ಮೇಲುಕೋಟೆ ದೇಗುಲಕ್ಕೆ ಸ್ಟೀಲ್ ಬ್ಯಾರಿಕೇಡ್‌ಗಳ ಹಸ್ತಾಂತರ

ದೇವಾಲಯದ ಕಾರ್ಯನಿರ್ವಾಹಕ ಅಧಿಕಾರಿ ಶೀಲಾ ಅವರ ಕೋರಿಕೆಯ ಮೇರೆಗೆ ದೇವಾಲಯಕ್ಕೆ ಹಲವು ಭಕ್ತಸ್ನೇಹಿ ಕೆಲಸ ಮಾಡಿದ ಮೆಡಿಮಿಕ್ಸ್ ಕಂಪನಿಯ ಪರವಾಗಿ ಹಾಜರಿದ್ದ ಹಿರಿಯ ವ್ಯವಸ್ಥಾಪಕ ಶರವಣನ್ ಸ್ಟೀಲ್ ಬ್ಯಾರಕೇಡ್‌ಗಳನ್ನು ಸಾಂಕೇತಿಕವಾಗಿ ಹಸ್ತಾಂತರ ಮಾಡಿದರು.

ದೇವಾಲಯದ ಮುಂಭಾಗ ಸರತಿ ಸಾಲು ನಿರ್ವಹಿಸಲು ಸ್ಟೀಲ್ ಬ್ಯಾರಿಕೇಡ್, ಸ್ಯಾರಿ ಸ್ಟಾೃಂಡ್, ದೇವಾಲಯದ ನಾಮಫಲಕಗಳು, ಕಲ್ಯಾಣಿಯ ಬಳಿ ಮಹಿಳಾ ಭಕ್ತರು ಸ್ನಾನಮಾಡಿ ಬಟ್ಟೆ ಬದಲಿಸುವ 6 ಕ್ಯಾಬಿನ್, ಯೋಗಾನರಸಿಂಹಸ್ವಾಮಿ ಬೆಟ್ಟದ ಲಾಡು ಕೌಂಟರ್ ಸುತ್ತಲಗುಡಿಗಳ ನಾಮಫಲಕಗಳು ಸೇರಿದಂತೆ 10 ಲಕ್ಷ ರೂ.ವೆಚ್ಚದಲ್ಲಿ ಭಕ್ತಸ್ನೇಹಿ ಕಾರ್ಯಗಳನ್ನು ಮಾಡಿದ್ದೇವೆ ಮತ್ತಷ್ಟು ಸಾರ್ವಜನಿಕ ಕಾರ್ಯಗಳನ್ನು ಮಾಡಲು ಯೋಜಿಸಿದ್ದೇವೆ ಎಂದು ಮೆಡಿಮಿಕ್ಸ್ ಕಂಪನಿಯ ವ್ಯವಸ್ಥಾಪಕ ಶರವಣನ್ ತಿಳಿಸಿದರು.

ಸಚಿವ ಎನ್.ಚೆಲುವರಾಯಸ್ವಾಮಿ ಅವರ ಧರ್ಮಪತ್ನಿ ಧನಲಕ್ಷ್ಮೀ ಚೆಲುವರಾಯಸ್ವಾಮಿ, ಪಾಂಡವಪುರ ಉಪವಿಭಾಗಾಧಿಕಾರಿ ಹಾಗೂ ದೇವಾಲಯದ ಆಡಳಿತಾಧಿಕಾರಿ ಶ್ರೀನಿವಾಸ್, ತಹಸೀಲ್ದಾರ್ ಬಸವರೆಡ್ಡಪ್ಪ, ದೇವಾಲಯದ ಪಾರುಪತ್ತೇಗಾರ್, ಸ್ಥಾನಾಚಾರ್ಯ ಶ್ರೀನಿವಾಸ ನರಸಿಂಹನ್ ಗುರೂಜಿ, ಮೈಸೂರು ಮುಡ ಮಾಜಿ ಅಧ್ಯಕ್ಷ ಎಚ್.ವಿ.ರಾಜೀವ್, ಹೈಕೋರ್ಟ್ ವಕೀಲ ಕಾಡೇನಹಳ್ಳಿ ಸತೀಶ್, ಇತಿಹಾಸ ತಜ್ಞ ಪ್ರೊ.ಶಲ್ವಪ್ಪಿಳ್ಳೆ ಅಯ್ಯಂಗಾರ್, ಹೊನ್ನಾವರ ರಾಜಗೋಪಾಲ್, ಸ್ಥಾನೀಕಂ ಸಂತಾನರಾಮನ್ ಮತ್ತಿತರರು ಹಾಜರಿದ್ದರು.