ಜೀವ ವೈವಿಧ್ಯತೆ ಜಗತ್ತಿನ ಜೀವಾಳ: ಅಲಯನ್ಸ್‌ನ ಮಲ್ಟಿಪಲ್ ಕೌನ್ಸಿಲ್ ಅಧ್ಯಕ್ಷ ಕೆ.ಟಿ.ಹನುಮಂತು ಅಭಿಮತ

ನಗರದ ಸರ್.ಎಂ.ವಿ ಜಿಲ್ಲಾ ಕ್ರೀಡಾಂಗಣದಲ್ಲಿ ಕೃಷಿಕ ಅಲಯನ್ಸ್ ಸಂಸ್ಥೆ, ಸ್ನೇಹ ಬಳಗ ಅಲಯನ್ಸ್ ಸಂಸ್ಥೆ, ಸಕ್ಕರೆನಾಡು ಅಲಯನ್ಸ್ ಸಹಯೋಗದಲ್ಲಿ ಅಂತಾರಾಷ್ಟ್ರೀಯ ಜೀವ ವೈವಿಧ್ಯ ದಿನದ ಅಂಗವಾಗಿ ಆಯೋಜಿಸಿದ್ದ ಸಸಿ ನೆಡುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಸಸ್ಯ ಸಂಪತ್ತು ಮತ್ತು ಪಕ್ಷಿ ಸಂಪತ್ತು, ಕೀಟ ಸಂಪತ್ತು, ಸೂಕ್ಷ್ಮಜೀವಿ ಸಂಪತ್ತು, ಪ್ರಾಣಿ ಸಂಪತ್ತು ಹೀಗೆ ಅನೇಕ ವೈವಿಧ್ಯತೆಯ ಜೀವ ಸಂಕುಲಗಳಿವೆ. ಪ್ರಾಕೃತಿಕ ಭೂಮಿಯಲ್ಲಿ ವೈವಿಧ್ಯತೆಯಲ್ಲಿ ಅಸಂಖ್ಯಾತ ಜೀವ ಸಂಕುಲ ಹುಟ್ಟುತ್ತವೆ ಹಾಗೂ ಬೆಳೆಯುತ್ತವೆ. ಆದರೆ ಮನುಷ್ಯನ ದುರಾಸೆಯಿಂದ ನಾಶವಾಗುತ್ತಿವೆ ಎಂದು ನುಡಿದರು.

ಇತ್ತೀಚಿನ ವರದಿ ಪ್ರಕಾರ ಜಾಗತಿಕ ತಾಪಮಾನದಿಂದ ಅಳಿವಿನಂಚಿನಲ್ಲಿರುವ 16 ಪ್ರಭೇದಗಳ ಪುನರುಜ್ಜೀವನಕ್ಕಾಗಿ ’ವನ್ಯಜೀವಿ ಆವಾಸ ಸ್ಥಾನಗಳ ಸಮಗ್ರ ಅಭಿವೃದ್ಧಿ ಯೋಜನೆ ಬಂದಿವೆ. ಸಂರಕ್ಷಣೆಗಾಗಿ ಪಣ ತೊಡಲಾಗಿದೆ. ಜೇನು, ಗುಬ್ಬಚ್ಚಿ, ರಣಹದ್ದು, ಹಾವುಗಳು, ನರಿಗಳು ಹೀಗೆ ಹಲವು ಪ್ರಾಣಿ ಪಕ್ಷಿಗಳು ಕಣ್ಮರೆಯಾಗುತ್ತಿವೆ. 1968ರಲ್ಲಿ ಅಮೇರಿಕಾದ ವನ್ಯಜೀವಿ ವಿಜ್ಞಾನಿ ರೇಮೆಂಡ್ ಎಫ್.ಡೆನ್ಮಾನ್ ಅವರು ಜೀವ ವೈವಿಧ್ಯತೆ ಎಂಬ ಪದವನ್ನು ಸೃಷ್ಠಿಸಿ ಸಂರಕ್ಷಣೆಗಾಗಿ ಪಣತೊಟ್ಟರು. ಕ್ರಿ.ಶ 1600ರಿಂದ 1900ರವಗೆ ಮಾನವನಿಂದ ಪ್ರತಿವರ್ಷ 4 ಜೀವಿಗಳು ನಾಶವಾಗಿ ಬಂದಿವೆ. 1900 ರಿಂದೀಚೆಗೆ ಪ್ರತಿದಿನ ಜೀವಸಂಪತ್ತಿಗೆ ಹಾನಿಯಾಗುತ್ತಿವೆ ಎಂದು ಎಚ್ಚರಿಸಿದರು.

