ಬಿಳಿ ಮಣ್ಣಿನಿಂದ ಬೆಳತೂರು

ಗ್ರಾಮದಲ್ಲಿ ಒಕ್ಕಲಿಗರು, ಲಿಂಗಾಯತರು ಸೇರಿದಂತೆ ಹಲವು ಸಮುದಾಯದವರು ಗ್ರಾಮಕ್ಕೆ ಬಂದು ನೆಲೆಯೂರಿದರು ಎಂಬುದು ಈಗ ಇತಿಹಾಸ. ಭತ್ತ, ರಾಗಿ, ಕಬ್ಬು, ರೇಷ್ಮೆ ಬೆಳೆ ಬೆಳೆಯಲಾಗುತ್ತಿದ್ದು, ಬಹುತೇಕ ಮನೆಗಳಲ್ಲಿ ಹಸುಗಳನ್ನು ಸಾಕುವ ಮೂಲಕ ನೆಮ್ಮದಿ ಜೀವನ ನಡೆಸುತ್ತಿದ್ದಾರೆ.

ಗ್ರಾಮದಲ್ಲಿ ಎಲ್ಲ ವರ್ಗದವರು ಶಾಂತಿ-ಸೌಹಾರ್ದತೆಯಿಂದ ಜೀವನ ನಡೆಸುತ್ತಿರುವುದರಿಂದ ಗ್ರಾಮ ಸರ್ವಜನಾಂಗ ಶಾಂತಿ ತೋಟದಂತಿದೆ.

ಗ್ರಾಮದಲ್ಲಿನ ಪ್ರಮುಖ ಆಕರ್ಷಣೆ ಬೆಳತೂರು ಕೆರೆ. ಇದು ಸುಮಾರು 120 ಎಕರೆಯಷ್ಟು ವಿಸ್ತೀರ್ಣ ಹೊಂದಿದ್ದು, 200 ಎಕರೆ ಅಚ್ಚುಕಟ್ಟೆ ಪ್ರದೇಶಕ್ಕೆ ನೀರುಣಿಸುತ್ತಿದೆ ಎಂಬುದು ವಿಶೇಷ. ಜತೆಗೆ ಜನರ ದೈನಂದಿನ ಕೆಲಸಕ್ಕೂ ಅನುಕೂಲವಾಗುತ್ತಿದೆ. ಗ್ರಾಮದಲ್ಲಿ ಹಾಲು ಉತ್ಪಾದಕರ ಸಹಕಾರ ಸಂಘ, ವ್ಯವಸಾಯ ಸೇವಾ ಸಹಕಾರ ಸಂಘ, ಅಂಗನವಾಡಿ, ನ್ಯಾಯ ಬೆಲೆ, ಉಪ ಅಂಚೆ ಕಚೇರಿ, ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆ ಇದೆ. ಇನ್ನು ಗ್ರಾಮದಲ್ಲಿ ಪುರಾತನವಾದ ಸೋಮೇಶ್ವರ, ಆಂಜನೇಯಸ್ವಾಮಿ, ಪಟ್ಟಲದಮ್ಮ, ಚಾಮುಂಡೇಶ್ವರಿ, ಮಾರಮ್ಮ, ಮುನೇಶ್ವರ, ಹಳೆವೂರಮ್ಮ ದೇವಾಲಯ ಸೇರಿದಂತೆ ವಿವಿಧ ದೇವಾಲಯಗಳಿವೆ. ಗ್ರಾಮದ ಕೆರೆ ದಂಡದಲ್ಲಿರುವ ಸೋಮಶೇಶ್ವರ ದೇಗುಲ ಪ್ರಕೃತಿ ಪ್ರಿಯರನ್ನು ಕೈ ಬೀಸಿ ಕೆರೆಯುತ್ತಿದ್ದು, ಈ ದೇಗುದಲ್ಲಿರುವ ಲಿಂಗ ಅತ್ಯಂತ ವಿಶೇಷ ಎಂದು ಹೇಳಲಾಗುತ್ತಿದೆ.

