ಕಷ್ಟ, ಕಾರ್ಪಣ್ಯ ಕಳೆಯುವ ಕಾಳಿಕದೇವಿ

ಶಕ್ತಿದೇವತೆಗೆ ಭಕ್ತಿಯಿಂದ ಕೈ ಮುಗಿದು ಶರಣಾದರೆ ಕಷ್ಟ, ಕಾರ್ಪಣ್ಯ, ದುಃಖ ದುಮ್ಮಾನ ಶಮನವಾಗಿ ಬಾಳಿನಲ್ಲಿ ಸುಖ ಸಂತೋಷ ನೆಲೆಸುತ್ತದೆ ಎಂಬ ಭಾವ ಭಕ್ತರ ಮನದಲ್ಲಿದೆ.

ಪುರಾಣ ಪ್ರಸಿದ್ಧ, ಐತಿಹಾಸಿಕ ಹಾಗೂ ದಕ್ಷಿಣ ಬದರಿ ಎಂದು ಕರೆಯಲ್ಪಡುವ ಮೇಲುಕೋಟೆಯ ಚೆಲುವನಾರಾಯಣಸ್ವಾಮಿ ಮತ್ತು ಯೋಗಾನರಸಿಂಹಸ್ವಾಮಿ ನೆಲೆಸಿರುವ ಧಾರ್ಮಿಕ ಕ್ಷೇತ್ರದಲ್ಲಿನ ಪಂಚಕಲ್ಯಾಣಿಗೆ ಹೊಂದಿಕೊಂಡಂತಿರುವ ಬೆಟ್ಟ-ಗುಡ್ಡಗಳ ನಡುವೆ ಹೊಸಬಾವಿ ಎಂಬ ಹೆಸರಿನ ಕೆರೆಯ ಮೇಲೆ ಶಕ್ತಿದೇವತೆ ಕಾಳಿಕದೇವಿ ನೆಲೆಯಾಗಿ ನಿಂತಿದ್ದು, ಭಕ್ತರ ಆರಾಧ್ಯ ದೇವಿಯಾಗಿ ಪೂಜಿಸಲ್ಪಡುತ್ತಿದ್ದಾಳೆ. ಕೌಟುಂಬಿಕ ಸಮಸ್ಯೆಗಳಿಗೆ ಪರಿಹಾರ ಮತ್ತು ಕಷ್ಟ ಎಂದು ಹರಕೆ ಹೊತ್ತು ಬರುವ ಭಕ್ತರ ಇಷ್ಟಾರ್ಥಗಳನ್ನು ಈಡೇರಿಸುವ ದೇವಿಯಾಗಿದ್ದಾಳೆ. ಮದುವೆ, ಸಂತಾನ, ಕೌಟುಂಬಿಕ ಕಲಹ, ಮನೋರೋಗ, ವ್ಯಾಪಾರ, ವ್ಯಾಜ್ಯ, ಶುಭಕಾರ್ಯಗಳಿಗೆ ಎದುರಾಗುವ ಅಡ್ಡಿ ಆತಂಕ, ದಾಯಾದಿ ಕಲಹ ಇತರ ಅನೇಕ ಸಮಸ್ಯೆಗಳಿಗೆ ಪರಿಹಾರ ನೀಡುವಂತೆ ಬೇಡಿಕೊಂಡು ಪೂಜೆ ಸಲ್ಲಿಸಿದರೆ ಕಷ್ಟಗಳೆಲ್ಲ ಮಂಜಿನಂತೆ ಕರಗುತ್ತದೆ ಎಂಬುದು ಭಕ್ತರ ಅಚಲ ನಂಬಿಕೆ.\

ಕಾಳಿಕದೇವಿ ಶಕ್ತಿ ದೇವತೆಯಾಗಿದ್ದು, ಕಷ್ಟದಲ್ಲಿದ್ದ ಅನೇಕ ಭಕ್ತರು ದೇವಿಯ ಕೃಪೆಯಿಂದ ಒಳಿತು ಕಂಡಿದ್ದಾರೆ. ದೇವಸ್ಥಾನಕ್ಕೆ ಬಂದು ದೇವಿಗೆ ಭಕ್ತಿಯಿಂದ ಪೂಜೆ ಸಲ್ಲಿಸಿ ಹರಕೆ ಹೊತ್ತ ಫಲವಾಗಿ ಕೆಲವೇ ಮಾಸಗಳಲ್ಲಿ ಪರಿಹಾರ ಕಂಡುಕೊಂಡಿರುವ ಉದಾಹರಣೆಗಳು ಸಿಗುತ್ತವೆ.

ಭಕ್ತರು ತಮ್ಮ ಕಷ್ಟ ಕಾರ್ಪಣ್ಯ ನಿವಾರಣೆಯಾದರೆ, ಇಷ್ಟಾರ್ಥ ಈಡೇರಿದರೆ ಆರ್ಥಿಕ ಶಕ್ತಿಗನುಗುಣವಾಗಿ ದೇವಸ್ಥಾನದ ಹುಂಡಿಗೆ ಕಾಣಿಕೆ ಸಲ್ಲಿಸುವುದು, ಕುರಿ, ಕೋಳಿ, ಮೇಕೆಗಳನ್ನು ಒಪ್ಪಿಸುವುದು, ದೇವಿಗೆ ಮಹಾಮಂಗಳಾರತಿ, ವಿವಿಧ ರೀತಿಯ ಅಭಿಷೇಕಗಳು, ತಾಳಿ, ಸೀರೆ, ಬಳೆ ಹಾಗೂ ಮಡಿಲಕ್ಕಿ ತುಂಬುವುದು ಸೇರಿದಂತೆ ಯಾವುದೇ ಹರಕೆಗಳನ್ನು ದೇವಸ್ಥಾನಕ್ಕೆ ಬಂದು ಒಪ್ಪಿಸಿ ಪೂಜೆ ಸಮರ್ಪಿಸುತ್ತಾರೆ.