ವಯೋವೃದ್ಧರ ಆರೈಕೆ ಮಾಡುವ ‘ಕೇರ್‌ಬ್ರಿಡ್ಜ್’: ಪಿಇಎಸ್ ಕಾಲೇಜಿನ ವಿದ್ಯಾರ್ಥಿನಿ ಅನನ್ಯಾ ಸಂಶೋಧನೆ Carebridge Robo

ಮಂಡ್ಯ: ವಯೋವೃದ್ಧರ ಆರೈಕೆಗೆ ಸಂಬಂಧಿಸಿದಂತೆ ನಗರದ ಪಿಇಎಸ್ ಇಂಜಿನಿಯರಿಂಗ್ ಕಾಲೇಜಿನ ದ್ವಿತೀಯ ವರ್ಷದ ಸಿವಿಲ್ ಇಂಜಿನಿಯರಿಂಗ ವಿಭಾಗದ ವಿದ್ಯಾರ್ಥಿನಿ ಆರ್.ಅನನ್ಯಾ ರೂಪಿಸಿರುವ ‘ಕೇರ್‌ಬ್ರಿಡ್ಜ್’ ರೋಬೋ ಮಾದರಿ ಪ್ರಥಮ ಸ್ಥಾನ ಪಡೆದುಕೊಂಡಿದೆ. ಮಾತ್ರವಲ್ಲದೆ ಮುಂದಿನ ವರ್ಷ ಮೇ ತಿಂಗಳಲ್ಲಿ ಸ್ಕಾಟ್‌ಲ್ಯಾಂಡ್‌ನಲ್ಲಿ ನಡೆಯಲಿರುವ ಪ್ರದರ್ಶನಕ್ಕೆ ಆಯ್ಕೆಯಾಗಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ನವೀನ ಆಲೋಚನೆಗಳಿಗೆ ಮಹತ್ವ ನೀಡುವ ಉದ್ದೇಶದಿಂದ ಪ್ರತಿಷ್ಠಿತ ಐಇಇಇ ಸಿಒಎಂಎಸ್‌ಒಸಿ ಸಂಸ್ಥೆ ಇತ್ತೀಚೆಗೆ ಬೆಂಗಳೂರಿನಲ್ಲಿ ಅಂತಾರಾಷ್ಟ್ರೀಯ ಲೈಟ್ನಿಂಗ್ ಟಾಕ್ಸ್ ಸಮ್ಮೇಳನದಲ್ಲಿ ವೇದಿಕೆ ಕಲ್ಪಿಸಲಾಗಿತ್ತು. ದೇಶದ ಹಲವಾರು ಪ್ರತಿಷ್ಠಿತ ಸಂಸ್ಥೆಗಳಾದ ಐಐಟಿ, ಎನ್‌ಐಟಿ ಮತ್ತು ರಾಷ್ಟ್ರೀಯ ಮಹತ್ವದ ಸಂಸ್ಥೆಗಳ ಸುಮಾರು 80 ಜನ ವಿದ್ಯಾರ್ಥಿಗಳು, ಸಂಶೋಧಕರು ಹಾಗೂ ಅಧ್ಯಾಪಕರು ಭಾಗವಹಿಸಿದ್ದರು.

ಅದರಂತೆ ಪಿಇಎಸ್ ಕಾಲೇಜಿನಿಂದ ಪಾಲ್ಗೊಂಡಿದ್ದ ಆರ್.ಅನನ್ಯಾ ಮಂಡಿಸಿದ ಕೇರ್‌ಬ್ರಿಡ್ಜ್ ಯೋಜನೆ ಗಮನಸೆಳೆದಿದೆ. ವಿದೇಶದಲ್ಲಿ ವಾಸಿಸುವ ಮಕ್ಕಳಿಗೆ ಭಾರತದಲ್ಲಿರುವ ತಮ್ಮ ವಯೋವೃದ್ಧ ಪಾಲಕರ ಆರೈಕೆಯನ್ನು ನೈಜ-ಸಕಾಲಿಕವಾಗಿ ಹಾಗೂ ವಿಶ್ವಾಸಾರ್ಹವಾಗಿ ನಿರ್ವಹಿಸಲು ರೂಪುಗೊಂಡಿರುವ ಸಮಗ್ರ ಡಿಜಿಟಲ್ ವೇದಿಕೆ ಬಗ್ಗೆ ವಿವರಿಸಿದರು. ಈ ಯೋಜನೆಯಲ್ಲಿ ತರಬೇತಿ ಪಡೆದ ರೋಬೋ ಆರೈಕೆದಾರರ ಸೇವೆ, ಐಒಟಿ ಆಧಾರಿತ ಆರೋಗ್ಯ ಮೇಲ್ವಿಚಾರಣೆ, ದೈನಂದಿನ ಅಗತ್ಯಗಳಲ್ಲಿನ ಸಹಾಯ, ತುರ್ತು ಪರಿಸ್ಥಿತಿಗಳಲ್ಲಿ ತ್ವರಿತ ಪ್ರತಿಕ್ರಿಯೆ ಹಾಗೂ ಸಂಗಾತ್ಯ ಸೇವೆಗಳು ಒದಗಿಸಲ್ಪಡುತ್ತವೆ. ಮೊಬೈಲ್ ಮತ್ತು ವೆಬ್ ಆ್ಯಪ್ ಮೂಲಕ ಮಕ್ಕಳಿಗೆ ರಿಯಲ್ ಟೈಂ ಅಪ್‌ಡೇಟ್, ವಿಡಿಯೋ ಸಂಪರ್ಕ, ತುರ್ತು ಎಚ್ಚರಿಕೆ ನೀಡುತ್ತದೆ. ಇದು ಹಿರಿಯ ನಾಗರಿಕರ ಭದ್ರತೆ ಮತ್ತು ಭಾವನಾತ್ಮಕ ಸುಸ್ಥಿತಿಗೆ ನಿರ್ಣಾಯಕವಾಗುತ್ತದೆ.

