ಏತ ನೀರಾವರಿ ಕಾಮಗಾರಿ ಅಪೂರ್ಣಕ್ಕೆ ಆಕ್ರೋಶ

ಹೋಬಳಿಯ ಗೂಡೇಹೊಸಹಳ್ಳಿ ಗ್ರಾಮದಲ್ಲಿರುವ ಏತ ನೀರಾವರಿ ಪಂಪ್‌ಹೌಸ್‌ಗೆ ಪಾಂಡವಪುರ ಉಪವಿಭಾಗಾಧಿಕಾರಿ ಕೆ.ಆರ್.ಶ್ರೀನಿವಾಸ್, ನೀರಾವರಿ ಇಲಾಖೆ ಅಧಿಕಾರಿಗಳೊಂದಿಗೆ ಗುರುವಾರ ಭೇಟಿ ನೀಡಿ ಸಾರ್ವಜನಿಕರೊಂದಿಗೆ ಚರ್ಚಿಸಿ ಮಾತನಾಡಿದರು.

ನೀರಾವರಿ ಹಾಗೂ ಕಂದಾಯ ಇಲಾಖೆ ಅಧಿಕಾರಿಗಳು ಸಮನ್ವಯ ಸಾಧಿಸಿ ರೈತರಿಗೆ ಸಿಗಬೇಕಿರುವ ಪರಿಹಾರವನ್ನು ತ್ವರಿತವಾಗಿ ನೀಡಲು ಮುಂದಾಗಿ. ಕಾಮಗಾರಿ ವೆಚ್ಚ ಏರಿಕೆಯಾಗಲು ಅಧಿಕಾರಿಗಳ ನಿರ್ಲಕ್ಷವೇ ಕಾರಣ. ಈ ಬಾರಿ ಮಳೆಗಾಲವಿಲ್ಲ. ರೈತರ ಬೆಳೆಗೆ ನೀರೇ ಇಲ್ಲವಾಗಿದೆ. ಇಷ್ಟೊಂದು ಸಮಸ್ಯೆ ಎದುರಿಸುತ್ತಿದ್ದು, ರೈತರ ನೋವಿಗೆ ಮೊದಲು ಸ್ಪಂದಿಸಲು ಅಧಿಕಾರಿಗಳು ಮುಂದಾಗಿ ಎಂದರು.

ಉಪ ವಿಭಾಗಾಧಿಕಾರಿ ಕೆ.ಆರ್.ಶ್ರೀನಿವಾಸ್ ಮಾತನಾಡಿ, ರೈತರ ಜಮೀನುಗಳನ್ನು ಭೂಸ್ವಾಧೀನ ಮಾಡಿಕೊಳ್ಳಲು ಸಮನ್ವಯ ಸಾಧಿಸಿ. ಸೂಕ್ತ ಸ್ಥಳ ಪರಿಶೀಲನೆ ನಡೆಸಿ ವರದಿ ನೀಡಲು ಗ್ರಾಮ ಆಡಳಿತಾಧಿಕಾರಿ ನಿರ್ಲಕ್ಷ ತೋರುತ್ತಿದ್ದಾರೆ. ಪೈಪ್‌ಲೈನ್ ಅನ್ನು ಸುಲಲಿತವಾಗಿ ಅಳವಡಿಸಲು ಗೂಡೆಹೊಸಹಳ್ಳಿ, ಸಾಸಲು ಮತ್ತು ಅಘಲಯಗಳಲ್ಲಿ ರೈತರಿಗೆ ಕೊಡಬೇಕಾದ ಪರಿಹಾರವನ್ನು ಪಡೆಯಲು ಬೇಕಾದ ಕಂದಾಯದ ದಾಖಲಾತಿ ಸಿದ್ಧಪಡಿಸಿ. ನೀರಾವರಿ ಇಲಾಖೆ ಹೆಸರಿಗೆ ವರ್ಗಾಯಿಸಿಕೊಡಿ. ಇಲ್ಲವಾದರೆ ಕ್ರಮಕ್ಕೆ ಸಂಬಂಧಪಟ್ಟವ ವಿರುದ್ಧ ಶಿಫಾರಸು ಮಾಡಿ ಎಂದು ತಹಸೀಲ್ದಾರ್ ಶ್ರೇಯಸ್‌ಗೆ ತಾಕೀತು ಮಾಡಿದರು.

