ಪ್ರಶಸ್ತಿಗಳು ಮೌಲ್ಯ ತರುವಂತಿರಲಿ: ವಿಶ್ರಾಂತ ಕುಲಪತಿ ಎನ್.ಎಸ್.ರಾಮೇಗೌಡ ಅಭಿಮತ

ನಗರದ ಕೆವಿಎಸ್ ಭವನದಲ್ಲಿ ಕರ್ನಾಟಕ ಸಂಘ, ಎಂ.ಎಲ್.ಶ್ರೀಕಂಠೇಗೌಡ ಸಂಶೋಧನಾ ಕೇಂದ್ರದ ಸಹಯೋಗದಲ್ಲಿ ಗುರುವಾರ ಸಂಜೆ ಆಯೋಜಿಸಿದ್ದ 9ನೇ ವರ್ಷದ ಎಂ.ಶಿವಲಿಂಗಯ್ಯ ಸಮಾಜ ಸೇವಾ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದ ಅವರು, ಶೈಕ್ಷಣಿಕ ಅಥವಾ ಬೇರೆ ಯಾವುದೇ ಕ್ಷೇತ್ರವಿರಲಿ ಎಷ್ಟು ಸೇವೆ ಮಾಡಿದ್ದಾರೆ ಎನ್ನುವುದನ್ನು ಗುರುತಿಸುವುದಕ್ಕಿಂತ ಯಾವ ಪ್ರಶಸ್ತಿಗಳು ವ್ಯಕ್ತಿಗೆ ಬಂದಿವೆ ಎನ್ನುವ ಕಾಲದಲ್ಲಿದ್ದೇವೆ. ಪ್ರಶಸ್ತಿಗಳನ್ನು ತೆಗೆದುಕೊಳ್ಳುವುದರ ಮೇಲೆ ಯೋಗ್ಯತೆ ಹಾಗೂ ಕಾರ್ಯದಕ್ಷತೆಯನ್ನು ಅಳೆಯಲು ಸಾಧ್ಯವಿಲ್ಲ ಎಂದರು.

ಶಿಕ್ಷಣ ಕ್ಷೇತ್ರದಲ್ಲಿಯೇ ಅನುಪಮಾ ಸೇವೆ ಸಲ್ಲಿಸುವ ಜತೆಗೆ ಹುಟ್ಟೂರಿನಲ್ಲಿ ಉತ್ತಮ ಆಡಳಿತ ನಡೆಸುತ್ತಿರುವ ಜೆ.ಪಾಪೇಗೌಡ ಅವರಿಗೆ ಪ್ರಶಸ್ತಿ ನೀಡಲು ನನ್ನನ್ನ ಆಯ್ಕೆ ಮಾಡಿರುವ ಕರ್ನಾಟಕ ಸಂಘಕ್ಕೆ ತುಂಬಾ ಅಭಾರಿಯಾಗಿದ್ದೇನೆ. ಉತ್ತಮ ವ್ಯಕ್ತಿಯನ್ನೇ ಈ ಪ್ರಶಸ್ತಿಗೆ ಗುರುತಿಸಿರುವುದು ಮೆಚ್ಚುವ ಕೆಲಸವಾಗಿದೆ. ಸರ್ಕಾರದಿಂದ ಕೊಡಮಾಡುವ ಪ್ರಶಸ್ತಿಗೆ ಸೀಲು, ಸಹಿ ಎಲ್ಲವೂ ಇರುತ್ತದೆ. ಆದರೆ ಖಾಸಗೀಯಾಗಿ ಪ್ರದಾನ ಮಾಡುವ ಪ್ರಶಸ್ತಿಗಳಿಗೆ ಸೇವೆ ಎನ್ನುವ ಮೌಲ್ಯ ಹೊತ್ತುಕೊಂಡಿರುತ್ತದೆ. ಕರ್ನಾಟಕ ಸಂಘದಲ್ಲಿ ಪ್ರಶಸ್ತಿ ಪಡೆದ ಆಯಾ ಕ್ಷೇತ್ರದವರು ಮತ್ತಷ್ಟು ಕೆಲಸವನ್ನು ಜವಾಬ್ದಾರಿಯುತವಾಗಿ ನಿರ್ವಹಿಸಿಕೊಂಡು ಮೊದಲಿಗಿಂತ ಹೆಚ್ಚು ಸಾಮಾಜಿಕ ಕೆಲಸದಲ್ಲಿ ತೊಡಗಿದ್ದಾರೆ ಎನ್ನುವುದನ್ನು ಕೇಳಿದ್ದೇನೆ ಎಂದು ಹೇಳಿದರು.

