ಕಿಕ್ಕೇರಿ ಹೋಬಳಿಯಾದ್ಯಂತ ಮಿತಿ ಮೀರಿದ ನಾಯಿಗಳ ಕಾಟ

ಕೈಯಲ್ಲಿ ಸಣ್ಣ ಕೈಚೀಲ ಹಿಡಿದಿದ್ದರೆ, ಮಕ್ಕಳು ಬ್ರೆಡ್, ಬಿಸ್ಕತ್ ತಿನ್ನುತ್ತಿದ್ದರೆ ತಲೆಗೆ ಟೋಪಿ ಹಾಕಿದರೆ, ಸ್ಪೆಟರ್, ಜರ್ಕಿನ್ ಹಾಕಿದರೆ ಸಾಕು ನಾಯಿಗಳು ಮೈಮೇಲೆ ಎರಗುತ್ತಿವೆ. ರಾತ್ರಿ ವೇಳೆಯಂತೂ ಒಂಟಿಯಾಗಿ ಓಡಾಡುವುದೇ ಕಷ್ಟವಾಗಿದೆ.

ಬಸ್ ನಿಲ್ದಾಣವನ್ನು ಬೀದಿ ನಾಯಿಗಳು ತಂಗುದಾಣ ಮಾಡಿಕೊಂಡಿವೆ. ಬೆಳಗಿನ ವೇಳೆ ಪ್ರಯಾಣಿಕರು ಮೈಮರೆತು ನಿಲ್ದಾಣ ಪ್ರವೇಶಿಸಿದರೆ ಮೈಮೇಲೆ ಎರುಗುತ್ತವೆ. ಪ್ರಯಾಣಿಕರು ಓಡಿ ಹೋಗಿ ಬಸ್ ಹತ್ತಲು ಹೋದಾಗ ಅಟ್ಟಾಡಿಸುತ್ತವೆ. ಇನ್ನು ಕಜ್ಜಿ, ರೋಗಗ್ರಸ್ತ, ವಯಸ್ಸಾದ ನಾಯಿಗಳೂ ಇವೆ.

ಕಿಕ್ಕೇರಿಯ ವಾರದ ಸಂತೆಗೆ ಬಹುತೇಕ ಮಾಲೀಕರೊಂದಿಗೆ ಬಂದ ಸಾಕುನಾಯಿಗಳು ದಾರಿತಪ್ಪಿ ಠಿಕಾಣಿ ಹೂಡುತ್ತಿರುವ ಘಟನೆಗಳು ಇವೆ. ಸಂತೆ ಮಾರುಕಟ್ಟೆ ಬಳಿಯೇ ಮಾಂಸ, ಮೀನು, ಕೋಳಿ ಅಂಗಡಿಗಳಿದ್ದು ಇದರ ವಾಸನೆಗೆ ಅಲ್ಲಿಯೇ ತಂಗುತ್ತಿವೆ. ರಕ್ತ, ಮಾಂಸದ ರುಚಿಕಂಡಿರುವ ನಾಯಿಗಳು ಅಲ್ಲೇ ವಾಸಸ್ಥಾನ ಮಾಡಿಕೊಂಡಿವೆ. ವಾಹನ ಸವಾರರು ಈ ದಾರಿಯಲ್ಲಿ ಸಾಗಿದರೆ ಅವರ ಮೇಲೆ ಎರಗಿಸುವ ಸಾಕಷ್ಟು ಉದಾಹರಣೆ ಇದೆ.