ಸೋಮೇಶ್ವರ ದೇಗುಲದಲ್ಲಿ ಪ್ರತಿ ವರ್ಷ ಪರ ಹಮ್ಮಿಕೊಳ್ಳುವ ಮೂಲಕ ಸಹಸ್ರಾರು ಭಕ್ತರಿಗೆ ಅನ್ನಸಂತರ್ಪಣೆ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗುತ್ತದೆ. ಇನ್ನು ಚಾಮುಂಡೇಶ್ವರಿ ದೇಗುದಲ್ಲಿ ಪ್ರತಿ ವರ್ಷ ತಂಬಿಟ್ಟಿನಾರತಿ ಹಾಗೂ ವಿಶೇಷ ಪೂಜೆ, ಆಂಜನೇಯ ದೇಗುದಲ್ಲಿ ಪ್ರತಿ ವರ್ಷ ಹನುಮ ಜಯಂತಿ ಹಾಗೂ ಶ್ರೀರಾಮಜಯಂತಿ ಅಂಗವಾಗಿ ಗ್ರಾಮಸ್ಥರಿಂದ ಭಕ್ತರಿಗೆ ಮಜ್ಜಿಗೆ, ಪಾನಕ, ಹೆಸರು ಬೆಳೆ ವಿತರಣೆ ಮಾಡಲಾಗುತ್ತದೆ. ಸುಮಾರು 8 ರಿಂದ 10 ವರ್ಷಕ್ಕೆ ಒಂದು ಬಾರಿ ಪಟ್ಟಲದಮ್ಮ ದೇವಿಯ ಜಾತ್ರಾ ಮಹೋತ್ಸವ ನಡೆಯುತ್ತದೆ. ಗ್ರಾಮದಿಂದ ಮದುವೆಯಾಗಿ ಬೇರೆಡೆಗೆ ತೆರಳಿದ ಹೆಣ್ಣು ಮಕ್ಕಳು ಹಾಗೂ ನಂಟರು ಹಬ್ಬಕ್ಕೆ ಬರುವುದು ವಿಶೇಷ. ಜತೆಗೆ ಹಳೆವೂರಮ್ಮ ದೇಗುದಲ್ಲಿ ಪ್ರತಿ ವರ್ಷ ಬೆಳ್ಳಿಗಿಂಡಿ ಮಹೋತ್ಸವ ನಡೆಯಲಿದೆ.

ಗ್ರಾಮದಲ್ಲಿ ಹಲವಾರು ವರ್ಷಗಳ ಹಿಂದೆ ವಿಶೇಷ ದಿನಗಳಂದು ಪೌರಾಣಿಕ ಹಾಗೂ ಸಾಮಾಜಿಕ ನಾಟಕಗಳು ಹೆಚ್ಚಿನ ಪ್ರಮಾಣದಲ್ಲಿ ಪ್ರದರ್ಶನಗೊಳ್ಳುತ್ತಿತ್ತು. ಮಂಡ್ಯ, ಮೈಸೂರು, ಬೆಂಗಳೂರು ಸೇರಿದಂತೆ ವಿವಿಧ ಭಾಗಗಳಲ್ಲಿ ಪೌರಾಣಿಕ ಹಾಗೂ ಸಾಮಾಜಿಕ ನಾಟಕಗಳನ್ನು ಆಡುವ ಮೂಲಕ ಗಮನ ಸೆಳೆದಿದ್ದಾರೆ. ಈಗಲೂ ವಿಶೇಷ ದಿನಗಳಲ್ಲಿ ಗ್ರಾಮದಲ್ಲಿ ಪೌರಾಣಿಕ ಹಾಗೂ ಸಾಮಾಜಿಕ ನಾಟಕಗಳು ಪ್ರದರ್ಶನಗೊಳ್ಳಲಿದೆೆ.