ಕರ್ನಾಟಕ ಸಂಘದ ಅಧ್ಯಕ್ಷ ಡಾ.ಬಿ.ಜಯಪ್ರಕಾಶಗೌಡ ಮಾತನಾಡಿ, ಯಾರು ಮನಸ್ಸನ್ನು ಸ್ವಚ್ಚವಾಗಿಟ್ಟುಕೊಳ್ಳುತ್ತಾರೋ, ಒಳ್ಳೆಯದನ್ನು ಮಾತನಾಡುವವರು ಅವರು ಆರೋಗ್ಯಪೂರ್ಣವಾಗಿ ಇರುತ್ತಾರೆ. ಬಹಳ ಕಾಲ ಬದುಕುತ್ತಾರೆ. ಗುರುವಿಗೆ ನಮಸ್ಕಾರ ಸಲ್ಲಿಸುವ ಅವಕಾಶ ಈಗ ಬಂದಿದೆ. ಸಮಾಜ ಸೇವೆಗೆ ಪ್ರಶಸ್ತಿ ನೀಡುವುದೆಂದರೆ ದೊಡ್ಡ ಸಾಹಸ ಕೆಲಸವಾಗಿದೆ. ಸಮಾಜ ಸೇವೆಯಲ್ಲಿ ಜೆ.ಪಾಪೇಗೌಡ ಅವರನ್ನು ಗುರುತಿಸಿ ಅವರು ನೀಡಿರುವ ಶಿಕ್ಷಣ ಕ್ಷೇತ್ರಕ್ಕೆ ಮತ್ತು ಅದರಲ್ಲಿ ನಡೆಸಿದ ಆಡಳಿತಕ್ಕೆ ಪುಟ್ಟ ಗೌರವದ ರೀತಿ ಪ್ರಶಸ್ತಿ ಪ್ರದಾನ ಮಾಡುತ್ತಿರುವುದು ಸಂತಸ ತಂದಿದೆ ಎಂದು ಶ್ಲಾಘಿಸಿದರು.

