ಶ್ರೀರಂಗಪಟ್ಟಣದಲ್ಲಿ ಲಕ್ಷ ದೀಪೋತ್ಸವಕ್ಕೆ ಸಜ್ಜು

ಕ್ಷೇತ್ರಪಾಲಕ ಶ್ರೀ ಆದಿರಂಗನಾಥಸ್ವಾಮಿ ದೇವಾಲಯ ಮುಂಭಾಗದಲ್ಲಿ 36ನೇ ವರ್ಷದ ಲಕ್ಷ ದೀಪೋತ್ಸವವನ್ನು ಪಟ್ಟಣದ ಲಕ್ಷ ದೀಪೋತ್ಸವ ಸಮಿತಿಯಿಂದ ಆಚರಿಸಲಾಗುತ್ತಿದ್ದು, ಇದಕ್ಕಾಗಿ ಶ್ರೀರಂಗನಾಥಸ್ವಾಮಿ ದೇವಾಲಯ ಮುಂಭಾಗ ದೇಗುಲ ರಸ್ತೆಯ ವೃತ್ತಗಳು ಸೇರಿದಂತೆ ಪ್ರಮುಖ ವೃತ್ತಗಳಲ್ಲಿ ವರ್ಣರಂಜಿತ ವಿದ್ಯುತ್ ದೀಪಗಳ ಅಲಂಕಾರದ ಜತೆಗೆ ದೇವಾಲಯ ಮುಂದಿನ ರಸ್ತೆಯ 400 ಮೀಟರ್ ಉದ್ದಕ್ಕೂ ಎರಡು ಇಕ್ಕೆಲಗಳಲ್ಲಿ ಕಂಬಗಳನ್ನು ನೆಟ್ಟು ಬಿದಿರಿನ ಅಡ್ಡಪಟ್ಟಿಯಲ್ಲಿ 10 ಸಾಲುಗಳು ಹಾಗೂ ನೆಲದ ಮೇಲೆ 10 ಸಾಲು ಸೇರಿದಂತೆ ಒಟ್ಟು 20 ಸಾಲುಗಳಲ್ಲಿ ಲಕ್ಷಾಂತರ ದೀಪಗಳನ್ನು ಇಡಲು ದಬ್ಬೆಗಳ ಸಹಾಯದಿಂದ ಅಟ್ಟಣೆಗಳ ಪಟ್ಟಿಗಳನ್ನು ಈಗಾಗಲೇ ಕಟ್ಟಲಾಗಿದ್ದು, ಇದರೊಂದಿಗೆ ಗಂಡಭೇರುಂಡ ವೃತ್ತವನ್ನು ಸಹ ಶುಚಿತ್ವದೊಂದಿಗೆ ಸಿದ್ಧಗೊಳಿಸಿ ದೀಪಗಳಿಂದ ವಿಶೇಷವಾಗಿ ಅಲಂಕರಿಸಲಾಗಿದೆ.

