ಮೈಶುಗರ್ ಅಭಿವೃದ್ಧಿ ಕುರಿತು ಚರ್ಚೆಗೆ ಸಿದ್ಧ: ಕಾರ್ಖಾನೆ ಅಧ್ಯಕ್ಷ ಸಿ.ಡಿ.ಗಂಗಾಧರ ಸ್ಪಷ್ಟನುಡಿ

ಕಾರ್ಖಾನೆಯ ಯಶಸ್ಸಿನ ಬಗ್ಗೆ ಕೆಲ ದಿನದ ಹಿಂದೆ ರೈತ ಪ್ರತಿನಿಧಿಗಳ ಸಭೆ ನಡೆಸಿ ಪೂರ್ಣ ಮಾಹಿತಿ ನೀಡಲಾಗಿದೆ. ಆ ಸಭೆಯಲ್ಲಿ ರೈತ ಹಿತರಕ್ಷಣಾ ಸಮಿತಿ ಮುಖಂಡರು, ಕಬ್ಬು ಒಪ್ಪಿಗೆದಾರರ ಸಂಘದ ಅಧ್ಯಕ್ಷರು, ಮುಖಂಡರು ಮಾತ್ರವಲ್ಲದೆ ಹಲವು ಪ್ರಗತಿಪರ ಮುಖಂಡರು ಸಹ ಸಭೆಯಲ್ಲಿ ಭಾಗವಹಿಸಿ ಅಗತ್ಯ ಸಲಹೆಗಳನ್ನು ನೀಡಿದ್ದಾರೆ. ಜತೆಗೆ ಕಾರ್ಖಾನೆಯ ಎರಡು ವರ್ಷದ ಆಗು-ಹೋಗುಗಳ ಬಗ್ಗೆ ಸುರ್ದೀಘವಾಗಿ ಚರ್ಚೆ ಮಾಡಲಾಗಿತ್ತು. ಸಭೆಯಲ್ಲಿ ಭಾಗವಹಿಸಿದ್ದ ಕೆಲವರು, ಮೈಶುಗರ್ ಅಭಿವೃದ್ಧಿಯನ್ನು ಸಹಿಸದೆ ಅಪಪ್ರಚಾರ ಮಾಡುತ್ತಿದ್ದಾರೆ ಎಂದು ಸುದ್ದಿಗೋಷ್ಠಿಯಲ್ಲಿ ದೂರಿದರು.

