16ರಂದು ವ್ಯವಸ್ಥಾಪನಾ ಸಮಿತಿ ಸಭೆ

ಯೋಗನರಸಿಂಹಸ್ವಾಮಿ ಬೆಟ್ಟದ ಹುಂಡಿಯಲ್ಲಿ ಚಿನ್ನ-ಬೆಳ್ಳಿ, ಕಾಣಿಕೆ ಹಣ ಕಳುವಾಗುತ್ತಿರುವ ಶಂಕೆಯಡಿ ದೇವಾಲಯದ ಕಾರ್ಯನಿರ್ವಾಹಕ ಅಧಿಕಾರಿ ಶೀಲಾ ನೀಡಿರುವ ದೂರಿನ ಸಂಬಂಧ ಶನಿವಾರ ಮಾಧ್ಯಮಪ್ರತಿನಿಧಿಗಳಿಗೆ ಮೊದಲ ಪ್ರತಿಕ್ರಿಯೆ ನೀಡಿದ ಪರಮೇಶ್‌ಗೌಡ, ಪ್ರಕರಣ 2026ರ ಜನವರಿಯಲ್ಲಿ ವ್ಯವಸ್ಥಾಪನಾ ಸಮಿತಿ ಅಸ್ಥಿತ್ವಕ್ಕೆ ಬರುವ ಮೊದಲೇ ನಡೆದಿದೆ. ಈ ವಿಚಾರ ಈವರೆಗೆ ನಡೆದ ವ್ಯವಸ್ಥಾಪನಾ ಯಾವುದೇ ಸಭೆಯಲ್ಲೂ ಚರ್ಚೆಯಾಗಿಲ್ಲ ಎಂದು ತಿಳಿಸಿದರು.

ದೇವಾಲಯದ ಕಾರ್ಯನಿರ್ವಾಹಕ ಅಧಿಕಾರಿ ಶೀಲಾ ಪೊಲೀಸರಿಗೆ ದೂರು ನೀಡಿ, ಎಫ್‌ಐಆರ್ ದಾಖಲಾದ ನಂತರವಷ್ಟೇ ಮರುದಿನ ನನಗೆ ಹಾಗೂ ಸಮಿತಿಯ ಸದಸ್ಯರ ಗಮನಕ್ಕೆ ಬಂದಿದೆ. ನಾವೆಲ್ಲ ಅನೌಪಚಾರಿಕವಾಗಿ ಸಭೆ ಸೇರಿ ಘಟನೆಯ ಸಂಪೂರ್ಣ ವಿವರ ಹಾಗೂ ದಾಖಲೆಗಳನ್ನು ಎರಡು ದಿನಗಳೊಳಗೆ ವ್ಯವಸ್ಥಾಪನಾ ಸಮಿತಿಯ ಎಲ್ಲ ಸದಸ್ಯರಿಗೆ ಒದಗಿಸಲು ದೇಗುಲದ ಇಒಗೆ ಸೂಚಿಸಿದ್ದೇವೆ. ದಾಖಲೆಗಳು ಬಂದ ನಂತರ ಜೂ.16ರಂದು ತುರ್ತು ಸಭೆ ಸೇರಿ ಧಾರ್ಮಿಕ ದತ್ತಿ ಕಾಯ್ದೆ ಹಾಗೂ ಕಾನೂನಿನಂತೆ ಕ್ರಮವಹಿಸಲಾಗುವುದು ಎಂದರು.

ಚೆಲುವನಾರಾಯಣಸ್ವಾಮಿ ಮತ್ತು ಯೋಗನರಸಿಂಹಸ್ವಾಮಿ ಸನ್ನಿಧಿಯ ಪಾವಿತ್ರತೆ ಮತ್ತು ಪರಂಪರೆಯನ್ನು ಕಾಪಾಡಲು ವ್ಯವಸ್ಥಾಪನಾ ಸಮಿತಿ ಬದ್ಧವಾಗಿದ್ದು, ಭಕ್ತರ ಭಾವನೆಗಳಿಗೆ ಧಕ್ಕೆ ತರುವ ಕಾರ್ಯ ಮಾಡುವುದಿಲ್ಲ. ಯೋಗನರಸಿಂಹಸ್ವಾಮಿ ಬೆಟ್ಟದ ದೇವಾಲಯದಲ್ಲಿ ನಡೆದಿದೆ ಎನ್ನಲಾದ ಹುಂಡಿಯಲ್ಲಿನ ಹಣ, ಚಿನ್ನ, ಬೆಳ್ಳಿ ಕಳ್ಳತನವಾಗುತ್ತಿರುವ ಶಂಕೆಯ ಇಒ ದೂರಿನ ಸಂಬಂಧ ಜಿಲ್ಲಾಧಿಕಾರಿ ಗಮನಕ್ಕೆ ತಂದು ಕಾನೂನಿನ ಪ್ರಕಾರ ಕ್ರಮವಹಿಸುತ್ತೇವೆ ಎಂದು ಮಾಹಿತಿ ನೀಡಿದರು.