ವಿದ್ಯುತ್ ವಿತರಣೆ ಖಾಸಗಿಕರಣ ಕ್ರಮಕ್ಕೆ ಖಂಡನೆ

ನಗರದ ತಾಲೂಕು ಕಚೇರಿ ಬಳಿ ಜಮಾವಣೆಗೊಂಡ ರೈತ ಸಂಘಟನೆಯ ಕಾರ್ಯಕರ್ತರು ಕೇಂದ್ರ ಮತ್ತು ರಾಜ್ಯ ಸರ್ಕಾರದ ವಿರುದ್ಧ ಘೋಷಣೆ ಕೂಗಿ ತಮ್ಮ ಆಕ್ರೋಶ ವ್ಯಕ್ತಪಡಿಸಿದರಲ್ಲದೆ,ಕೂಡಲೇ ಖಾಸಗಿಕರಣವನ್ನು ಕೈ ಬಿಟ್ಟು ಸರ್ಕಾರಿ ಸೌಮ್ಯದಲ್ಲೇ ಮುಂದುವರಿಸಬೇಕೆಂದು ಆಗ್ರಹಿಸಿದರು.

ರೈತ ಸಂಘದ ಮುಖಂಡ ಬೋರಾಪುರ ಶಂಕರೇಗೌಡ ಮಾತನಾಡಿ, ಖಾಸಗಿ ಕಂಪನಿಯವರು ರಾಜ್ಯದಲ್ಲಿ ಸಮಾನಾಂತರ ವಿದ್ಯುತ್ ವಿತರಣಾ ಪರವಾನಗಿ ಅರ್ಜಿ ಸಲ್ಲಿಸಿರುವುದು ಖಂಡನೀಯ. ವಿದ್ಯುತ್ ಕ್ಷೇತ್ರ ಸೇವಾ ವಲಯವಾಗಿದೆ. ಸರ್ಕಾರಿ ಸೌಮ್ಯ ಸೆಸ್ಕ್ ಇಲಾಖೆ ಗ್ರಾಹಕರಿಗೆ ಉತ್ತಮ ಸೇವೆ ನೀಡುತ್ತಾ ಬಂದಿದ್ದು ಆದರೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರ ವಿದ್ಯುತ್ ಕ್ಷೇತ್ರವನ್ನು ಖಾಸಗಿಕರಣ ಮಾಡಲು ಮುಂದಾಗಿರುವುದು ದುರದೃಷ್ಟಕರವೆಂದರು.

ಖಾಸಗಿ ಕಂಪನಿಗೆ ವಿದ್ಯುತ್ ವಿತರಣ ಪರವಾನಿಗೆ ನೀಡಿದರೆ ಗ್ರಾಹಕರು ರೈತರಿಗೆ ತುಂಬಾ ತೊಂದರೆ ಉಂಟಾಗಲಿದೆ. ಜತೆಗೆ ನೌಕರರ ಸೇವಾ ಭದ್ರತೆಗೂ ಧಕ್ಕೆ ಉಂಟಾಗಲಿದ್ದು, ಕೂಡಲೇ ಇಂತಹ ನಿರ್ಣಯವನ್ನು ಕೈಬಿಡಬೇಕೆಂದು ಆಗ್ರಹಿಸಿದರು.

ಗ್ರಾಹಕರ ಹಾಗೂ ರೈತರ ವಿರೋಧದ ನಡುವೆಯೂ ಖಾಸಗಿಕರಣಕ್ಕೆ ಮುಂದಾದರೆ ಮುಂದಾಗುವ ಅನಾಹುತಕ್ಕೆ ಸರ್ಕಾರವೇ ನೇರವಾಗಿದೆ ಎಂದು ಎಚ್ಚರಿಕೆ ನೀಡಿದರು

ಸಂಘಟನೆಯ ಮುಖಂಡರಾದ ಬೋರಾಪುರ ಶಂಕರೇಗೌಡ, ಲಿಂಗಪ್ಪಾಜಿ, ಜಿ.ಎ.ಶಂಕರ್, ರವಿಕುಮಾರ್, ವಿನೋದ್ ಬಾಬು, ಸಿದ್ದೇಗೌಡ, ರಾಜು, ಬೋರೇಗೌಡ, ದಯಾನಂದ, ಸತೀಶ್, ಮಹದೇವು, ಚಿಕ್ಕಮೊಗ, ಪ್ರಸನ್ನ, ಕೃಷ್ಣ, ವೆಂಕಟೇಗೌಡ ಇದ್ದರು.