ಮಂಡ್ಯ

ರಾಗಿ ಸಂಶೋಧನೆಯಲ್ಲಿ ಲಕ್ಷ್ಮಣಯ್ಯ ಕ್ರಾಂತಿ: ಕೃಷಿ ವಿಜ್ಞಾನಗಳ ವಿವಿ ಕುಲಪತಿ ಡಾ.ಕೆ.ಸಿ.ನಾರಾಯಣಸ್ವಾಮಿ ಬಣ್ಣನೆ

ಮಂಡ್ಯ ತಾಲೂಕು ವಿ.ಸಿ ಫಾರಂನಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಸಾಧಕರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಮಂಡ್ಯ ತಾಲೂಕು ವಿ.ಸಿ ಫಾರಂನಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಸಾಧಕರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಕೆ.ಎನ್.ರಾಘವೇಂದ್ರ
Published on: 

ಪ್ರಮುಖ ಮುಖ್ಯಾಂಶಗಳು

  • ವಿ.ಸಿ ಫಾರಂನಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ
  • ರಾಗಿ ಲಕ್ಷ್ಮಣಯ್ಯ ಸ್ಮಾರಕ ಸಮಿತಿ ಮತ್ತು ಕೃಷಿ ವಿವಿ ಸಹಯೋಗದಲ್ಲಿ ಆಯೋಜನೆ
ಮಂಡ್ಯ: ದೇಶದಲ್ಲಿ ಆಹಾರದ ಕೊರತೆ ಎದುರಾದ ಸಂದರ್ಭದಲ್ಲಿ ರಾಜ್ಯದಲ್ಲಿ ಸಿ.ಎಚ್.ಲಕ್ಷ್ಮಣಯ್ಯ ರಾಗಿ ಸಂಶೋಧನೆಯಲ್ಲಿ ಕ್ರಾಂತಿ ಮಾಡಿದರು. ಅವರು ಸಂಶೋಧನೆ ಮಾಡಿದ ರಾಗಿ ಇಂದಿಗೂ ಉತ್ತಮ ತಳಿಯಾಗಿವೆ ಎಂದು ಕೃಷಿ ವಿಜ್ಞಾನಗಳ ವಿವಿ ಕುಲಪತಿ ಡಾ.ಕೆ.ಸಿ.ನಾರಾಯಣಸ್ವಾಮಿ ಶ್ಲಾಘಿಸಿದರು.
ತಾಲೂಕಿನ ವಿ.ಸಿ ಫಾರಂನ ಕೃಷಿ ವಿವಿಯ ನಾಲ್ವಡಿ ಕೃಷ್ಣರಾಜ ಒಡೆಯರ್ ಸಭಾಂಗಣದಲ್ಲಿ ರಾಗಿ ಲಕ್ಷ್ಮಣಯ್ಯ ಸ್ಮಾರಕ ಸಮಿತಿ ಮತ್ತು ಕೃಷಿ ವಿವಿ ಸಹಯೋಗದಲ್ಲಿ ಆಯೋಜಿಸಿದ್ದ 29 ಮತ್ತು 30ನೇ ವರ್ಷದ ಸ್ಮಾರಕ ಉಪನ್ಯಾಸ ಹಾಗೂ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದ ಅವರು, 1960ರಲ್ಲಿ ದೇಶದಲ್ಲಿ ಆಹಾರದ ಸಮಸ್ಯೆ ಕಾಡಿತ್ತು. ಅಂದು ಬೇರೆ ದೇಶದಿಂದ ಆಹಾರ ಪದಾರ್ಥವನ್ನು ರಫ್ತು ಮಾಡಿಕೊಳ್ಳಬೇಕಾದ ಅನಿವಾರ್ಯತೆ ಇದೆ. ಅಂತಹ ಸಮಯದಲ್ಲಿ ಹೆಚ್ಚು ಇಳುವರಿ ನೀಡುವ ಗೋಧಿ ಮತ್ತು ಭತ್ತದ ತಳಿಗಳನ್ನು ಅಭಿವೃದ್ಧಿಪಡಿಸಿ ಎಂ.ಎಸ್.ಸ್ವಾಮಿನಾಥನ್ ಅವರು ಭಾರತದಲ್ಲಿ ’ಹಸಿರು ಕ್ರಾಂತಿಯ ಪಿತಾಮಹ’ ಎಂದೆನಿಸಿಕೊಂಡರು. ಅದೇ ಕಾಲಘಟ್ಟದಲ್ಲಿ ಹೆಚ್ಚು ಇಳುವರಿ ನೀಡುವ ರಾಗಿ ತಳಿಗಳನ್ನು ಅನ್ವೇಷಿಸಿದ ಸಿ.ಎಚ್.ಲಕ್ಷ್ಮಣಯ್ಯ ಅವರು ರಾಗಿ ಬ್ರಹ್ಮ ಖ್ಯಾತಿಗೆ ಪಾತ್ರರಾದರು ಎಂದು ಹೇಳಿದರು.