ಗ್ರಾಮದಲ್ಲಿ ಕೆಲವು ಸಾಹಿತಿಗಳು ಕೂಡ ಹಲವಾರು ಪುಸ್ತಕಗಳನ್ನು ಬರೆಯುವ ಮೂಲಕ ಗಮನ ಸೆಳೆದಿದ್ದಾರೆ. ಜತೆಗೆ ಹಲವಾರು ವಿದ್ಯಾರ್ಥಿಗಳು ಜಿಲ್ಲಾ ಹಾಗೂ ರಾಜ್ಯ ಮಟ್ಟದ ಕ್ರೀಡೆಗಳಲ್ಲಿ ಭಾಗವಹಿಸಿ ಬಹುಮಾನ ಪಡೆದು ಗಮನ ಸೆಳೆದಿದ್ದಾರೆ. ಗ್ರಾಮದಲ್ಲಿ ನಾಲ್ಕು ದಿಕ್ಕುಗಳ ಗಡಿಯಲ್ಲಿ ವೀರಗಲ್ಲು, ಮಾಸ್ತಿಗಳಿದ್ದು ಇರುವುದು ವಿಶೇಷ. ಅದರಲ್ಲೂ ಗ್ರಾಮದ ಆಂಜನೇಸ್ವಾಮಿ ದೇಗುಲದಲ್ಲಿ ವೀರಗಲ್ಲು ಹಾಗೂ ಮಾಸ್ತಿಗಳನ್ನು ಗ್ರಾಮಸ್ಥರು ಸಂರಕ್ಷಣೆ ಮಾಡಿದ್ದಾರೆ.

ಗ್ರಾಮದ ಇತಿಹಾಸ

ಕ್ರಿಸ್ತಶಕ 950ರ ಆತಗೂರು ಶಾಸನ ಪ್ರಖ್ಯಾತಿಯಾಗಿದ್ದು, ಪ್ರೀತಿಪಾತ್ರ ಪ್ರಾಣಿಗಳ ನೆನಪಿಗಾಗಿ ಹಾಕಿಸಿದ ಅಪರೂಪದ ಶಾಸನಗಳಲ್ಲಿ ಇದೂ ಒಂದಾಗಿದೆ. ಗಂಗವಂಶದ ಇಮ್ಮಡಿ ಬೂತಗನ ಕೈ ಕೆಳಗೆ ಅಧಿಕಾರಿಯಾಗಿದ್ದ ಸಗರವಂಶದ ಮಣಲೆರ ಎಂಬಾತ ಚೋಳರ ವಿರುದ್ಧ ಹೂಡಿದ ತಕ್ಕೋಲದ ಸಮರದಲ್ಲಿ ಸಾಹಸದಿಂದ ಹೋರಾಡಿದ್ದಕ್ಕಾಗಿ ಅರಸು ಕೃಷ್ಣರಾಜನಿಂದ ಬಳುವಳಿಯಾಗಿ ಕಾಳಿ ಎಂಬ ಹೆಸರಿನ ಬೇಟೆನಾಯಿಯೊಂದನ್ನು ಮಣಲೆರ ಬೇಡಿ ಪಡೆದನೆಂಬ ಸಂಗತಿಯನ್ನು ಶಾಸನ ತಿಳಿಸುತ್ತದೆ.

ಮುಂದೊಮ್ಮೆ ಮಣಲೆರನು ಬೆಳತೂರು ಎಂಬಲ್ಲಿ ಬಲಿಷ್ಠ ಕಾಡು ಹಂದಿಯೊಂದಿಗೆ ಬೇಟೆಯಾಡುವ ಸಂದರ್ಭದಲ್ಲಿ ಕಾಳಿ ಎಂಬ ನಾಯಿ ಹಂದಿಯೊಂದಿಗೆ ಪ್ರಾಣ ಕಳೆದುಕೊಳ್ಳುತ್ತದೆ. ಸ್ವಾಮಿ ನಿಷ್ಠೆ ತೋರಿದ ನಾಯಿಗಾಗಿ ಅದರ ಒಡೆಯ ಮಣಲೆರನು ದತ್ತಿಬಿಟ್ಟ ಶಾಸನದ ಕಲ್ಲೊಂದನ್ನು ಆತಗೂರು ಗ್ರಾಮದ ಚಲ್ಲೇಶ್ವರ ದೇವಸ್ಥಾನ ಮುಂದೆ ಹಾಕಿಸಿದ ಎಂಬ ಬಗ್ಗೆ ಉಲ್ಲೇಖ ಇದೆ.

ಬೆಳತೂರು ಗ್ರಾಮದಲ್ಲಿ ಹೆಚ್ಚಾಗಿ ಮಣ್ಣು ಬಿಳಿಯಾದ ಹಾಗೂ ವಿವಿಧ ಬೆಳೆಗಳನ್ನು ಬೆಳೆಯುತ್ತಿದ್ದ ಕಾರಣ ಬೆಳೆತೂರು ಎಂಬ ಹೆಸರು ಬಂತು ಎಂದು ತಿಳಿದು ಬಂದಿದೆ.