ಶಾಸಕ ಕೆಂಡಾಮಂಡಲ: ಕಿಕ್ಕೇರಿಯ ನೀರಾವರಿ ಕಚೇರಿ ಮುಂದೆ ರೈತರು ಗುರುಗಾರನಹಳ್ಳಿ ಬಳಿಯ ವಿತರಣಾ ನಾಲೆ ನಂ.47ರ ಮೂಲಕ ನೀರು ಹರಿಸಲು ಪ್ರತಿಭಟನೆ ನಡೆಸಿದ್ದಾರೆ. ನಾನೇ ಅಂದು ರಾತ್ರಿ ಸ್ಥಳಕ್ಕೆ ಆಗಮಿಸಿ ನಾಲೆ ತೂಬು ಎತ್ತಿಸಬೇಕಾಯಿತು. ರೈತರಿಗೆ ಏಕೆ ಗೋಳಾಡಿಸುವಿರಿ ಎಂದು ಅಧಿಕಾರಿಗಳನ್ನು ಶಾಸಕರು ತರಾಟೆ ತೆಗೆದುಕೊಂಡರು.

ಯೋಜನೆ ವ್ಯಾಪಿಯಲ್ಲಿ ಒಟ್ಟು 216 ಕೆರೆಗಳಿವೆ. 106 ಕೆ.ಆರ್.ಪೇಟೆ, 105 ನಾಗಮಂಗಲ ಹಾಗೂ 5ಕೆರೆ ಚನ್ನರಾಯಪಟ್ಟಣ ವ್ಯಾಪ್ತಿಯಲ್ಲಿವೆ. ಮೊದಲ ಹಂತದ ಪೈಪ್ ಲೈನ್ ಕಾಮಗಾರಿ ಅಂತಿಮ ಘಟ್ಟದಲ್ಲಿದೆ. ಗೂಡೇಹೊಸಹಳ್ಳಿ, ತೊಳಸಿ, ಸಾಸಲು, ಅಘಲಯ ಮತ್ತು ಚನ್ನರಾಯಪಟ್ಟಣ ತಾಲೂಕಿನ ಕೆ.ಹೊಸಹಳ್ಳಿ ಗ್ರಾಮ ವ್ಯಾಪ್ತಿಯ ರೈತರ ಎರಡು-ಮೂರು ಗುಂಟೆ ಜಾಗದ ಪರಿಹಾರಕ್ಕೆ ಸಂಬಂಧಿಸಿದಂತೆ ಸಮಸ್ಯೆಯಿದ್ದು ಕಾಮಗಾರಿ ಮುಗಿಯಲು ಅಡ್ಡಿಯಾಗಿದೆ. ಯೋಜನಾ ವ್ಯಾಪ್ತಿಯ 156 ರೈತರಿಗೆ ಈಗಾಗಲೇ 1.80 ಕೋಟಿ ರೂ. ಪರಿಹಾರ ವಿತರಿಸಲಾಗಿದೆ ಎಂದರು.

ನೀರಾವರಿ ಇಲಾಖೆಯ ಕಾರ್ಯಪಾಲಕ ಇಂಜಿನಿಯರ್ ಮಂಜುನಾಥ್, ಸಹಾಯಕ ಕಾರ್ಯಪಾಲಕ ಇಂಜಿನಿಯರ್‌ರಾದ ಎಸ್.ಜೆ. ಸುಧಾ, ಸಹಾಯಕ ಇಂಜಿನಿಯರ್ ರಾಕೇಶ್, ರಾಜಸ್ವ ನಿರೀಕ್ಷಕ ನರೇಂದ್ರ, ಟಿಎಪಿಸಿಎಂಎಸ್ ಅಧ್ಯಕ್ಷ ಮಲ್ಲೇನಹಳ್ಳಿ ಮೋಹನ್, ನಿರ್ದೇಶಕರಾದ ಕೆ.ಬಿ.ಮಧು, ಎಪಿಎಂಸಿ ಮಾಜಿ ಅಧ್ಯಕ್ಷ ಐನೋರಹಳ್ಳಿ ಮಲ್ಲೇಶ್, ತಾಪಂ ಮಾಜಿ ಸದಸ್ಯರಾದ ಕೃಷ್ಣೇಗೌಡ, ಹುಲ್ಲೇಗೌಡ, ವೆಂಕಟೇಶ್, ಪ್ರತಾಪ್, ಧ್ರುವ ಇತರರಿದ್ದರು.