ಮೇಲುಕೋಟೆಯಲ್ಲಿ ವೈರಮುಡಿ ಬ್ರಹ್ಮೋತ್ಸವ ಆರಂಭ

ವೈರಮುಡಿ ಬ್ರಹ್ಮೋತ್ಸವ 9 ದಿನಗಳ ಕಾಲ ನಡೆಯಲಿದ್ದು, ಏ.2 ರಂದು ತೀರ್ಥಸ್ನಾನ ಮತ್ತು ಪಟ್ಟಾಭಿಷೇಕ ಮಹೋತ್ಸವದೊಂದಿಗೆ ಮುಕ್ತಾಯವಾಗಲಿದೆ. ಸ್ವಾಮಿ ಸನ್ನಿಧಿಯ ಅರ್ಚಕ ವರದರಾಜ ಭಟ್ ಸ್ವಯಂ ಆಗಮೋಕ್ತವಾಗಿ ಪಂಚಾಯುಧದೊಂದಿಗೆ ಚಿತ್ರಿಸಿದ ಗರುಡದೇವನ ಭಾವಚಿತ್ರವನ್ನು ಚಿನ್ನದ ಧ್ವಜಸ್ತಂಭದ ಮೇಲೆ ಆರೋಹಣ ಮಾಡಲಾಯಿತು. ಬ್ರಹ್ಮೋತ್ಸವಕ್ಕೆ ಗರುಡದೇವ ದೇವಾನುದೇವತೆಗಳು ಹಾಗೂ ಭಕ್ತರನ್ನು ಚೆಲುವನಾರಾಯಣಸ್ವಾಮಿ ಕೃಪೆಗೆ ಪಾತ್ರರಾಗಬೇಕೆಂದು ಆಹ್ವಾನಿಸುತ್ತಾನೆಂಬ ನಂಬಿಕೆಯಿದೆ.

ಎಸ್‌ಎನ್‌ಐ ಸಾಂಸ್ಕೃತಿಕ ವೇದಿಕೆಯ 11ನೇ ವರ್ಷದ ನಾದೋಪಾಸನ ಸೇವೆಯಲ್ಲಿ ಕಲಾವಿದರಾದ ಪ್ರಮೋದ್, ಪದ್ಮನಾಭ ಸುಬ್ಬಣ್ಣ ಸುಶ್ರಾವ್ಯವಾಗಿ ಸ್ಯಾಕ್ಸೋಫೋನ್ ನುಡಿಸಿದರೆ ಕುಮಾರ್ ಮತ್ತು ಸಂಜಯ್ ಡೋಲು ನುಡಿಸಿ ಸಹಕಾರ ನೀಡಿದರು. ಮೀನ-ಚೈತ್ರಮಾಸದ ಹಸ್ತನಕ್ಷತ್ರದ ದಿನ ಪ್ರಮುಖವಾದ ಚೆಲ್ವ ತಿರುನಾರಾಯಣಸ್ವಾಮಿ ಭೂಲೋಕಕ್ಕೆ ಅವಿರ್ಭವಿಸಿದ ದಿನ ಏ.2 ರಂದು ಜಯಂತ್ಯುತ್ಸವ ನೆರವೇರುತ್ತದೆ. ಅಂದೇ ಕಲ್ಯಾಣಿಯಲ್ಲಿ ತೀರ್ಥಸ್ನಾನ, ಪಟ್ಟಾಭಿಷೇಕ ಮಹೋತ್ಸವ ಸ್ಥಾನಾಚಾರ್ಯರಿಗೆ ಮಾಲೆ ಮರ್ಯಾದೆ ನಡೆಯಲಿದೆ.