ಕೊಂಡಕ್ಕೆ ಬಿದ್ದು ಗಾಯಗೊಂಡ ಗುಡ್ಡಪ್ಪ

ಪಟ್ಟಣದ ರೈಲ್ವೇ ನಿಲ್ದಾಣ ಸಮೀಪವಿರುವ ದೇವಾಲಯ ಮುಂಭಾಗದಲ್ಲಿ ಮಂಗಳವಾರ ಮುಂಜಾನೆ 7ರ ವೇಳೆ ಘಟನೆ ನಡೆದಿದೆ. ದೇವರ ಗುಡ್ಡಪ್ಪ ಬಿ.ಕುಮಾರ್ ಕೊಂಡ ಹಾಯುವಾಗ ಆಯ ತಪ್ಪಿ ಕೊಂಡದೊಳಗೆ ಬಿದ್ದಿದ್ದಾರೆ. ಈ ವೇಳೆ ಅಲ್ಲಿಯೇ ನಿಂತಿದ್ದ ಸಹೋದರಿ ಕೂಡಲೇ ಗುಡ್ಡಪ್ಪ ಅವರನ್ನು ರಕ್ಷಣೆ ಮಾಡಲು ಕೊಂಡಕ್ಕೆ ಜಿಗಿದಿದ್ದಾರೆ. ಆಗ ಅಲ್ಲಿಯೇ ಇದ್ದ ಭಕ್ತರು ಇಬ್ಬರನ್ನು ಮೇಲೆತ್ತಿದ್ದು, ಇಬ್ಬರಿಗೂ ಸಣ್ಣ-ಪುಟ್ಟ ಸುಟ್ಟ ಗಾಯಗಳಾಗಿವೆ. ಕೂಡಲೇ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಯಿತು.

ಪಟ್ಟಣದಲ್ಲಿ ಹಿಂದಿನಿಂದಲೂ ಶ್ರೀಮುತ್ತುಲಕ್ಷ್ಮೀ ಮಾರಮ್ಮ ದೇವಿಯ ಕರಗ ಮಹೋತ್ಸವ ಅತ್ಯಂತ ಪ್ರಸಿದ್ಧಿಯಾಗಿದ್ದು, ಈ ಬಾರಿಯೂ 54ನೇ ವರ್ಷದ ಕರಗ ಮಹೋತ್ಸವವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಯಿತು.

ದೇವಿಯ ಕರಗ ಮಹೋತ್ಸವ ಹಿನ್ನೆಲೆಯಲ್ಲಿ ಸೋಮವಾರ ರಾತ್ರಿಯಿಂದಲೇ ಸಂಪ್ರದಾಯದಂತೆ ಕಾವೇರಿಯ ಸೋಪಾನಕಟ್ಟೆಯಲ್ಲಿ ದೇವರ ಗುಡ್ಡಪ್ಪ ಕರಗ ಹೊತ್ತು ತಂದು ಶಕ್ತಿದೇವಿಗೆ ಮಡಿ ಪೂಜೆ, ಹೂವಿನ ವೈಭವದ ಅಲಂಕಾರ ಸೇರಿದಂತೆ ವಿಶೇಷ ಪೂಜೆಗಳನ್ನು ನೆರವೇರಿಸಲಾಯಿತು. ಬಳಿಕ ರಾತ್ರಿ ಪೂರ ಮಂಗಳವಾರದ ಮುಂಜಾನೆವರೆಗೂ ಶ್ರೀರಂಗಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಈಡುಗಾಯಿ ಸೇವೆ, ಪಂಜಿನ ಸೇವೆಯೊಂದಿಗೆ ದೇವಿಯ ಕರಗವನ್ನು ಹೊತ್ತ ಗುಡ್ಡಪ್ಪ ಉತ್ಸವವನ್ನು ಜಾನಪದ ಕಲಾತಂಡಗಳು ಮತ್ತು ತಮಟೆ ನಗಾರಿ ವಾದ್ಯಗಳ ಸದ್ದಿನೊಂದಿಗೆ ಹೆಜ್ಜೆ ಹಾಕಿ ಯಶಸ್ವಿಯಾಗಿ ನಡೆಸಿದರು.