ಅನನ್ಯಾ ಅವರ ಸಾಮಾಜಿಕ, ಪರಿಣಾಮಕಾರಿ ಹಾಗೂ ತಾಂತ್ರಿಕವಾಗಿ ಗಾಢವಾದ ಯೋಜನೆಗೆ ಅಪಾರ ಮೆಚ್ಚುಗೆ ವ್ಯಕ್ತವಾಗಿದೆ. ವಿದ್ಯಾರ್ಥಿನಿಯ ಆಲೋಚನೆ ತಾನೇ ವಿಶಿಷ್ಟ ಸ್ಥಾನವನ್ನು ನಿರ್ಮಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ವೇದಿಕೆಯಲ್ಲಿ ಐವರು ಮಾತ್ರ ಬಹುಮಾನ ಗೆಲ್ಲುವಲ್ಲಿ ಸಾಧ್ಯವಾಗಿದೆ. ಅದರಂತೆ ಅನನ್ಯಾ ಅವರಿಗೆ 1000 ಅಮೆರಿಕನ್ ಡಾಲರ್ ಮತ್ತು 2026ರ ಮೇ ತಿಂಗಳಲ್ಲಿ ಸ್ಕಾಟ್‌ಲ್ಯಾಂಡ್‌ನಲ್ಲಿ ನಡೆಯಲಿರುವ ಮುಂದಿನ ಹಂತದ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಸಂಪೂರ್ಣ ಪ್ರಯಾಣ ಧನ ಮಂಜೂರಾಗಿದೆ. ಈ ಸಮ್ಮೇಳನದ ವಿಶಿಷ್ಟತೆ ಎಂದರೆ ತೀರ್ಪುಗಾರರ ಸಮಿತಿಯಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ಪ್ರಮುಖ ಬಹುರಾಷ್ಟ್ರೀಯ ಕಂಪನಿಗಳ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಗಳು ಭಾಗವಹಿಸಿದ್ದರು. ಸ್ಪರ್ಧೆಯ ಮಟ್ಟ ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ತಕ್ಕಂತೆ ಉನ್ನತ ಮಟ್ಟದಲ್ಲಿತ್ತು.

ವಿದ್ಯಾರ್ಥಿನಿ ಆರ್.ಅನನ್ಯಾ ಮೂಲತಃ ಮೈಸೂರಿನ ನಿವಾಸಿ. ತಂದೆ ರಾಮಕೃಷ್ಣ ಅವರು ಶ್ರೀ ವಾಣಿ ವಿಲಾಸ ಅರಸ್ ಪ್ರೌಢಶಾಲೆಯಲ್ಲಿ ಶಿಕ್ಷಕರಾಗಿ ಕೆಲಸ ಮಾಡುತ್ತಿದ್ದಾರೆ. ತಾಯಿ ಟಿ.ಎಸ್.ಪ್ರೇಮಾ. ಸ್ಕಾಟ್‌ಲ್ಯಾಂಡ್ ಪ್ರವಾಸಕ್ಕೆ ಆಯ್ಕೆಯಾಗಿರುವ ಅನನ್ಯಾ ಅವರು ರೋಬೋ ತಯಾರಿಕೆಯಲ್ಲಿ ನಿರತರಾಗಿದ್ದಾರೆ.

"