5.90 ಲಕ್ಷ ಮೆಟ್ರಿಕ್ ಟನ್ ಕಬ್ಬು ಒಪ್ಪಿಗೆ: 2026-27ನೇ ಸಾಲಿನಲ್ಲಿ ಮೈಶುಗರ್ ಕಾರ್ಖಾನೆಯನ್ನು ನಂಬಿ ಮಂಡ್ಯ ತಾಲೂಕಿನಾದ್ಯಂತ ಸುಮಾರು 5.90 ಲಕ್ಷ ಮೆಟ್ರಿಕ್ ಟನ್ ಕಬ್ಬು ಒಪ್ಪಿಗೆಯನ್ನು ರೈತರು ಕರಾರು ಮಾಡಿಕೊಂಡಿದ್ದಾರೆ. ಎಲ್ಲ ರೈತರಿಗೂ ಒಪ್ಪಿಗೆ ರಟ್ಟುಗಳನ್ನು ಕೂಡ ಪ್ರಥಮವಾಗಿ ಈ ಎರಡು ವರ್ಷಗಳಿಂದ ನೀಡಲಾಗಿದೆ. ಇಲ್ಲಿಯವರೆಗೂ ಕೆ.ಎಂ.ದೊಡ್ಡಿಯ ಚಾಂಷುಗರ್ ಮತ್ತು ಕೊಪ್ಪದ ಎನ್.ಎಸ್.ಎಲ್ ಕಾರ್ಖಾನೆಯವರ ಕಬ್ಬು ಒಪ್ಪಿಗೆಯು ಮೈಶುಗರ್ ಕಾರ್ಖಾನೆಗಿಂತ ಹೆಚ್ಚಿರುತ್ತಿತ್ತು. ಆದರೆ, ಈ ಬಾರಿ ಚಾಂಷುಗರ್ ಮತ್ತು ಎನ್.ಎಸ್.ಎಲ್ ಶುಗರ್ಸ್ ಕಾರ್ಖಾನೆಯ ಕಬ್ಬು ಒಪ್ಪಿಗೆಯು ತಲಾ 4 ಲಕ್ಷ ಆಜು ಬಾಜಿನಲ್ಲಿದೆ. ಈ ಕಾರ್ಖಾನೆಗಳ ಮೇಲೆ ರೈತರು ಇಟ್ಟಿರುವ ನಂಬಿಕೆಗಿಂತ ರೈತರು ನಮ್ಮ ಕಾರ್ಖಾನೆಯ ಮೇಲೆ ಹೆಚ್ಚಿನ ನಂಬಿಕೆಯನ್ನು ಇಟ್ಟಿರುವುದನ್ನು ಮೈಶುಗರ್ ಕಾರ್ಖಾನೆಯು ಉಳಿಸಿಕೊಂಡಿದೆ. ಮುಂದೆಯೂ ಉಳಿಸಿಕೊಳ್ಳಲಾಗುವುದು ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಇ-ಟೆಂಡರ್ ಮೂಲಕವೇ ಮಾರಾಟ: ಮೇ 7 ಮತ್ತು 23 ರಂದು ನಡೆದ ಸಭೆಗಳಲ್ಲಿ ಅನುಪಯುಕ್ತ ವಸ್ತುಗಳ ಮಾರಾಟದ ಬಗ್ಗೆ ಸಂಪೂರ್ಣ ಮಾಹಿತಿ ನೀಡಲಾಗಿದೆ. ಸಭೆಯಲ್ಲಿ ಹಾಜರಿದ್ದ ರೈತ ಮುಖಂಡರು ಹಾಗೂ ರೈತ ಹಿತಾರಕ್ಷಣಾ ಸಮಿತಿಯ ಮುಖಂಡರು ಸಹ ಕಾರ್ಖಾನೆಯ ಎಲ್ಲ ಬೆಳವಣಿಗೆಯ ಬಗ್ಗೆ ಸಹಮತವನ್ನು ನೀಡಿ ಒಪ್ಪಿರುತ್ತಾರೆ. ಆದರೂ ಕೆಲವರು ಗುಜರಿ ಲೆಕ್ಕದಲ್ಲಿ ಅನುಪಯುಕ್ತ ವಸ್ತಗಳನ್ನು ಹಾಗೂ ಮಿಲ್ಲನ್ನು ಮಾರಾಟ ಮಾಡಲಾಗುತ್ತಿದೆ ಎಂದು ಅಪಪ್ರಚಾರ ಮಾಡಿರುತ್ತಾರೆ. ಆದರೆ, ಗುಜರಿ ಲೆಕ್ಕದಲ್ಲಿ ಮಾರಾಟ ಮಾಡಿದ್ದರೆ ಪ್ರಸ್ತುತ ನಿಗದಿಪಡಿಸಿರುವ ದರದಲ್ಲಿ ಅರ್ಧದಷ್ಟು ಹಣ ಕೂಡ ಕಂಪನಿಗೆ ಬರುವುದಿಲ್ಲ ಎಂದರು.

ಕೆ.ಪಿ.ಟಿ.ಟಿ. ಕಾಯ್ದೆಯನುಸಾರ ಟೆಂಡರ್ ನಿಯಮಾವಳಿಯನ್ನು ಮಾಡಿ ಹಾಗೂ ಪ್ರಚಲಿತ ದಿನಪತ್ರಿಕೆಗಳಲ್ಲಿ ಪ್ರಚುರ ಮಾಡಿಸಿ ದೇಶಾದ್ಯಂತ ಟೆಂಡರ್‌ನಲ್ಲಿ ಭಾಗವಹಿಸಲು ಅನುವು ಮಾಡಿಕೊಟ್ಟು ಪಾರದರ್ಶಕ ನಿಯಮಾನುಸಾರ ಉತ್ತಮ ದರಕ್ಕೆ ಇ-ಟೆಂಡರ್ ಕರೆದೇ ಅನುಪಯುಕ್ತ ವಸ್ತುಗಳನ್ನು ಮಿಲ್ ಲೆಕ್ಕದಲ್ಲಿಯೇ ಮಾರಾಟ ಮಾಡಲಾಗಿದೆ. ಇದರಿಂದಾಗಿ ಒಟ್ಟು 4.10 ಕೋಟಿ ರೂ ಕಾರ್ಖಾನೆಗೆ ಬಂದಿದೆ ಎಂದು ವಿವರಿಸಿದರು.

ಮುಖಂಡರಾದ ಅಜ್ಜಹಳ್ಳಿ ರಾಮಕೃಷ್ಣ, ದೇಶಹಳ್ಳಿ ಮೋಹನ್ ಕುಮಾರ್, ಉದಯ್ ಕುಮಾರ್ ಹಾಜರಿದ್ದರು.