ವಚನಕಾರ್ತಿಯರಿಂದ ಆಧ್ಯಾತ್ಮಿಕತೆ ಅನಾವರಣ: ಸಾಹಿತಿ ಡಾ.ಗೀತಾಮಣಿ ಅಭಿಮತ

ಜಿಲ್ಲಾ ಶರಣ ಸಾಹಿತ್ಯ ಪರಿಷತ್ತು ವತಿಯಿಂದ ನಗರದ ವೀರಶೈವ ವಿದ್ಯಾರ್ಥಿನಿಲಯದಲ್ಲಿ ಆಯೋಜಿಸಿದ್ದ ಹಮ್ಮಿಕೊಂಡಿದ್ದ ಪುಟ್ಟರಾಚಪ್ಪ ಮತ್ತು ಮಾದಮ್ಮ ದತ್ತಿ ಉಪನ್ಯಾಸದಲ್ಲಿ ವಚನ ಸಾಹಿತ್ಯದಲ್ಲಿ ಸ್ತ್ರೀಯರು ಕುರಿತು ಮಾತನಾಡಿದ ಅವರು, ಸಮಗ್ರ ವಚನಕಾರರು ಮಹಿಳೆಯರ ಬಗ್ಗೆ ಬರೆದ ವಚನಗಳು ಒಂದಾದರೆ, ವಚನಕಾರ್ತಿಯರು ಸ್ತ್ರೀ ಪರವಾಗಿ ಬರೆದ ವಚನಗಳು ಮತ್ತೊಂದು. ವಚನಯುಗವನ್ನು ಮಾನವ ಹಕ್ಕುಗಳ ಪ್ರತಿಪಾದನಾಯುಗ ಎಂದು ಕರೆಯುತ್ತಾರೆ. ಅದಕ್ಕೆ ಪ್ರಧಾನ ಆಕಾರವೇ ’ ಸ್ತ್ರೀ’ ಸಂವೇದನೆ. ಸ್ತ್ರೀಯರ ಅಸ್ಮಿತತೆ ಅವಳ ಆತ್ಮಾಭಿಮಾನದ ಗೌರವ ಪಥವಾಗಿತ್ತು ಎಂದರು.

ಸರ್ಕಾರಿ ಮಹಿಳಾ ಕಾಲೇಜಿನ ಸಹ ಪ್ರಾಧ್ಯಾಪಕಿ ಡಾ.ಎನ್.ಎಸ್.ದೇವಿಕಾ ಮಾತನಾಡಿ, ಬಸವಣ್ಣನವರ ನೇತೃತ್ವದಲ್ಲಿ ನಡೆದ ಸಾಮಾಜಿಕ ಕ್ರಾಂತಿಯ ಫಲಶ್ರುತಿಯೇ ಶರಣ ಸಾಹಿತ್ಯ. ಶರಣರು ವಚನಗಳ ಮೂಲಕ ಸಮಾನತೆ, ಕಾಯಕಪ್ರಜ್ಞೆ, ಮಾನವತಾವಾದವನ್ನು ಎತ್ತಿಹಿಡಿದರು. ಅನುಭಾವ ನೆಲೆಯಲ್ಲಿ ಆತ್ಮಸಾಕ್ಷಾತ್ಕಾರ ಮಾಡಿಸಿದವರು ದೇವರನ್ನು ಅಂತರಂಗದಲ್ಲಿ ಕಾಣುವ ಮಾರ್ಗವನ್ನು ತೋರಿದವರು. ನಡೆ ನುಡಿಗಳಲ್ಲಿ ಅಂತರವಿರದ ಶರಣರ ಜೀವನಾದರ್ಶ ತತ್ತ್ವಗಳೇ ಶರಣ ಸಂಸ್ಕೃತಿಯಾಗಿ ಮೈದಾಳಿವೆ. ಶರಣರ ನಡೆ ನುಡಿಯೇ ವಚನಗಳಾಗಿ ಹೊರಹೊಮ್ಮಿ ವಚನ ಸಾಹಿತ್ಯಕ್ಕೆ ವಿಶ್ವ ಸಾಹಿತ್ಯದ ಮೌಲ್ಯ ದೊರೆತಿದೆ ಎಂದರು.

ಸಾಹಿತಿ ಡಾ.ಪ್ರದೀಪಕುಮಾರ್ ಹೆಬ್ರಿ ಮಾತನಾಡಿದರು. ಬಸವೇಶ್ವರ ಪತ್ತಿನ ಸಹಕಾರ ಸಂಘದ ತಾಲೂಕು ಅಧ್ಯಕ್ಷ ಕೆ.ಎಸ್.ಷಡಕ್ಷರಿ ಕಾರ್ಯಕ್ರಮ ಉದ್ಘಾಟಿಸಿದರು. ಶರಣ ಸಾಹಿತ್ಯ ಪರಿಷತ್ ಅಧ್ಯಕ್ಷ ಎಂ.ಎಸ್.ಶಿವಪ್ರಕಾಶ್ ಅಧ್ಯಕ್ಷತೆ ವಹಿಸಿದ್ದರು. ಕದಳಿ ಮಹಿಳಾ ವೇದಿಕೆ ಅಧ್ಯಕ್ಷೆ ಪದ್ಮಾ ಸೋಮಶೇಖರ್, ಜಿಲ್ಲಾ ಬಸವ ಸಮಿತಿ ಅಧ್ಯಕ್ಷ ಎಂ.ಬಿ.ರಾಜಶೇಖರ್ ಇದ್ದರು.