ಯುವ ಪ್ರತಿಭೆಗಳಿಗೆ ಬೇಕಿದೆ ದೊಡ್ಡ ವೇದಿಕೆ: ವಿಧಾನ ಪರಿಷತ್ ಮಾಜಿ ಸದಸ್ಯ ಕೆ.ಟಿ. ಶ್ರೀಕಂಠೇಗೌಡ ಅಭಿಮತ

ಇಲ್ಲಿನ ಸುಭಾಸ್‌ನಗರದಲ್ಲಿರುವ ದೇವರಕಾಡು ಉದ್ಯಾನದಲ್ಲಿ ಪ್ರತಿಭಾಂಜಲಿ ಸುಗಮ ಸಂಗೀತ ಅಕಾಡೆಮಿಯ ಬೆಳ್ಳಿ ಹಬ್ಬದ ಪ್ರಯುಕ್ತ ವರನಟ ಡಾ.ರಾಜಕುಮಾರ್ ಜನ್ಮದಿನದ ಅಂಗವಾಗಿ ಆಯೋಜಿಸಲಾಗಿದ್ದ ‘ಎಲ್ಲೆಲ್ಲಿ ನೋಡಲಿ ನಿನ್ನನ್ನೇ ಕಾಣುವೆ’ ಅಣ್ಣಾವ್ರ ಗೀತೆಗಳ ಗಾಯನ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಸಂಗೀತಕ್ಕೆ ಮನಸೊಲದವರಿಲ್ಲ. ದೇವರಕಾಡು ಉದ್ಯಾನದಲ್ಲಿ ಹಲವು ವಿಶೇಷ ಬಗೆಯ ಗಿಡ ಮರಗಳನ್ನು ಎಲ್ಲರ ಸಹಕಾರದಿಂದ ಬೆಳೆಸುವ ಮೂಲಕ ಸಾರ್ವಜನಿಕರಿಗೆ ವಿಶ್ರಾಂತಿ ತಾಣ ರೂಪಿಸಲಾಗಿದೆ. ಇಲ್ಲಿ ಅರೋಗ್ಯಕರ ಗಾಳಿ ಸಿಗುವಂತಾಗಿದೆ ಎಂದು ನುಡಿದರು.

ಡಾ.ರಾಜ್ ಕನ್ನಡದ ಸಾಕ್ಷಿ ಪ್ರಜ್ಞೆ. ಕನ್ನಡ ಭಾಷೆಯ ಉಳಿವು ಮತ್ತು ಬೆಳವಣಿಗೆಯಲ್ಲಿ ಅವರ ಕೊಡುಗೆ ಅವಿಸ್ಮರಣೀಯ. 42 ವರ್ಷದ ಹಿಂದೆ ನಡೆದ ಗೋಕಾಕ್ ಚಳವಳಿಯಲ್ಲಿ ಭಾಗವಹಿಸುವ ಮೂಲಕ ಎಲ್ಲರ ಸಹಕಾರದೊಂದಿಗೆ, ಚಳವಳಿಯನ್ನೇ ಹೊಸ ದಿಕ್ಕಿಗೆ ಕೊಂಡೊಯ್ದು ಕನ್ನಡ ಭಾಷೆಗಿದ್ದ ಕಂಟಕ ನಿವಾರಣೆ ಮಾಡಿ ಹೊಸ ಭಾಷ್ಯ ಬರೆದ ಅಪ್ರತಿಮ ಕನ್ನಡ ಪ್ರೇಮಿ. ಇದನ್ನ ಅರಿತೇ ಅಂದೇ ರಾಷ್ಟ್ರಕವಿ ಕುವೆಂಪು ಅವರು ಕನ್ನಡ ಪ್ರಜ್ಞೆ ಉಳಿಸಲು ಡಾ.ರಾಜ್ ಬೇಕೇ ಬೇಕು ಎಂದಿದ್ದನ್ನು ಸ್ಮರಿಸಬಹುದಾಗಿದೆ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಕನ್ನಡ ಪರಿಚಾರಕ ಕೆ.ಟಿ.ಹನುಮಂತು ಮಾತನಾಡಿ, ಡಾ.ರಾಜ್ ಎಂದರೆ ಕನ್ನಡ, ಕನ್ನಡ ಎಂದರೆ ಡಾ.ರಾಜ್. ಕನ್ನಡ ಭಾಷೆಗೂ ಅವರಿಗೂ ಅವಿನಾವಭಾವ ಸಂಬಂಧ. 206 ಚಲನಚಿತ್ರಗಳಲ್ಲಿ ನಟಿಸಿದ್ದರೂ ಕನ್ನಡ ಬಿಟ್ಟು ಬೇರೆ ಯಾವುದೇ ಭಾಷೆಗಳಲ್ಲಿ ನಟಿಸಲಿಲ್ಲ. ಕನ್ನಡ ಭಾಷೆಯ ಉಳಿವಿಗಾಗಿ ಎಂಥದ್ದೇ ತ್ಯಾಗಕ್ಕೂ ಸಿದ್ಧರಿದ್ದರು ಎಂದು ಸ್ಮರಿಸಿದರು.

