ಅಂತಾರಾಷ್ಟ್ರೀಯ ಜಾನಪದ ಗಾಯಕ ಡಾ.ಅಪ್ಪಗೆರೆ ತಿಮ್ಮರಾಜು ಅಭಿಮತ

ಇಲ್ಲಿನ ಕೆಪಿಎಸ್ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ನಡೆಯುತ್ತಿರುವ ಮಕ್ಕಳ ಅಕ್ಕರೆ ಬೇಸಿಗೆ ಶಿಬಿರದಲ್ಲಿ ಈಚೆಗೆ ಭಾಗವಹಿಸಿ ಜಾನಪದ ಗೀತೆಗಳನ್ನು ಮಕ್ಕಳಿಗೆ ಹೇಳಿಕೊಡುತ್ತ ಮಾತನಾಡಿದ ಅವರು, ಜಾನಪದ ನಮ್ಮ ತಾಯಿಬೇರು. ಮಕ್ಕಳು ಸಂತಸದಿಂದ ಹಾಡುವುದೇ ರಾಗ. ಮಕ್ಕಳ ಖುಷಿಗೆ ತಣ್ಣೀರು ಹಾಕಬಾರದು. ಖುಷಿಯಿಂದ ಹಾಡಿ, ಕೂಗಿ, ನಲಿದಾಡಿ. ಮನಸ್ಸು ಉಲ್ಲಾಸವಾಗಲಿದೆ ಎಂದರು.

ಗಾಯಕ ಡಾ.ಕಿಕ್ಕೇರಿ ಕೃಷ್ಣಮೂರ್ತಿ ಮಾತನಾಡಿ, ಬೇಸಿಗೆ ಬಂತೆಂದರೆ ಬಹುತೇಕ ಮಕ್ಕಳ ಸೈನ್ಯ ಕೆರೆ, ಕಟ್ಟೆ, ನಾಲೆ, ಬಾವಿ ಬಳಿ ಜಮಾಯಿಸಿ ಸಾಕಷ್ಟು ಪ್ರಾಣಹಾನಿ ಆಗುವ ಸಂಭವ ಇದೆ. ಜಿ.ಪಂ. ಸಿಇಒ ಕೆ.ಆರ್.ನಂದಿನಿ ವಿಶೇಷ ಆಸ್ಥೆಯಿಂದ ಜಿಲ್ಲಾದ್ಯಂತ ಜರುಗುತ್ತಿರುವ ಈ ಬೇಸಿಗೆ ಶಿಬಿರದಿಂದ ಇಂತಹ ಅಹಿತಕರ ಘಟನೆಗೆ ಕಡಿವಾಣ ಬೀಳಲಿದೆ. ಜಿಲ್ಲಾ ಉಸ್ತುವಾರಿ ಸಚಿವ ಎನ್. ಚಲುವರಾಯಸ್ವಾಮಿ ಇಂತಹ ಶಿಬಿರದಿಂದ ಸರ್ಕಾರಿ ಶಾಲೆ ದಾಖಲೆ ಹೆಚ್ಚುವುದಲ್ಲದೆ ಮನೋವಿಕಸನ, ಸಂಭ್ರಮ ಎಲ್ಲವೂ ವೃದ್ಧಿಸಲಿದೆ ಎಂದು ತಿಳಿಸಿರುವುದು ಸರ್ಕಾರಿ ಶಾಲೆ ಉಳಿವಿಗೆ ಸಹಕಾರಿಯಾಗಲಿದೆ ಎಂದರು.

ಜಾನಪದ ಗಾಯಕ ಅಪ್ಪಗೆರೆ ತಿಮ್ಮರಾಜು ಅವರ ಅಳಬೇಡ ನನ್ನ ಕಂದ ನಾನು ಪೇಟೆಗೆ ಹೋಗಿ ಬರ‌್ತೀನಿ ಬಣ್ಣದ ಮಿಠಾಯಿ ತರ‌್ತೀನಿ ಗೀತೆಗೆ ಮಕ್ಕಳು ಕುಣಿದು ಕುಪ್ಪಳಿಸಿದರು. ಗಾಯಕ ಕಿಕ್ಕೇರಿ ಕೃಷ್ಣಮೂರ್ತಿ ಭಾರತೀಯರೆಲ್ಲರ ನಾವು ಒಂದು ಗೂಡಿ ಹಾಡುವಾ, ಆಕಾಶಕ್ಕೆದ್ದು ನಿಂತ ಪರ್ವತ ಹಿಮ ಮೌನದಲಿ, ನಗರ ಶ್ರೀನಿವಾಸ ಉಡುಪ ಅವರ ಬಾರಿಸು ಕನ್ನಡ ಡಿಂಡಿಮವಾ ಗೀತೆಗೆ ಮಕ್ಕಳು ತಾರಸ್ಥಾಯಿಯಲ್ಲಿ ಹಾಡಿ ಖುಷಿಪಟ್ಟರು.

ಕೆ.ಎಸ್.ನ. ಟ್ರಸ್ಟಿ ಮಾದಾಪುರ ಸುಬ್ಬಣ್ಣ, ಗಾಯಕ ನಗರ ಶ್ರೀನಿವಾಸ ಉಡುಪ, ಗ್ರಂಥಾಲಯ ಮೇಲ್ವಿಚಾರಕ ಲೋಕೇಶ್, ಶಿಕ್ಷಕಿ ಆರ್.ಎಂ. ಚೈತ್ರಾ, ಕೆ.ಸಿ.ಧನಲಕ್ಷ್ಮೀ ಮತ್ತಿತರರು ಇದ್ದರು.