ಆರ್‌ಎಸ್‌ಎಸ್‌ನಲ್ಲಿ ಯಾವುದೇ ಜಾತಿ ಭೇದವಿಲ್ಲ: ಉತ್ತರ ಮತ್ತು ದಕ್ಷಿಣ ಪ್ರಚಾರ ಪ್ರಮುಖ್ ಅರುಣ್‌ಕುಮಾರ್ ಹೇಳಿಕೆ

ನಗರದ ಕಮಲ ಮಂದಿರದಲ್ಲಿ ಮಂಥನ ಮಂಡ್ಯ ವೈಚಾರಿಕ ವೇದಿಕೆಯಿಂದ ಆಯೋಜಿಸಿದ್ದ ಆರ್‌ಎಸ್‌ಎಸ್-100 ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ನಮಗೆ ಹಿಂದೂ ಧರ್ಮ. ಈ ನೆಲದ ಸಂಸ್ಕೃತಿ, ಆಚಾರ-ವಿಚಾರಗಳು, ಪರಂಪರೆ ಮುಖ್ಯ. ಅದೆಲ್ಲವನ್ನೂ ಬಿಜೆಪಿ ಒಪ್ಪಿಕೊಂಡಿದೆ. ಅದರಿಂದಾಗಿಯೇ ಬಿಜೆಪಿ ಆರ್‌ಎಸ್‌ಎಸ್‌ನ ಒಂದು ಭಾಗವಾಗಿದೆ. ಇದೀಗ ಜೆಡಿಎಸ್ ಕೂಡ ಹಿಂದುತ್ವವನ್ನು ಒಪ್ಪಿಕೊಂಡು ಬಂದಿರುವುದರಿಂದ ಬಿಜೆಪಿಯೊಂದಿಗೆ ಮೈತ್ರಿ ಮಾಡಿಕೊಳ್ಳಲಾಗಿದೆ. ಮುಂದೆ ಕಾಂಗ್ರೆಸ್ ಕೂಡ ಹಿಂದೂ ಧರ್ಮ-ಸಂಸ್ಕೃತಿಯನ್ನು ಒಪ್ಪಿ ಬಂದರೆ ಅವರನ್ನೂ ನಾವು ಮುಕ್ತವಾಗಿ ಸ್ವೀಕರಿಸುವುದಾಗಿ ಹೇಳಿದರು.

ಆರ್‌ಎಸ್‌ಎಸ್‌ನಲ್ಲಿ ಜಾತಿ-ಬೇಧ ಮಾಡುತ್ತಾರೆಂಬುದು ಅಪ್ಪಟ ಸುಳ್ಳು. ಯಾರು ಬೇಕಾದರೂ ಸಂಘವನ್ನು ಸೇರುವುದಕ್ಕೆ ಅವಕಾಶವಿದೆ. ಸಂಘಕ್ಕೆ ಸೇರಿಸಿಕೊಳ್ಳುವಾಗ ಜಾತಿ ಗುರುತಿಸಿ ಸೇರಿಸಿಕೊಳ್ಳುವ ಪದ್ಧತಿಯೇ ಇಲ್ಲ. ಸಂಘ ಕಂಡರೆ ಆಗದವರು ಸುಮ್ಮನೆ ಅಪಪ್ರಚಾರ ಮಾಡುತ್ತಿದ್ದಾರೆ. ಹಿಂದೆ ನಿಂತು ನಿಂದಿಸುವವರು ಸಂಘ ಸೇರಿ ನಮ್ಮ ಕಾರ್ಯಚಟುವಟಿಕೆಗಳನ್ನು ತಿಳಿಯಲಿ. ಆನಂತರ ಅಭಿಪ್ರಾಯಗಳನ್ನು ತಿಳಿಸಲಿ. ಸಂಘದ ಕಾರ್ಯವೈಖರಿಯೇ ತಿಳಿಯದೆ ಕುರುಡುತನದಿಂದ ಟೀಕಿಸಬಾರದು ಎಂದು ತಿಳಿಸಿದರು.

ಆರ್‌ಎಸ್‌ಎಸ್ ನೋಂದಣಿಯಾಗಿಲ್ಲ ನಿಜ. ಆದರೆ, ನಮ್ಮ ಲೆಕ್ಕ-ಪತ್ರಗಳೆಲ್ಲವೂ ಪಕ್ಕಾ ಇದೆ. ಪ್ರತಿ ವರ್ಷ ಆಡಿಟ್ ನಡೆಯುತ್ತದೆ. ಒಂದು ಪೈಸೆಯೂ ವ್ಯರ್ಥವಾಗದಂತೆ ಲೆಕ್ಕ ಇಡಲಾಗುತ್ತಿದೆ. ಅದನ್ನು ಯಾರು ಬೇಕಾದರೂ ಪರಿಶೀಲನೆ ನಡೆಸಬಹುದು. ನಮ್ಮಲ್ಲಿ ಎಲ್ಲವೂ ಮುಕ್ತ ಹಾಗೂ ಪಾರದರ್ಶಕವಾಗಿದೆ. ಸಂವಿಧಾನದಡಿಯಲ್ಲೇ ಸಂಘ ನಿಯಮ ಮತ್ತು ಕಾನೂನುಬದ್ಧವಾಗಿ ನಡೆಯುತ್ತಿದೆ. ಕಾನೂನು ವಿರೋಯಾಗಿ ನಡೆಯುತ್ತಿರುವ ಒಂದೇ ಒಂದು ಸಾಕ್ಷಿ ನೀಡುವಂತೆ ಸವಾಲು ಹಾಕಿದರು.

ಜಿಲ್ಲಾ ಕಾರ್ಯವಾಹ ಅವಿನಾಶ್, ಮಂಥನ ಜಿಲ್ಲಾ ಪ್ರಮುಖ್ ಪ್ರದೀಪ್‌ರೆಡ್ಡಿ ಇದ್ದರು.