ನಿತ್ಯ ಹೊಸದಾಗಿ ನಾಯಿಗಳು ಕಾಣಿಸಿಕೊಳ್ಳುತ್ತಿರುವುದರಿಂದ ಹಳೆಯ ನಾಯಿಗಳು ಅಟ್ಟಾಡಿಸುತ್ತಿದ್ದು, ಈ ವೇಳೆ ನಾಗರಿಕರ ಮೇಲೆ ಎಗರುವುದು ಸಾಮಾನ್ಯವಾಗಿದೆ. ಹಳೆಯ ನಾಯಿಗಳೊಂದಿಗೆ ಹೊಸತು ಸೇರ್ಪಡೆಯಾಗಿ ನಾಯಿ ಸಂತತಿಯೂ ಹೆಚ್ಚಾಗುತ್ತಿದೆ. ಇನ್ನು ಮುಪ್ಪಿನ ಹಾಗೂ ರೋಗಪೀಡಿತ ನಾಯಿಗಳು ಓಡಾಡುವ ಸ್ಥಳ ಅಶುಚಿತ್ವದಿಂದ ಕೂಡಿದ್ದು, ಇಂತಹ ನಾಯಿಗಳು ಜೊಲ್ಲು, ರಕ್ತ ಸುರಿಸಿಕೊಂಡು ಬಾಗಿಲು ತೆಗೆದ ಮನೆಯೊಳಗೆ ನುಗ್ಗುತ್ತಿವೆ. ಮುಂಜಾನೆ ವೇಳೆ ಪ್ರಯಾಣಿಕರ ಸ್ಥಿತಿ ಹೇಳ ತೀರದ್ದಾಗಿದೆ. ವಾಹನ ಸವಾರರು ರಸ್ತೆಗೆ ಅಡ್ಡಲಾಗಿ ಬರುವ ನಾಯಿಗಳಿಂದ ರಕ್ಷಣೆ ಪಡೆಯಲು ಹಾಗೂ ನಾಯಿಗಳನ್ನು ರಕ್ಷಿಸಲು ಹೋಗಿ ಅಪಘಾತಕ್ಕೊಳಗಾಗಿದ್ದಾರೆ.

ಹೊರವಲಯದಲ್ಲಿರುವ ಸ್ಮಶಾನ, ಮಾಂಸದ ಅಂಗಡಿ, ಹೋಟೆಲ್, ಬೇಕರಿಗಳು ನಾಯಿಗಳ ತಂಗುದಾಣವಾಗಿ ಮಾರ್ಪಟ್ಟಿದೆ. ಗ್ರಾಮದ ಮಂದಗೆರೆ ರಸ್ತೆ, ಬಿಎಂ ರಸ್ತೆಯಲ್ಲಿ ಮಿಲ್ಟ್ರಿ ಹೋಟೆಲ್‌ಗಳಿವೆ. ಜತೆಗೆ ಡಾಬಾ, ಸಣ್ಣಪುಟ್ಟ ಬಿರಿಯಾನಿ, ಕಬಾಬು ಆಂಗಡಿಗಳು ಸಾಕಷ್ಟಿದ್ದು, ಈ ಸ್ಥಳದಲ್ಲಿ ನಾಯಿಗಳ ಸಂಖ್ಯೆ ಹೆಚ್ಚಿದೆ. ಮಾಂಸ, ಮೂಳೆ ಚೂರು ತಿನ್ನಲು ನಾಯಿಗಳು ಕಚ್ಚಾಡಿ ಗ್ರಾಹಕರನ್ನೂ ಕಚ್ಚಿರುವ ಉದಾಹರಣೆಗಳು ಇವೆ.

ಇಲ್ಲಿನ ಹಾಲಿನ ಡೇರಿ ಬಳಿಯೇ ಕೋಳಿ ಅಂಗಡಿಗಳಿದ್ದು, ರಾತ್ರಿ ವೇಳೆ ಹಾಲಿನ ಡೇರಿ ಜಗುಲಿಯಲ್ಲಿ ನಾಯಿಗಳು ಮಲುಗಲಿವೆ. ಬೆಳ್ಳಂಬೆಳ್ಳಗೆ ಹಾಲು ಹಾಕಲು, ಹಾಲು ಖರೀದಿಸಲು ಬರುವ ಮಕ್ಕಳು, ಹಿರಿಯರನ್ನು ಅಟ್ಟಾಡಿಸುತ್ತಿವೆ. ಕೆಪಿಎಸ್ ಶಾಲಾ ಮೈದಾನದಲ್ಲಿ ಬಹುತೇಕ ಹಿರಿಯ ನಾಗರಿಕರು ವಾಯುವಿಹಾರಕ್ಕೆ ತೆರಳಲಿದ್ದು, ಬೂವಿನಹಳ್ಳಿ, ಕೋಡಿಮಾರನಹಳ್ಳಿವರೆಗೆ ನಡೆದು ಹೋಗುತ್ತಾರೆ. ಶಾಲಾ ಮೈದಾನದಲ್ಲಿ ನಸುಕಿನಲ್ಲಿ ನಾಯಿಗಳು ನಾಗರಿಕರ ಮೇಲೆ ಎಗರುವ ಪರಿಣಾಮ ವಯೋವೃದ್ಧರು ಕೋಲು ಹಿಡಿದು ಓಡಿಸಬೇಕಿದೆ.

