀ ವೇಗದಲ್ಲಿ ಮಾತ್ರ ಸಂಚರಿಸುತ್ತಿವೆ. ಪರ್ಯಾಯ ಮಾರ್ಗ ರೂಪಿಸಿದರೆ ಅನುಕೂಲ.
ಅನಿಲ್ ಹೆಗ್ಡೆ,
ತಾಂತ್ರಿಕ ಸಲಹೆಗಾರರು, ಪಶ್ಚಿಮ ಕರಾವಳಿ ರೈಲ್ವೆ ಯಾತ್ರಿ ಸಂಘ