ಎಂ.ಶಿವಲಿಂಗಯ್ಯ ಸಮಾಜ ಸೇವಾ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಶ್ರೀರಂಗಪಟ್ಟಣ ತಾಲೂಕು ಮಹದೇವಪುರ ಗ್ರಾಮದ ಆನಂದ ಶಿಕ್ಷಣ ಸಂಸ್ಥೆ ಕಾರ್ಯದರ್ಶಿ ಜೆ.ಪಾಪೇಗೌಡ, ಜೀವಮಾನದಲ್ಲಿಯೇ ನನಗೆ ಬಂದ ಅಭೂತಪೂರ್ವ ಪ್ರಶಸ್ತಿ ಇದು ಮೊದಲು ಎನ್ನಲು ನನಗೆ ಖುಷಿ ಆಗುತ್ತಿದೆ. ಪ್ರಶಸ್ತಿಗೆ ಆಯ್ಕೆ ಮಾಡಿದವರಿಗೆಲ್ಲ ಕೃತಜ್ಞತೆ ಸಲ್ಲಿಸುವೆ. ನಾನು ಮೊದಲಿಂದಲೂ ಶ್ರಮಜೀವಿ. ಏಕೆಂದರೆ ಹುಟ್ಟಿದ್ದು ಹಳ್ಳಿಯಲ್ಲಿ. ಇಡೀ ಗ್ರಾಮದಲ್ಲಿಯೇ ವಿದ್ಯಾವಂತರು ಇರಲಿಲ್ಲ. ನನ್ನ ಕುಟುಂಬವೂ ಹೆಬ್ಬೆಟ್ಟು ಹಾಕುತ್ತಿದ್ದ ಕುಟುಂಬ. ತುಂಬ ಕಷ್ಟಪಟ್ಟು ಓದು ಮುಗಿಸಿ ಈ ಮಟ್ಟಕ್ಕೆ ಬಂದು ನಿಂತಿದ್ದೇನೆ, ಸಮಾಜಕ್ಕೆ ಏನಾದರೂ ಹಾಗೂ ಹುಟ್ಟೂರಿಗೆ ಸಹಾಯ ಆಗಲಿ ಎನ್ನುವ ಹಂಬಲದಿಂದ ಸೇವೆಯಲ್ಲಿ ತೊಡಗಿದ್ದೇನೆ ಎಂದು ಸ್ಮರಿಸಿದರು.

ಶಿಕ್ಷಣ ಚಿಂತಕ ಎಸ್.ಬಿ.ಶಂಕರಗೌಡ ಮಾತನಾಡಿ, ಜೆ.ಪಾಪೇಗೌಡರನ್ನು ಹತ್ತಿರದಿಂದ ನೋಡಿದ್ದೇನೆ. ಒಬ್ಬ ಒಳ್ಳೆಯ ಆಡಳಿತಗಾರ, ವೃತ್ತಿ ಕ್ಷೇತ್ರದಲ್ಲಿ ಶಿಸ್ತಿನಿಂದ ಮೌನವಾಗಿ ನಡೆದ ಉತ್ತಮ ವ್ಯಕ್ತಿ. ಪ್ರೊ.ಜಯಪ್ರಕಾಶಗೌಡ ಅವರು ಪಾಪೇಗೌಡರಿಂದ ಕಲಿಯಬೇಕಾದ ವಿಷಯಗಳು ಸಾಕಷ್ಟಿವೆ. ಏಕೆಂದರೆ ಪಾಪೇಗೌಡರನ್ನು ಆಯಾ ಕಾಲೇಜಿನ ಉಪನ್ಯಾಸಕರಾಗಲಿ ಅಥವಾ ಆಡಳಿತವರ್ಗವೇ ಇರಲಿ, ಅವರು ಬಂದರೆ ಮೌನವಾಗಿ ಗೌರವ ಸಲ್ಲಿಸುತ್ತಿದ್ದ ಸನ್ನಿವೇಶಗಳು ಹೆಚ್ಚಿದ್ದವು ಎಂದು ತಿಳಿಸಿದರು.

ಮಾಜಿ ಶಾಸಕ ಎಂ.ಶ್ರೀನಿವಾಸ್ ಅಧ್ಯಕ್ಷತೆ ವಹಿಸಿದ್ದರು. ಆನಂದ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ಗಿಣಿಸ್ವಾಮಿ, ಜೆಡಿಎಸ್ ಮಹಿಳಾ ಘಟಕದ ರಾಜ್ಯಾಧ್ಯಕ್ಷೆ ರಶ್ಮಿ ರಾಮೇಗೌಡ, ದತ್ತಿ ದಾನಿ ಕುಟುಂಬದ ಮಂಜುಳಾ ಉದಯಶಂಕರ್, ಕರ್ನಾಟಕ ಸಂಘದ ಕಾರ್ಯದರ್ಶಿ ಲೋಕೇಶ್ ಚಂದಗಾಲು ಭಾಗವಹಿಸಿದ್ದರು.