ನಾವು ಕೃಷಿ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಮೂವರನ್ನು ಎಂದಿಗೂ ಸ್ಮರಿಸಬೇಕು. ಅದರಂತೆ ವಿ.ಸಿ ಫಾರಂನಲ್ಲಿ 1931ರಲ್ಲಿ ಕಬ್ಬು ಸಂಶೋಧನಾ ಕೇಂದ್ರ ಆರಂಭಿಸಿದ ನಾಲ್ವಡಿ ಕೃಷ್ಣರಾಜ ಒಡೆಯರ್, ದೇಶಿ ಕೃಷಿಗೆ ಅಪೂರ್ವ ಕಾಣಿಕೆ ನೀಡಿದ ಲೆಸ್ಲಿ ಚಾರ್ಲ್ಸ್ ಕೋಲ್ಮನ್ ಮತ್ತು ರಾಗಿ ಕ್ಷೇತ್ರದಲ್ಲಿ ಕ್ರಾಂತಿಯನ್ನೇ ಸೃಷ್ಟಿಸಿದ ರಾಗಿ ಲಕ್ಷ್ಮಣಯ್ಯ ಅವರ ಸಾಧನೆಗಳನ್ನು ನಾವೆಲ್ಲರೂ ಇಂದು ಸ್ಮರಿಸಬೇಕಿದೆ. ರಾಗಿ ಲಕ್ಷ್ಮಣಯ್ಯ ಅವರು 1964ರಲ್ಲಿ ಆಫ್ರಿಕಾದಿಂದ ತರಿಸಿದ ತಳಿಯನ್ನು ಇಲ್ಲಿಯ ಸ್ಥಳೀಯ ತಳಿಯೊಂದಿಗೆ ಸೇರಿಸಿ ಉತ್ಪತ್ತಿ ಮಾಡಿದ ಇಂಡಾಫ್ ತಳಿಗಳಿಂದ ರಾಗಿ ಉತ್ಪತ್ತಿ ಹೆಚ್ಚಾಯಿತು. ರಾಗಿ ಬೇಸಾಯದಲ್ಲಿ ಹೊಸ ಪ್ರಯೋಗ ಕೈಗೊಂಡರು. ರಾಗಿ ತಳಿ ಬಿಡುಗಡೆಯಾದ ನಂತರ ರೈತರ ಬದುಕು ಹಸನಾಯಿತು. ಬಡವರ ಧಾನ್ಯಕ್ಕೆ ಘನತೆಯನ್ನು ತಂದುಕೊಟ್ಟರು ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಬೆಳೆ ಸುಧಾರಣೆ ಮತ್ತು ರೈತ ಸಮೃದ್ಧಿ ವಿಷಯ ಕುರಿತು ಉಪನ್ಯಾಸ ನೀಡಿದ ಸಸ್ಯತಳಿ ವಿಜ್ಞಾನಿ ಡಾ.ಶರಣ ಬಸವೇಶ್ವರ ಅಂಗಡಿ, ರೈತರಿಂದ ಬೆಳೆ ಸುಧಾರಣೆ ವಿಕಾಸ ಆರಂಭವಾಯಿತು. ಉತ್ತಮ ಬಿತ್ತನೆ ಬೀಜ ಸಂಗ್ರಹಿಸಿ, ಬೆಳೆಯುವ ಪದ್ಧತಿ ರೂಢಿಸಿಕೊಂಡರು. ಸಸ್ಯಗಳ ಅನುವಂಶಿಕ ಸುಧಾರಣೆ ಮೊದಲು ಕಲೆಯಾಗಿತ್ತು, ನಂತರ ವಿಜ್ಞಾನವಾಯಿತು. ಈಗ ವ್ಯವಹಾರವಾಗಿದೆ. ಮಾರುಕಟ್ಟೆ ಆಧಾರಿತ ಸಸ್ಯ ಸಂವರ್ಧನೆ ಈಗ ಪ್ರಚಲಿತದಲ್ಲಿದೆ ಎಂದು ತಿಳಿಸಿದರು.
ಲೆಸ್ಲಿ ಚಾರ್ಲ್ಸ್ ಕೋಲ್ಮನ್ ಕುರಿತು ಬರೆದ ಸಾಹಿತಿ ಪ್ರೊ.ಎಂ.ನಾರಾಯಣಸ್ವಾಮಿ ಅವರ ಪುಸ್ತಕವನ್ನು ಬಿಡುಗಡೆ ಮಾಡಲಾಯಿತು. ರಾಗಿ ಲಕ್ಷ್ಮಣಯ್ಯ ಸ್ಮಾರಕ ಸಮಿತಿ ಅಧ್ಯಕ್ಷ ಕೆ.ಬೋರಯ್ಯ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ರೈತ ಹೋರಾಟಗಾರ್ತಿ ಸುನಂದಾ ಜಯರಾಂ, ಸಮಿತಿಯ ಸದಸ್ಯರು, ರೈತರು ಮತ್ತು ಕೃಷಿ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ಇದೇ ವೇಳೆ ಕೆ.ಆರ್.ಪೇಟೆ ತಾಲೂಕು ಯರಗನಹಳ್ಳಿಯ ಚಲುವಯ್ಯ, ದೊಡ್ಡಸೋಮನಹಳ್ಳಿಯ ತನುಜಾ ಅವರಿಗೆ ಸಿ.ಎಚ್.ಲಕ್ಷ್ಮಣಯ್ಯ ಹೆಸರಿನಲ್ಲಿ ರಾಗಿ ಪ್ರಶಸ್ತಿ, ಕೋಮನಹಳ್ಳಿಯ ಕೆ.ಎ.ಮಂಜೇಗೌಡ, ಮಂಡ್ಯ ತಾಲೂಕು ಕಾರಸವಾಡಿ ಗ್ರಾಮದ ಎಂ.ಪುಟ್ಟಮಲ್ಲೇಗೌಡ ಅವರಿಗೆ ಭತ್ತ ಪ್ರಶಸ್ತಿ ಹಾಗೂ ಮದ್ದೂರು ತಾಲೂಕು ಸಬ್ಬನಹಳ್ಳಿಯ ಆರ್.ಸಂತೋಷ್‌ಕುಮಾರ್‌ಗೆ ರೈತ ಹಾಲು ಪ್ರಶಸ್ತಿ, ವಿ.ಸಿ ಫಾರಂ ಕೃಷಿ ಕಾಲೇಜಿನ ವಿದ್ಯಾರ್ಥಿಗಳಾದ ಟಿ.ಎಂ.ಅಪರ್ಣಾ ಮತ್ತು ಆರ್.ಸ್ಫೂರ್ತಿ ಅವರಿಗೆ ಕೆ.ಕೆ. ಅವಧಾನಿ ವಿದ್ಯಾರ್ಥಿ ಪ್ರಶಸಿ ನೀಡಿ ಅಭಿನಂದಿಸಲಾಯಿತು.

