ಚೆಲುವನಾರಾಯಣನಿಗೆ ಪುಷ್ಪಯಾಗ ಸೇವೆ

9 ದಿನಗಳ ಜಾತ್ರಾಮಹೋತ್ಸವದಲ್ಲಿ ಕೃಷ್ಣರಾಜಮುಡಿಉತ್ಸವ, ಪ್ರಹ್ಲಾದಪರಿಪಾಲನ, ಗಜೇಂದ್ರಮೋಕ್ಷ ರಥೋತ್ಸವ ಹಾಗೂ ಪಟ್ಟಾಭಿಷೇಕ ಉತ್ಸವಗಳಂದು ಚೆಲುವನಾರಾಯಣನನ್ನು ಅಲಂಕರಿಸಿದ ಕೃಷ್ಣರಾಜಮುಡಿ ಕಿರೀಟದ ದರ್ಶನ ಭಾಗ್ಯ ಪಡೆದ ಮಂಡ್ಯಜಿಲ್ಲಾಧಿಕಾರಿ ಡಾ.ಕುಮಾರ್ ಅಪರಜಿಲ್ಲಾಧಿಕಾರಿ ಶಿವಾನಂದಮೂರ್ತಿ ಸೇರಿದಂತೆ ಶ್ರೀರಂಗಂ, ಕಂಚಿ, ತಿರುವಲ್ಲಿಕೇಣಿ ಮುಂತಾದ ಕಡೆಗಳಿಂದ ಬಂದಿದ್ದ ದಿವ್ಯಪ್ರಬಂಧ ಪಾರಾಯಣದವರು ಸೇರಿದಂತೆ ನಾಡಿನ ವಿವಿಧಭಾಗಗಳಿಂದ ಭಾಗವಹಿಸಿದ್ದ ಸಹಸ್ರಾರು ಭಕ್ತರು ದೈವೀಕ ಅನುಭೂತಿಪಡೆದರು.

ದೇವಾಲಯದ ಹಿರಿಯಸ್ಥಾನೀಕರ ಹೆಸರಿನ ಸ್ಥಾನೀಕಂ ನಾಗರಾಜಯ್ಯಂಗಾರ್ ಸಾಂಸ್ಕೃತಿಕವೇದಿಕೆಯಿಂದ ನಿಯೋಜಿಸಿದ ನಾದಸ್ವರ ಮತ್ತು ಸ್ಯಾಕ್ಸ್ ಪೋನ್ ಮಂಗಳ ವಾದ್ಯತಂಡಗಳು ವಿದ್ವಾನ್ ಶ್ರೀರಂಗಂ ಶಲ್ವನಾರಾಯಣನ್ ನೇತೃತ್ವದ ದಿವ್ಯಪ್ರಬಂಧ ಪಾರಾಯಣ ಗೋಷ್ಠಿಗಳು ಬ್ರಹ್ಮೋತ್ಸವದ ವಿಶೇಷ ಉತ್ಸವಗಳಿಗೆ ವಿಶೇಷ ಕಳೆತಂದುಕೊಡುವ ಮೂಲಕ ಭಕ್ತರ ಮನಸೂರೆಗೊಂಡವು.

ಬ್ರಹ್ಮೋತ್ಸವ ಮುಕ್ತಾಯದ ನಂತರದ 10ನೇ ತಿರುನಾಳ್ ದಿನವಾದ ಭಾನುವಾರ ಚೆಲುವನಾರಾಯಣಸ್ವಾಮಿಗೆ ಪುಷ್ಪಯಾಗ ಸೇವೆ ಶಾಸ್ರ್ತೋಕ್ತವಾಗಿ ನೆರವೇರಿತು.