ಇನ್ನು ಮಕರ ಸಂಕ್ರಾಂತಿ ದಿನದ ಪೂರ್ವ ಸಿದ್ಧತೆಗಾಗಿ ಹಿಂದಿನ ದಿನದಿಂದಲೇ ಲಕ್ಷಾಂತರ ದೀಪಗಳನ್ನು ಸಾಲಾಗಿ ಜೋಡಿಸಲು ಅವಶ್ಯವಿರುವ ಹಸುವಿನ ಸಗಣಿ ಸಂಗ್ರಹಿದ್ದು, ಇವುಗಳ ಮೇಲೆ ಇಡುವ ದೀಪಗಳನ್ನು ಬೆಳಗಲು ಶ್ರೀರಂಗನ ಭಕ್ತರು, ದಾನಿಗಳು ಹಾಗೂ ಪುರಜನರು ಸ್ವಯಂಪ್ರೇರಣೆ ಸಹಾಯದಿಂದ ನೀಡಿದ ಲಕ್ಷಗಟ್ಟಲೆ ದೀಪಗಳು ಹಾಗೂ ಬೇಕಾಗುವ 75ಟಿನ್ (80 ಸಾವಿರ ಲೀಟರ್‌ನಷ್ಟು) ದೀಪದ ಎಣ್ಣೆಯನ್ನು ತರಲಾಗಿದೆ. ಈ ಬಾರಿ ವೇದಬ್ರಹ್ಮ ಲಕ್ಷ್ಮೀಶ ಶರ್ಮ ಅವರಿಂದಲೇ 20 ಸಾವಿರ ಹೊಸ ಮಣ್ಣಿನ ದೀಪಗಳನ್ನು ತರಲಾಗಿದ್ದು, ಅವುಗಳನ್ನು ಸಾಲಾಗಿ ಜೋಡಿಸುವ ಹಾಗೂ ಎಣ್ಣೆ ಹಾಕುವ ಪ್ರಕ್ರಿಯೆ ಮತ್ತು ನಿರ್ವಹಣೆಗೆ ಲಕ್ಷದೀಪೋತ್ಸವ ಸಮಿತಿ ಮುಖ್ಯಸ್ಥ ಇಡ್ಲಿ ವೆಂಕಟೇಶ್ ಹಾಗೂ ವೈದಿಕ ಲಕ್ಷ್ಮೀಶ ಶರ್ಮ ನೇತೃತ್ವದಲ್ಲಿ ಸಮಿತಿ ಸದಸ್ಯರು, ಅಭಿನವ ಭಾರತ್, ವಿದ್ಯಾಭಾರತಿ ಶಾಲೆಯ ವಿದ್ಯಾರ್ಥಿಗಳು ಹಾಗೂ ಪುರಜನರನ್ನು ಒಳಗೊಂಡ ಸ್ವಯಂ ಸೇವಕರ ತಂಡ ಬುಧವಾರ ಆಗಮಿಸಿದೆ.

ಸೂರ್ಯನು ಮಕರ ಸಂಕ್ರಾಂತಿ ಹಬ್ಬದ ದಿನದಂದು ದಕ್ಷಿಣ ದಿಕ್ಕಿನಿಂದ ಉತ್ತರಾಯಣಕ್ಕೆ ತನ್ನ ಪಥ ಬದಲಾಯಿಸಿ ಸರ್ವ ಜೀವರಾಶಿ ಹಾಗೂ ಸಸ್ಯಕಾಶಿಗಳಿಗೆ ಕಿರಣಗಳ ಜ್ಯೋತಿ ಬೆಳಗಿಸುವ ಕಾರ್ಯಕ್ಕೆ ಕೃತಜ್ಞತೆಯಿಂದ ಶ್ರೀ ಮಹಾವಿಷ್ಣು ಶ್ರೀಮನ್ ನಾರಾಯಣ ಸ್ವರೂಪಿ ಶ್ರೀ ಆದಿರಂಗನಾಥಸ್ವಾಮಿ ಸನ್ನಿಧಿಯಲ್ಲಿ ಸಂಕ್ರಾಂತಿ ದಿನದ ಗುರುವಾರ ಸಂಜೆ 6.30ರ ಗೋಧೂಳಿ ಲಗ್ನದಲ್ಲಿ ಪ್ರಥಮವಾಗಿ ಶ್ರೀರಂಗನಾಥಸ್ವಾಮಿ ದೇವಾಲಯದ ಪ್ರಧಾನ ಅರ್ಚಕರಾದ ವಿಜಯಸಾರಥಿ, ಪ್ರಸನ್ನ ಹಾಗೂ ವೇದಬ್ರಹ್ಮ ಡಾ.ಭಾನುಪ್ರಕಾಶ್ ಶರ್ಮ ಮತ್ತು ಕ್ಷೇತ್ರದ ಶಾಸಕರ ನೇತೃತ್ವದಲ್ಲಿ ವಿಷ್ಣು ಸಹಸ್ರನಾಮ ಪಠಣೆಯೊಂದಿಗೆ, ವೈಕುಂಠ ದ್ವಾರ ತೆರೆದು ಬಳಿಕ ಸ್ವಾಮಿಗೆ ನವನೀತ ಅಲಂಕಾರ ಅರ್ಪಿಸಿ ದೀಪ ಬೆಳಗಲು ಚಾಲನೆ ನೀಡಲಾಗುವುದು.

