ಗರ್ವನರ್ ಬಿಜೆಪಿ ಏಜೆಂಟೆಂದು ಘೋಷಿಸಲಿ: ಜಿಲ್ಲಾ ಉಸ್ತುವಾರಿ ಸಚಿವ ಎನ್.ಚಲುವರಾಯಸ್ವಾಮಿ ಟೀಕೆ

ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ರಾಜ್ಯ ಸರ್ಕಾರ ತಯಾರು ಮಾಡಿದ ಭಾಷಣವನ್ನು ರಾಜ್ಯಪಾಲರು ಓದುವುದು ಪರಿಪಾಠ. ಎಲ್ಲ ರಾಜ್ಯದ ರಾಜ್ಯಪಾಲರು ಅದನ್ನು ಓದಬೇಕು. ಹೀಗಿರುವಾಗ ಭಾಷಣ ಮಾಡದೇ ಹೋಗಿದ್ದು ಸರಿಯಲ್ಲ. ರಾಜ್ಯಪಾಲರು ಕೇಂದ್ರ ಸರ್ಕಾರದ ರೆಪ್ರೆಸೆಂಟೇಟಿವಾ?. ಹಾಗಿದ್ದರೆ ಅವರು ಬಿಜೆಪಿ ಪರ, ಕೇಂದ್ರ ಸರ್ಕಾರದ ಏಜೆಂಟ್ ಎಂದು ಘೋಷಣೆ ಮಾಡಲಿ. ಆಗ ಈ ಪ್ರಶ್ನೆಯೇ ಬರಲ್ಲ. ಕುಮಾರಸ್ವಾಮಿಯವರೇ ಹಿಂದೆ ಸಿಎಂ ಆಗಿದ್ದಾಗ ರಾಜ್ಯಪಾಲರನ್ನು ಕೇಂದ್ರ ಸರ್ಕಾರದ ಏಜೆಂಟ್ ಎಂದಿದ್ದರು. ತಮಿಳುನಾಡು, ಕೇರಳದಲ್ಲೂ ಇದೇ ಆಗಿದೆ. ಪರಿಣಾಮ ಇದರಿಂದ ರಾಜ್ಯದ ಪ್ರಜಾಪ್ರಭುತ್ವ ಹಾಳಾಗುತ್ತಿದೆ. ಕೇಂದ್ರ ಸರ್ಕಾರ ಈ ರೀತಿ ನಿರ್ದೇಶನ ಕೊಡಬಾರದು ಎಂದರು.

ಅದೇ ರೀತಿ ಅಧಿವೇಶನದಲ್ಲಿ ವಿಧಾನಸಭೆ ಪ್ರತಿಪಕ್ಷ ನಾಯಕ ನಡೆದುಕೊಂಡ ರೀತಿ ಶೋಬೆಯಲ್ಲ. ಕೇಂದ್ರ ಸರ್ಕಾರದ ಸೂಚನೆಯಂತೆ ಅಶೋಕ್ ಅಗ್ರೆಸಿವ್ ಆಗಿದ್ದರು. ಬಾಯಿಗೆ ಬಂದದ್ದನ್ನ ಮಾತನಾಡಿ ಕೆಟ್ಟದಾಗಿ ನಡೆದುಕೊಂಡರು. ನಮಗೆ ಪಾಠ ಕಲಿಸಬೇಕೆಂದು ಅಶೋಕ್ ಹೇಳಿದ್ದರು. ಯಾರು ಯಾರಿಗೆ ಪಾಠ ಕಲಿಸುವ ಅವಶ್ಯಕತೆ ಇಲ್ಲ ಎಂದು ತಿರುಗೇಟು ನೀಡಿದರು.

ಹೈಕಮಾಂಡ್ ನಾಯಕರು ನನ್ನ ಕೈ ಬಿಡಲ್ಲ ಎಂಬ ಡಿಸಿಎಂ ಡಿಕೆಶಿ ಹೇಳಿಕೆಗೆ ಪ್ರತಿಕ್ರಿಯಿಸಿ, ರಾಷ್ಟ್ರನಾಯಕರು ನಮ್ಮ ಹಂತದಲ್ಲಿ ತೀರ್ಮಾನ ಮಾಡುತ್ತೇವೆ ಎಂದಿದ್ದಾರೆ. ಸಿದ್ದರಾಮಯ್ಯ, ಡಿಕೆಶಿ ಅವರು ಕೂಡ ಅದನ್ನೇ ಹೇಳಿದ್ದಾರೆ. ಇದರ ನಡುವೆ ನಮ್ಮಂತವರು ಮಾತನಾಡುವ ಅವಶ್ಯಕತೆ ಇಲ್ಲ. ಶಾಸಕರ ಬಲಬಲ ಇದ್ಯಾ ಇಲ್ಲವೋ ಎಂಬ ಪ್ರಶ್ನೆ ಬರಲ್ಲ. ಶಾಸಕರ ಅಭಿಪ್ರಾಯ ಬೇಕಾ. ಇಲ್ಲ ಹೈಕಮಾಂಡ್ ಮಟ್ಟದಲ್ಲಿ ಮಾಡಬೇಕಾ ಎಂದು ನಾಯಕರೇ ತೀರ್ಮಾನ ಮಾಡುತ್ತಾರೆ. ಸಿದ್ದರಾಮಯ್ಯ ಅವರು ಎಲ್ಲೂ ಪಕ್ಷಕ್ಕೆ ಸರ್ಕಾರಕ್ಕೆ ಮುಜುಗರ ತಂದಿಲ್ಲ. ಡಿಕೆಶಿ ಕೂಡ ಸಿದ್ದರಾಮಯ್ಯರನ್ನ ಎಲ್ಲಿಯೂ ಬಿಟ್ಟುಕೊಟ್ಟಿಲ್ಲ. ಇದರ ಬಗ್ಗೆ ಚರ್ಚೆ ಅವಶ್ಯಕತೆ ಇಲ್ಲ. ಎಲ್ಲವೂ ಒಳ್ಳೆಯ ರೀತಿ ಆಗಲಿದೆ ಎಂದರು.