ರಾಗಿಯೊಂದಿಗೆ ಭಾವನಾತ್ಮಕ ಸಂಬಂಧ
ಪ್ರಾಸ್ತಾವಿಕವಾಗಿ ಮಾತನಾಡಿದ ರಾಗಿ ಲಕ್ಷ್ಮಣಯ್ಯ ಅವರ ಪುತ್ರ, ನಿವೃತ್ತ ಸಹ ಪ್ರಾಧ್ಯಾಪಕ ಎಚ್.ಎಲ್.ವಸಂತಕುಮಾರ, 1949ರಿಂದ 1984ರವರೆಗೆ ವಿ.ಸಿ ಫಾರಂ ಅನ್ನು ಕರ್ಮಭೂಮಿಯನ್ನಾಗಿ ಮಾಡಿಕೊಂಡಿದ್ದ ರಾಗಿ ಲಕ್ಷ್ಮಣಯ್ಯ ಅವರು ಬೆಳೆಗಳ ವಸ್ತುಸಂಗ್ರಹಾಲಯ ಸ್ಥಾಪಿಸುವ ಕನಸು ಕಂಡಿದ್ದರು. ವಿಶೇಷವಾಗಿ ರಾಗಿಯೊಂದಿಗೆ ಭಾವನಾತ್ಮಕ ಸಂಬಂಧ ಹೊಂದಿದ್ದರು. ನಿಧನರಾಗುವ ಕೆಲ ದಿನದ ಮುನ್ನ ನನ್ನ ಹೆಣವನ್ನು ಸುಡಬೇಡಿ. ಬದಲಿಗೆ ಮಣ್ಣು ಮಾಡಿ. ಆದರೆ ಗುಂಡಿಯೊಳಗಿರುವ ತನ್ನ ದೇಹಕ್ಕೆ ಮೊದಲು ಒಂದು ಹಿಡಿ ರಾಗಿ ಹಾಕಿ ಎಂದಿದ್ದರು. ಅವರ ಕೊನೆಯ ಆಸೆಯನ್ನು ನೆರವೇರಿಸಿದೆವು ಎಂದು ನೆನಪುಗಳ ಮೆಲುಕು ಹಾಕಿದರು.
ಎಂತಹ ಪರಿಸ್ಥಿತಿಯಲ್ಲಿಯೂ ಕರ್ತವ್ಯದ ವಿಚಾರದಲ್ಲಿ ಬದ್ಧರಾಗಿದ್ದರು. ಇಂಡಿಯಾ-ಆಫ್ರಿಕಾ ತಳಿ ಸಂಶೋಧನೆ ಮಾಡಿದಾಗ ತಮ್ಮ ಮಕ್ಕಳ ಹೆಸರನ್ನೇ ಇಡುವಂತೆ ಹಲವರು ಸಲಹೆ ನೀಡಿದ್ದರು. ಆದರೆ ಅದನ್ನು ನಯವಾಗಿ ತಿರಸ್ಕರಿಸಿ ಇಂಡಾಫ್ ಎಂದು ನಾಮಕರಣ ಮಾಡಿದ್ದರು ಎಂದರು.

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net