ಪ್ರತಿವರ್ಷ ಮಕರ ಸಂಕ್ರಾಂತಿ ಹಬ್ಬದ ದಿನದಂದು ಐತಿಹಾಸಿಕ ಶ್ರೀರಂಗನಾಥಸ್ವಾಮಿಯ 18 ಅಡಿ ಉದ್ದದ ಸಾಲಿಗ್ರಾಮ ಶಿಲೆಯ ಶೇಷಶಯನ ಮೂರ್ತಿಗೆ ದೇವಾಲಯದಲ್ಲಿ ಸುಗಂಧ ದ್ರವ್ಯಗಳ ಅಭಿಷೇಕಗಳೊಂದಿಗೆ ಸಂಪೂರ್ಣ ಬೆಣ್ಣೆ ಅಲಂಕಾರಗೊಳಿಸಿ ವಿಶೇಷ ಪೂಜೆ ಪ್ರಾರ್ಥನೆಯೊಂದಿಗೆ ಭಕ್ತರ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗುತ್ತದೆ. ಪ್ರಮುಖವಾಗಿ ಮಕರ ಸಂಕ್ರಾಂತಿ ದಿನದಂದು ಮಾತ್ರ ಶ್ರೀಮನ್ ನಾರಾಯಣನ ದರ್ಶನಕ್ಕಾಗಿ ವರ್ಷಕ್ಕೊಮ್ಮೆ ಮಾತ್ರ ತೆರೆಯುವ ವೈಕುಂಠ ದ್ವಾರವನ್ನು ತೆರೆದು ಭಕ್ತರ ಪ್ರವೇಶಕ್ಕೆ ಅವಕಾಶ ಕಲ್ಪಿಸಲಾಗುತ್ತದೆ.

ಈ ಹಿನ್ನೆಲೆ ಜಿಲ್ಲೆ, ರಾಜ್ಯದ ವಿವಿಧ ಭಾಗಗಳು ಸೇರಿದಂತೆ ತಮಿಳುನಾಡು, ಆಂಧ್ರಪ್ರದೇಶ, ತೆಲಂಗಾಣ, ಕೇರಳ ಹಾಗೂ ದೇಶದ ವಿವಿಧ ಭಾಗಗಳ ಲಕ್ಷಾಂತರ ಜನರು ಮತ್ತು ಭಕ್ತರು ಆಗಮಿಸಿ ಜೀವನದಿ ಕಾವೇರಿಯಲ್ಲಿ ಮಿಂದು ಶ್ರೀ ಆದಿರಂಗನ ದರ್ಶನ ಪಡೆದು ಪ್ರಾರ್ಥಿಸುತ್ತಾರೆ.

ಇದಕ್ಕಾಗಿ ದೇವಾಲಯ ಸಮಿತಿ ಹಾಗೂ ಜಿಲ್ಲಾ ಪೊಲೀಸ್ ಇಲಾಖೆ ಮುಂಜಾಗ್ರತ ಕ್ರಮವಾಗಿ ನೂರಾರು ಬ್ಯಾರಿಕೇಡ್ ಅಳವಡಿಸಿ ಸರತಿ ಸಾಲನ್ನು ನಿರ್ಮಿಸಿದ್ದು, ಜನದಟ್ಟಣೆ ಹಾಗೂ ತಳ್ಳಾಟ ನೂಕಾಟ ಉಂಟಾಗದಂತೆ ಭಕ್ತರು ದರ್ಶನ ಮಾಡಲು ವ್ಯವಸ್ಥೆ ಜತೆಗೆ ಭದ್ರತೆ ಕಲ್ಪಿಸಿದೆ.