ಮೈಸೂರು ವಿಶ್ವವಿದ್ಯಾಲಯ ಡಾ.ರಾಜ್ ಅವರಿಗೆ ಗೌರವ ಡಾಕ್ಟರೇಟ್ ನೀಡಿದಾಗ, ನಾಲ್ಕನೇ ತರಗತಿ ಓದಿರುವ ನನಗ್ಯಾಕೆ ಡಾಕ್ಟರೇಟ್ ಎಂದು ತಮ್ಮನ್ನು ತಾವೇ ಗೇಲಿ ಮಾಡಿಕೊಂಡಿದ್ದ ಸರಳ ಸಜ್ಜನಿಕೆಯ ಸಾಕಾರಮೂರ್ತಿ. ನಡೆ -ನುಡಿ ಎರಡೂ ಒಂದೇ ಆಗಿತ್ತು. ಅಭಿಮಾನಿಗಳನ್ನು ದೇವರೆಂದು ಕರೆದ ನಟ ಸಂತ. ಹಾಗಾಗಿಯೇ ರಾಜ್ ಕನ್ನಡಿಗರ ಹೃದಯ ಸಿಂಹಾಸನದಲ್ಲಿ ಶಾಶ್ವತವಾಗಿ ನೆಲೆಸಿದ್ದಾರೆ. ಅಭಿಮಾನಿಗಳ ನೂರಾರು ಬಿರುದುಗಳನ್ನು ನೀಡಿ ಡಾ.ರಾಜ್ ಅಭಿಮಾನಿ ಸಂಘ ಕಟ್ಟಿ ಬದುಕಿರುವಾಗಲೇ ದಂತ ಕಥೆಯಾದವರು ಡಾ.ರಾಜ್. ಅವರಿಗೆ ಪದ್ಮಭೂಷಣ, ದಾದಾ ಫಾಲ್ಕೆ ಪ್ರಶಸ್ತಿಗಳ ಜತೆಗೆ ರಾಜ್ಯ ಸರ್ಕಾರ ಕರ್ನಾಟಕ ರತ್ನ ಪ್ರಶಸ್ತಿ ನೀಡಿ ಗೌರವಿಸಿದೆ ಎಂದರು.

ಚಿಂತಕ ಅರವಿಂದ್ ಪ್ರಭು ಮಾತನಾಡಿ, ಇತ್ತೀಚಿನ ಪರಿಸ್ಥಿತಿಯ ಸೂಕ್ಷ್ಮತೆಯನ್ನು ಗಮನಿಸಿದರೆ ಕನ್ನಡ ಭಾಷಾ ಉಳಿವಿಗಾಗಿ ಮತ್ತೊಂದು ಗೋಕಾಕ್ ರೀತಿಯ ಚಳವಳಿಯ ಅವಶ್ಯಕತೆ ಇದೆ. ಡಾ.ರಾಜ್ ಸಿನಿಮಾಗಳಲ್ಲಿ ಜೀವನದ ಮೌಲ್ಯಗಳನ್ನು ಕಾಣಬಹುದಾಗಿದೆ. ಜನಸಾಮಾನ್ಯರ ನಾಯಕ ಡಾ.ರಾಜ್ ಎಂದು ಅಭಿಪ್ರಾಯಪಟ್ಟರು.

ಆರ್‌ಎಪಿಸಿಎಂಎಸ್ ನಿರ್ದೇಶಕಿ ಅಂಜನಾ ಶ್ರೀಕಾಂತ್, ಜಿಲ್ಲಾ ಕಾಂಗ್ರೆಸ್ ಕಾರ್ಯಾಧ್ಯಕ್ಷ ಎಂ.ಎಸ್.ಚಿದಂಬರ, ಮಹೇಶ್, ಅಭಿಜಿತ್, ನಂದ, ಎಂ.ಎಸ್.ಅಭಿಲಾಷ್ ಉಪಸ್ಥಿತರಿದ್ದರು. ಇದೇ ಸಂದರ್ಭದಲ್ಲಿ ಪ್ರತಿಭಾಂಜಲಿ ಡೇವಿಡ್ ಸುಗಮ ಸಂಗೀತ ಅಕಾಡೆಮಿ ನಡೆದು ಬಂದ ಬಗ್ಗೆ ಪ್ರಾಸ್ತಾವಿಕವಾಗಿ ಮಾತನಾಡಿದರು.

ಸಂಗೀತ ಕಾರ್ಯಕ್ರಮದಲ್ಲಿ ಅಕಾಡೆಮಿ ಗಾಯಕರಾದ ಶಂಕರ್, ಡಾ.ವರ್ಷಾ ಹೂಗಾರ್, ಐಶ್ವರ್ಯಾ, ಮೋಹನ್, ಹಂಸಾ, ಸುಮತಿ, ವಂದನಾ, ಸರಿತಾ, ಶಶಿಕಲಾ, ವಿಶ್ವಾಸ್, ಕರಣ್ ವೀರ್ ತಂಡ ಡಾ.ರಾಜಕುಮಾರ್ ಹಾಡಿರುವ ಹಾಗೂ ನಟಿಸಿರುವ ಚಿತ್ರಗಳ, ಹೊಸ ಬೆಳಕು ಮೂಡುತ್ತಿದೆ, ಅಮ್ಮಾ ನೀನು ನನಗಾಗಿ, ಕಲ್ಲೇಟಿಗಿಂತ ನಿನ್ನ, ಗಂಗಾ ಯಮುನಾ ಸಂಗಮ, ಚಂದಿರ ತಂದ ಹುಣ್ಣಿಮೆ ರಾತ್ರಿ, ನೀನೆಲ್ಲೋ ನಾನಲ್ಲೇ, ಆಡಿಸಿದಾತ ಬೇಸರ ಮೂಡಿ, ಕುಲದಲ್ಲಿ ಕೀಳ್ಯಾವುದೋ, ಹುಟ್ಟಿದರೆ ಕನ್ನಡ ನಾಡಲ್ಲಿ ಹುಟ್ಟಬೇಕು, ಹೀಗೆ ಚಲನಚಿತ್ರ ಗೀತೆಗಳನ್ನು ಹಾಡಿದರು.