ಇಂದಿನ ಪರಿಸ್ಥಿತಿಗೆ ವಚನಗಳು ದಾರಿದೀಪ: ಹಿರಿಯ ವಕೀಲ ಎಚ್.ಬಸವಯ್ಯ ಅಭಿಮತ

ನಗರದ ಹೊಳಲು ರಸ್ತೆಯಲ್ಲಿರುವ ಡಿ.ದೇವರಾಜ ಅರಸು ಹಿಂದುಳಿದ ವರ್ಗಗಳ ಮೆಟ್ರಿಕ್ ನಂತರದ ಬಾಲಕಿಯರ ವಿದ್ಯಾರ್ಥಿನಿಲಯಲ್ಲಿ ಪ್ರತಿಭಾಂಜಲಿ ಸುಗಮ ಸಂಗೀತ ಅಕಾಡೆಮಿಯ ಬೆಳ್ಳಿ ಹಬ್ಬದ ಸಂಭ್ರಮಾಚರಣೆ ಅಂಗವಾಗಿ ಮಂಗಳವಾರ ಆಯೋಜಿಸಿದ್ದ ಹೊಸ ತಲೆಮಾರಿಗೆ ವಚನಧಾರೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ಸರಳ ರೀತಿಯಲ್ಲಿ ಸರ್ವರಿಗೂ ಅರ್ಥವಾಗುವ ರೀತಿಯ ಸಾಹಿತ್ಯವೇ ವಚನಗಳು ಎಂದರು.

12ನೇ ಶತಮಾನದಲ್ಲಿ ಬಸವಣ್ಣನವರ ಕ್ರಾಂತಿಕಾರಿ ತೀರ್ಮಾನದಿಂದ ಸಮ ಸಮಾಜ ನಿರ್ಮಾಣ ಪರಿಕಲ್ಪನೆ ಜಾರಿಗೆ ಬಂತು. ಕಾಯಕವೇ ಕೈಲಾಸ ಎನ್ನುವ ಮೂಲಕ ಎಲ್ಲ ಕೆಲಸಗಳು ಶ್ರೇಷ್ಟ, ಮಾಡುವ ಕೆಲಸಗಳಲ್ಲಿ ನಿಷ್ಠೆ, ಶ್ರದ್ದೆ ಹಾಗೂ ಬದ್ಧತೆಯಿಂದ ಪ್ರೀತಿಯಿಂದ ಮಾಡುವ ಮೂಲಕ ಸಾರ್ಥಕತೆ ಕಾಣಬಹುದು ಎಂಬುದನ್ನು ತಿಳಿಸಿದ್ದಾರೆ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಕನ್ನಡ ಪರಿಚಾರಕ ಕೆ.ಟಿ.ಹನುಮಂತು ಮಾತನಾಡಿ, ವಚನಗಳು ಸರ್ವಕಾಲಕ್ಕೂ ಅನ್ವಯವಾಗುತ್ತವೆ. ಜತೆಗೆ ಅವುಗಳಲ್ಲಿ ಚಿಕಿತ್ಸಕ ಗುಣವಿದೆ. ಮಾದಾರ ಚೆನ್ನಯ್ಯ, ಜೇಡರ ದಾಸಿಮಯ್ಯ, ಬಸವಣ್ಣ, ಅಲ್ಲಮಪ್ರಭು, ಅಕ್ಕಮಹಾದೇವಿ ಸೇರಿದಂತೆ ಹಲವಾರು ವಚನಕಾರರ ವಚನಗಳು ಸಾರ್ವಕಾಲಿಕವಾಗಿ ಅನ್ವಯವಾಗುವಂತೆ, ಸರ್ವರೂ ಜೀವನದಲ್ಲಿ ಅಳವಡಿಸಿಕೊಳ್ಳುವ ಸಾರವನ್ನು ಹೊಂದಿರುವ ಅಮೂಲ್ಯ ಕೊಡುಗೆಗಳಾಗಿವೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ನಿಲಯ ಪಾಲಕಿ ಯೋಗಿತಾ ಮಾತನಾಡಿ, ಇಂತಹ ಕಾರ್ಯಕ್ರಮಗಳಿಂದ ವಿದ್ಯಾರ್ಥಿಗಳಿಗೆ ಉಪಯೋಗವಾಗುತ್ತದೆ. ಜತೆಗೆ ಆಯೋಜನೆ ಮಾಡಿದ್ದಕ್ಕೂ ಸಾರ್ಥಕತೆಗೊಳ್ಳುತ್ತದೆ. ಪ್ರತಿಭಾಂಜಲಿ ಸುಗಮ ಸಂಗೀತ ಅಕಾಡೆಮಿಯ ಬೆಳ್ಳಿ ಹಬ್ಬದ ಪ್ರಯುಕ್ತ 25 ಸಂಗೀತ ಕಾರ್ಯಕ್ರಮ ಹಮ್ಮಿಕೊಂಡಿದ್ದು, ಇದು ಎರಡನೇಯದ್ದಾಗಿದೆ ಎಂದರು.

ಅಲಯನ್ಸ್‌ನ ಜಿಲ್ಲಾ ಸಂಪುಟ ಕಾರ್ಯದರ್ಶಿ ಜಿ.ಧನಂಜಯ ದರಸಗುಪ್ಪೆ, ಶರಣ ಪಾಪಯ್ಯ ಉಪಸ್ಥಿತರಿದ್ದರು. ಪ್ರತಿಭಾಂಜಲಿ ಸುಗಮ ಸಂಗೀತ ಅಕಾಡೆಮಿ ಮುಖ್ಯಸ್ಥ ಪ್ರತಿಭಾಂಜಲಿ ಡೇವಿಡ್ ವಿದ್ಯಾರ್ಥಿಗಳಿಗೆ ವಚನ ಹೇಳಿಕೊಟ್ಟರು. ಅಕಾಡೆಮಿ ಗಾಯಕರಾದ ಶಂಕರ್, ಹಂಸಾ, ಐಶ್ವರ್ಯಾ, ವಂದನಾ, ಸರಿತಾ, ಶಶಿಕಲಾ, ಕರಣ್‌ವೀರ್, ಸಂಗೀತಾ, ವಿಶ್ವಾಸ್, ಸಿಂಧುಶ್ರೀ ಅವರು ಸಿಹಿಯೂ ಇರುವ ತನಕ ಇರುವೆಗಳು ನೂರು, ಮಾಡಿ ಮಾಡಿ ಕೆಟ್ಟರು ಮನವಿಲ್ಲದೇ, ತಂದೆ ನೀನು ತಾಯಿ ನೀನು, ಇವನಾರವಾ ಇವನಾರವಾ ವಚನಗಳನ್ನು ಸುಸ್ರಾವ್ಯವಾಗಿ ಹಾಡಿ ರಂಜಿಸಿದರು.