ಮಕ್ಕಳಲ್ಲಿ ಸ್ಪರ್ಧಾ ಮನೋಭಾವಕ್ಕೆ ಪ್ರತಿಭಾ ಕಾರಂಜಿ ಭೂಮಿಕೆ

ಕಿಕ್ಕೇರಿ ಹೋಬಳಿಯ ಗಡಿಭಾಗದ ಮಾದಾಪುರ ಕೊಪ್ಪಲು ಗ್ರಾಮದಲ್ಲಿ ಇತ್ತೀಚೆಗೆ ಜರುಗಿದ ಆನೆಗೊಳ ಕ್ಲಸ್ಟರ್ ಹಂತದ ಪ್ರಾಥಮಿಕ ಶಾಲಾ ಹಂತದ ಪ್ರತಿಭಾ ಕಾರಂಜಿಯಲ್ಲಿ ಮಾದಾಪುರ ಕೊಪ್ಪಲು ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಮಕ್ಕಳು ಬಹುಮಾನ ಪಡೆದು ಸಂಭ್ರಮಿಸಿದರು. ಮಂಜಶೆಟ್ಟಿ, ದೇವರಾಜೇಗೌಡ, ದಿಲೀಪ್, ಮಂಗಳಾ, ಪಲ್ಲವಿ ಮತ್ತಿತರರಿದ್ದರು.

Published on:

27 Nov 2025, 4:52 pm

ಕಿಕ್ಕೇರಿ: ಮಕ್ಕಳಲ್ಲಿ ಸ್ಪರ್ಧಾ ಮನೋಭಾವ ಮೂಡಿಸಲು ಪ್ರತಿಭಾ ಕಾರಂಜಿ ಮುಖ್ಯ ಭೂಮಿಕೆಯಾಗಿದೆ ಮಾದಾಪುರ ಗ್ರಾಪಂ ಅಧ್ಯಕ್ಷ ಕೃಷ್ಣೇಗೌಡ ಅಭಿಪ್ರಾಯಪಟ್ಟರು.

ಹೋಬಳಿಯ ಗಡಿಗ್ರಾಮವಾದ ಮಾದಾಪುರಕೊಪ್ಪಲು ಶಾಲೆಯಲ್ಲಿ ಇತ್ತೀಚೆಗೆ ಜರುಗಿದ ಆನೆಗೊಳ ಕ್ಲಸ್ಟರ್‌ಮಟ್ಟದ ಪ್ರಾಥಮಿಕ ಹಂತದ ಪ್ರತಿಭಾ ಕಾರಂಜಿ ಕಾರ್ಯಕ್ರಮದಲ್ಲಿ ಮಾತನಾಡಿ, ಮಕ್ಕಳಲ್ಲಿ ಕೀಳರಿಮೆ ಬಾರದಂತೆ ಎಚ್ಚರಿಕೆ ವಹಿಸಿ ಪ್ರಾಥಮಿಕ ಶಾಲೆಯ ಮಕ್ಕಳನ್ನು ಜೋಪಾನ ಮಾಡಿದಾಗ ಮಾತ್ರ ತಮ್ಮ ಪ್ರತಿಭೆಯನ್ನು ಬೆಳಗಿಸಲು ಸಾಧ್ಯ. ಎಳೆಯ ಮನಸ್ಸುಗಳನ್ನು ಚಿವುಟುವ ಕೆಲಸವಾಗದೆ ನೈಜ್ಯ ಪ್ರತಿಭೆಗೆ ನೀರು ಎರೆದು ಪೋಷಿಸುವ ಕೆಲಸ ಸಾಂಘಿಕವಾಗಿ ಆಗಬೇಕಿದೆ ಎಂದರು.

ಇಸಿಒ ನವೀನ್‌ಕುಮಾರ್ ಮಾತನಾಡಿ, ಮಕ್ಕಳ ಪ್ರತಿಭೆ ಗುರುತಿಸಲು ಶಿಕ್ಷಣ ಇಲಾಖೆ ಉತ್ತಮ ಕೆಲಸ ಮಾಡುತ್ತಿದೆ. ಪಾಲಕರು ಶಿಕ್ಷಕರೊಂದಿಗೆ ಸಹಕರಿಸಿ ಎಂದು ವಿನಂತಿಸಿದರು.

ವಿವಿಧ ಶಾಲೆಯ 90ಕ್ಕೂ ಹೆಚ್ಚು ಮಕ್ಕಳು ಪ್ರತಿಭಾ ಕಾರಂಜಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ತಮ್ಮ ಪ್ರತಿಭೆ, ಕೌಶಲವನ್ನು ಅಚ್ಚುಕಟ್ಟಾಗಿ ಅನಾವರಣಗೊಳಿಸಿದರು. ಪ್ರತಿಭೆಯನ್ನು ಪ್ರದರ್ಶಿಸಿ ಶಿಕ್ಷಕರು, ಪಾಲಕರಿಂದ ಚಪ್ಪಾಳೆ ಗಿಟ್ಟಿಸಿದರು. ನಗರಪ್ರದೇಶದ ಮಕ್ಕಳಿಗಿಂತ ತಾವು ಕಡಿಮೆ ಇಲ್ಲ ಎನ್ನುವುದನ್ನು ಸಾದರಪಡಿಸಿದರು.

ದೇಶಭಕ್ತಿಗೀತೆ, ಭಕ್ತಿಗೀತೆ, ಕತೆ ಹೇಳುವುದು, ಕಂಠಪಾಠ, ರಸಪ್ರಶ್ನೆ, ಧಾರ್ಮಿಕ ಪಠಣೆ, ಛದ್ಮವೇಷ, ಅಭಿನಯ ಗೀತೆ, ಜಾನಪದ ನೃತ್ಯ, ಕ್ಲೇ ಮಾಡೆಲಿಂಗ್ ಮತ್ತಿತರ ಸ್ಪರ್ಧೆಗಳು ನಡೆದವು.

ಸಿಆರ್‌ಪಿ ಆಶಾರಾಣಿ, ಗ್ರಾಪಂ ಸದಸ್ಯೆ ದಿವ್ಯಾ ಚಂದ್ರಶೇಖರ್, ಎಸ್‌ಡಿಎಂಸಿ ಅಧ್ಯಕ್ಷ ಮಂಜಶೆಟ್ಟಿ, ಸರ್ಕಾರಿ ನೌಕರ ಸಂಘದ ತಾಲೂಕು ಅಧ್ಯಕ್ಷ ಆನಂದಕುಮಾರ್, ಕಾರ್ಯದರ್ಶಿ ಎಲ್.ಎಸ್. ಧರ್ಮಪ್ಪ, ಲಕ್ಷ್ಮಣಗೌಡ, ಪದ್ಮೇಶ್, ಮುಖ್ಯಶಿಕ್ಷಕ ದೇವರಾಜೇಗೌಡ, ದಿಲೀಪ್‌ಕುಮಾರ್, ಮಂಗಳಾ, ಪಲ್ಲವಿ, ವಿವಿಧ ಶಾಲಾ ಶಿಕ್ಷಕ ವೃಂದದವರು ಹಾಜರಿದ್ದರು.

Prathibha Karanji