ಬೇಕರಿ ತಿನಿಸು, ಮಾಂಸದ ರುಚಿಕಂಡ ಬಹುತೇಕ ಬೀದಿ ನಾಯಿಗಳು ಸುತ್ತಮುತ್ತಲ ಹಳ್ಳಿಯ ಹೊಲಗದ್ದೆಗಳಲ್ಲಿ ತಂಗುತ್ತಿವೆ. ರಾತ್ರಿ ಹೊಲಗದ್ದೆ, ಹಗಲು ಗ್ರಾಮದ ಬೀದಿಯಲ್ಲಿ ಎನ್ನುವಂತಾಗಿದೆ. ಹಲವು ಹಳ್ಳಿಗಳಲ್ಲಿ ಸಾಕಿರುವ ಕೋಳಿಗಳನ್ನು ಕಚ್ಚಿಕೊಂಡು ಹೋಗುತ್ತವೆ.

ಕಳೆದ ವಾರ ಶಾಲೆಗೆ ತೆರಳುತ್ತಿದ್ದ ಬಾಲಕಿ ಅನ್ವಿತಾ ಮೇಲೆ ನಾಯಿ ದಾಳಿ ಮಾಡಿ ಕೈ ಕಚ್ಚಿದೆ. ಕೆಲವು ತಿಂಗಳ ಹಿಂದೆ ಸಾಸಲುವಿನಲ್ಲಿ ಹಾಲಿನ ಡೇರಿಗೆ ಹಾಲು ಹಾಕಲು ತೆರಳಿದ್ದ ಬಾಲಕ ಚರಣ್ ಮೇಲೆ ನಾಯಿ ಎಗರಿ ಮುಖ ಕಚ್ಚಿ ಗಂಭೀರವಾಗಿ ಗಾಯ ಮಾಡಿದೆ. ಆಟೋ ಮಂಜೇಗೌಡ, ವಾಸು, ಬಾಬು, ಪುಟಾಣಿ ಪ್ರಾಣೇಶ್, ಪುಟ್ಟರಾಜು ಮೇಲೆ ನಾಯಿ ದಾಳಿ ಮಾಡಿ ಆಸ್ಪತ್ರೆ ಸೇರುವಂತೆ ಮಾಡಿವೆ. ರೈತ ಲೋಕೇಶ್ ಸಾಕಿದ್ದ ಹಸುವಿನ ಮೂತಿ ಕಚ್ಚಿ ಗಾಯಗೊಳಿಸಿವೆ. ಕಳೆದ ವರ್ಷ ಕಳ್ಳನಕೆರೆಯಲ್ಲಿ ಜಮೀನಿಗೆ ತೆರಳುತ್ತಿದ್ದ ಪುನೀತ್ ಕುಮಾರ್, ದಿಲೀಪ್, ಸುರೇಶ ಹಾಗೂ ನಿವೃತ್ತ ಶಿಕ್ಷಕ ಗಂಗಾಧರ್‌ಗೆ ನಾಯಿ ಕಡಿದಿದೆ. ಬೂವಿನಹಳ್ಳಿ ಯಿಂದ ಕಿಕ್ಕೇರಿಗೆ ಬರುತ್ತಿದ್ದ ಮೂಗಣ್ಣನಿಗೆ ಹುಚ್ಚು ನಾಯಿ ಕಡಿದಿದೆ. ಉದ್ದಿನಮಲ್ಲನಹೊಸೂರು ಗ್ರಾಮದ ರೈತ ರಮೇಶ್ ಅವರ ಪುತ್ರ ದೀಕ್ಷಿತ್ ಮೇಲೆ ನಾಯಿ ಎಗರಿ ಕಚ್ಚಿತ್ತು. ಬೀದಿನಾಯಿಗಳ ಆಟಾಟೋಪಕ್ಕೆ ಬ್ರೇಕ್ ಹಾಕುವಂತೆ ನಾಗರಿಕರು ಅಧಿಕಾರಿಗಳನ್ನು ಒತ್ತಾಯಿಸುತ್ತಿದ್ದಾರೆ.