ಅಲಯನ್ಸ್ ಸಂಸ್ಥೆ ಜಿಲ್ಲಾ ಒಂದನೇ ಉಪ ಪ್ರಾಂತಪಾಲ ಚಂದ್ರಶೇಖರ್ ಮಾತನಾಡಿ, ಜೈವಿಕ ವೈವಿಧ್ಯತೆ ಸಂಪನ್ಮೂಲಗಳು ನಾಗರಿಕತೆಗಳನ್ನು ನಿರ್ಮಿಸುವ ಆಧಾರಸ್ತಂಭಗಳಾಗಿವೆ. ಮೀನು ಸುಮಾರು ಮೂರು ಶತಕೋಟಿ ಜನರಿಗೆ ಶೇ.20ರಷ್ಟು ಪ್ರೋಟೀನ್ ಅನ್ನು ಒದಗಿಸುತ್ತಿದೆ. 80ಕ್ಕೂ ಹೆಚ್ಚು ಸಸ್ಯಗಳು ಮನುಷ್ಯರಿಗೆ ಆಹಾರ ಒದಗಿಸುತ್ತವೆ. ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಗ್ರಾಮೀಣ ಪ್ರದೇಶಗಳಲ್ಲಿ ವಾಸಿಸುವ ಶೇ.80ರಷ್ಟು ಜನರು ಮೂಲ ಆರೋಗ್ಯ ರಕ್ಷಣೆಗಾಗಿ ಸಾಂಪ್ರದಾಯಿಕ ಸಸ್ಯ ಆಧಾರಿತ ಔಷಧವನ್ನು ಅವಲಂಬಿಸಿದ್ದಾರೆ. ಜೀವ ವೈವಿಧ್ಯತೆಯ ಸಂರಕ್ಷಣೆಯ ಪ್ರಾಮುಖ್ಯತೆ ಮತ್ತು ಅಗತ್ಯದ ಬಗ್ಗೆ ನಾಗರಿಕರಿಗೆ ಜಾಗೃತಿ ಮೂಡಿಸಲು ಪ್ರತಿ ವರ್ಷ ಮೇ 22ರಂದು ಜಾಗತಿಕವಾಗಿ ಅಂತಾರಾಷ್ಟ್ರೀಯ ಜೀವವೈವಿಧ್ಯ ದಿನವನ್ನಾಗಿ ಆಚರಿಸಲಾಗುತ್ತಿದೆ ಎಂದರು.

ನಿವೃತ್ತ ಕೃಷಿ ಅಧಿಕಾರಿ ಷಡಕ್ಷರಿ, ಪರಿಸರ ಪ್ರೇಮಿ ಪುರುಷೋತ್ತಮ್, ಶಿಕ್ಷಕ ರಾಜೇಗೌಡ, ಅಲಯನ್ಸ್ ಸಂಸ್ಥೆ ಜಿಲ್ಲಾ ಸಂಪುಟ ಕಾರ್ಯದರ್ಶಿ ಧನಂಜಯ್, ಪ್ರತಿಭಾಂಜಲಿ ಪ್ರೊ.ಡೇವಿಡ್, ಕೃಷಿಕ ಅಲಯನ್ಸ್ ಸಂಸ್ಥೆ ಮೋಹನ್, ಪಾಪಯ್ಯ, ಕೃಷ್ಣೇಗೌಡ, ಸ್ನೇಹ ಬಳಗ ಅಲಯನ್ಸ್ ಸಂಸ್ಥೆ ಜೋಗಿಗೌಡ, ಸಕ್ಕರೆನಾಡು ಅಲಯನ್ಸ್ ಸಂಸ್ಥೆಯ ನಿತಿನ್‌ಗೌಡ, ಡಾ.ವೈ.ಎಚ್.ರತ್ನಮ್ಮ, ಲೋಕೇಶ್ ಮತ್ತಿತರರಿದ್ದರು. ಇದೇ ಸಂದರ್ಭದಲ್ಲಿ ಕ್ರೀಡಾಂಗಣದ ಅಂಚಿನಲ್ಲಿ ಹಲವು ಸಸಿ ನೆಟ್ಟು ನೀರೆರೆದು ಪೋಷಣೆಗಾಗಿ ಒಬ್ಬಬ್ಬರು ಒಂದೊಂದು ಗಿಡವನ್ನು ದತ್ತು ಪಡೆದರು.