ನಗರದಲ್ಲಿ ಸಂಕ್ರಾಂತಿ ಹಬ್ಬದ ಸಂಭ್ರಮ: ನೇಗಿಲಯೋಗಿ ಸಮಾಜ ಸೇವಾ ಟ್ರಸ್ಟಿನಿಂದ ಆಚರಣೆ

ಸುಗ್ಗಿ ಹಬ್ಬದ ಅಂಗವಾಗಿ ಜೋಡಿ ಎತ್ತುಗಳಿಂದ ಕಿಚ್ಚು ಹಾಯಿಸಲಾಯಿತು. ನಂತರ ದೇವಿಪೂಜೆ, ಗೋಪೂಜೆ, ಅಲಂಕಾರಗೊಂಡ ರಾಶಿ ಪೂಜೆ ನೆರವೇರಿಸಲಾಯಿತು. ಬಳಿಕ ಸಾಂಪ್ರದಾಯಿಕ ಉಡುಗೆ ಸ್ಪರ್ಧೆ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು.

ಕಾರ್ಯಕ್ರಮದ ಸಾನಿಧ್ಯ ವಹಿಸಿ ಮಾತನಾಡಿದ ಕೆಂಗೇರಿ ವಿಶ್ವ ಒಕ್ಕಲಿಗರ ಮಹಾಸಂಸ್ಥಾನ ಮಠದ ಪೀಠಾಧ್ಯಕ್ಷ ಡಾ.ನಿಶ್ಚಲಾನಂದನಾಥ ಸ್ವಾಮೀಜಿ, ಸಂಕ್ರಾಂತಿ ರೈತಸಂಸ್ಕೃತಿಯ ಕ್ರಾಂತಿ ಉಂಟುಮಾಡುವ ನೆಲಮೂಲ ಹಬ್ಬ. ಸಂಕ್ರಾಂತಿ ಒಕ್ಕಲುತನದ ಧ್ಯೂತಕ, ರೈತರು ಬೆಳೆದ ಭತ್ತ, ರಾಗಿ ರಾಶಿಯಲ್ಲಿ ತನಗೆ ನೆರವಾಗುವವರಿಗೆ ಮೊರದಲ್ಲಿ ತುಂಬಿಕೊಡುವ ದಾನ ಮಾಡುವ ಸಂಸ್ಕಾರ ಇತ್ತು. ಆಧುನಿಕತೆ ಬೆಳೆದಂತೆ ಕಣದಲ್ಲಿ ಒಕ್ಕಣೆ, ರಾಶಿಪೂಜೆ, ಸಂಕ್ರಾಂತಿ ಸೊಗಡು, ಕುಟುಂಬ-ನೆರೆಹೊರೆಯವರ ಸಂಭ್ರಮ ಮಾಯವಾಗುತ್ತಿದೆ ಎಂದು ನುಡಿದರು.

ಇಂದಿನ ರೈತರು ಲಾಭದಾಯಕ ಆಧುನಿಕಕೃಷಿ ಪದ್ದತಿ, ಸಾವಯವ ಕೃಷಿ, ಬಹುಬೆಳೆ ಬೆಳೆಯುವ ತಂತ್ರಜ್ಞಾನ, ಯಂತ್ರಜ್ಞಾನ ಪದ್ದತಿಯನ್ನು ಅನುಸರಿಸಿ, ಕೃಷಿಯನ್ನೇ ಲಾಭದಾಯಕ ಉದ್ಯಮವನ್ನಾಗಿಸಿಕೊಳ್ಳುವ ತಾಂತ್ರಿಕಜ್ಞಾನ, ಕೌಶಲಜ್ಞಾನವನ್ನು ಹೆಚ್ಚಿಸಿಕೊಳ್ಳಬೇಕಿದೆ ಎಂದು ಸಲಹೆ ನೀಡಿದರು.

ರೈತ ತನ್ನ ಭೂಮಿಯಲ್ಲಿ ಬೆಳೆಯೊಂದಿಗೆ ಮನೆಗೆ ಬೇಕಾದ ಕಾಳು ಕಡ್ಡಿ, ಸೊಪ್ಪು, ತರಕಾರಿ ಬೆಳೆಯುತ್ತಿದ್ದರು. ಮನೆಯಲ್ಲಿಯೇ ರಾಸುಗಳೊಂದಿಗೆ ಎಮ್ಮೆ, ಕೋಳಿ, ಕುರಿ, ಆಡು, ಬೆಕ್ಕು, ನಾಯಿ ಸಾಕುತ್ತಿದ್ದರು. ಆರ್ಥಿಕ ಕಷ್ಟ ಬಂದಾಗ, ಕೋಳಿ, ಕುರಿ, ಆಡು ಮಾರಿ ಹಬ್ಬ ಹರಿದಿನ ಮಾಡುತ್ತಿದ್ದರು. ಆದರೆ ಇಂದು ತುಂಬ ವಿರಳವಾಗಿವೆ. ಎಳ್ಳು ಬೆಲ್ಲ ತಿಂದು ಒಳ್ಳೆಯ ಮಾತಾಡಿ ಎಂಬ ಸಂದೇಶದ ಜತೆಗೆ ಸಾಮರಸ್ಯ ಮತ್ತು ಪ್ರೀತಿಯನ್ನು ಬೆಳೆಸುತ್ತದೆ. ಆಯುರ್ವೇದದ ಪ್ರಕಾರ ಈ ಹವಾಮಾನ ಬದಲಾವಣೆಯ ಸಮಯದಲ್ಲಿ ಎಳ್ಳು ಮತ್ತು ಬೆಲ್ಲದ ಸೇವನೆಯು ದೇಹಕ್ಕೆ ಅಗತ್ಯವಾದ ಉಷ್ಣತೆ ಮತ್ತು ಪೋಷಕಾಂಶಗಳನ್ನು ನೀಡುತ್ತದೆ ಎಂದು ಹೇಳಿದರು.

ಆದಿಚುಂಚನಗಿರಿ ಶಿಕ್ಷಣ ಟ್ರಸ್ಟ್ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮಾನಂದನಾಥ ಸ್ವಾಮೀಜಿ ಮಾತನಾಡಿದರು. ನೇಗಿಲ ಯೋಗಿ ಸಮಾಜ ಸೇವಾ ಟ್ರಸ್ಟ್ ಜಿಲ್ಲಾಧ್ಯಕ್ಷ ಎ.ಸಿ.ರಮೇಶ್, ಮೈಸೂರು ಮಹಿಳಾ ಘಟಕ ಅಧ್ಯಕ್ಷೆ ಶೋಭಾ, ಜಿಲ್ಲಾಧ್ಯಕ್ಷೆ ಶಕುಂತಲಾ, ನಗರಸಭೆ ಮಾಜಿ ಸದಸ್ಯೆ ಮೀನಾಕ್ಷಿ, ರಾಷ್ಟ್ರೀಯ ಯುವ ಪ್ರಶಸ್ತಿ ಪುರಸ್ಕೃತೆ ಬಿ.ಎಸ್.ಅನುಪಮಾ, ಮಂಜುಳಾ, ಶೋಭಾ, ಚೇತನಾ, ಜಲಜಾ, ಯೋಗಗುರು ರಮೇಶ್, ಕೃಷ್ಣೇಗೌಡ ಕೀಲಾರ, ಬಸವರಾಜು ಮತ್ತಿತರರಿದ್ದರು.