ಶತಮಾನ ಇತಿಹಾಸದ ಗ್ರಾಮ ಬೆಳಕವಾಡಿ

ಮುನ್ನೂರು ವರ್ಷಗಳ ಹಿಂದೆ ಕೊಳ್ಳೇಗಾಲ ಮೂಲಕ ದೇವಾಂಗ ಸಮಾಜದವರು ಈ ಪ್ರದೇಶದಲ್ಲಿ ಹರಿಯುವ ಕಾವೇರಿ ನದಿ ತೀರದಲ್ಲಿ ಕಾಶಿ ವಿಶ್ವನಾಥ ದೇವಾಲಯ ನಿರ್ಮಿಸಿ ದೀಪಸ್ತಂಭದಲ್ಲಿ ಜ್ಯೋತಿ ಬೆಳಗಿಸಿಕೊಂಡು ಕುಂಭಮೇಳ ನೆರವೇರಿಸಿದ್ದರು. ಇಲ್ಲಿನ ದೇವಸ್ಥಾನದಲ್ಲಿ ದೇವರ ಪೂಜೆಗೆಂದು ಒಂದು ಕುಟುಂಬ ನೆಲೆಗೊಂಡಿತು. ನಂತರದ ಕಾಲಘಟ್ಟದಲ್ಲಿ ದೇವಾಂಗ ಸಮುದಾಯವೂ ಸೇರಿದಂತೆ ಹಲವು ಕೋಮಿನ ಜನರು ಅನತಿದೂರದಲ್ಲಿ ನೆಲೆಗೊಂಡರು. ಈ ಪ್ರದೇಶದಕ್ಕೆ ಪ್ರಕಾಶಪುರ, ಬೆಂಕಿಪುರ ಎಂದು ಕರೆಯಲಾಗುತ್ತಿತ್ತು. ಕಾಲಾನಂತರ ಊರಿಗೆ ಬೆಳಕವಾಡಿ ಎಂದು ನಾಮಾಂಕಿತಗೊಂಡಿತು. ಬೆಳಕು ಎಂದರೆ ಪ್ರಕಾಶ ಹಾಗೂ ವಾಡಿ ಎಂದರೆ ಪ್ರದೇಶ. ಪ್ರಕಾಶದ ಪ್ರದೇಶ ಅಥವಾ ಜ್ಯೋತಿಯ ಊರು ಎಂಬರ್ಥದಲ್ಲಿ ಬೆಳಕವಾಡಿ ಎಂದು ಗ್ರಾಮದ ಹೆಸರಾಯಿತು ಎಂದು ಗ್ರಾಮದ ಹಿರಿಯರು, ಇತಿಹಾಸ ವಿಶ್ಲೇಷಿಸುತ್ತಾರೆ. ಆದರೆ ಐತಿಹಾಸಿಕ ದಾಖಲೆಗಳಿಲ್ಲ.

ಬಹುಪಾಲು ರೈತರು ಹಾಗೂ ಶ್ರಮಿಕ ವರ್ಗದ 21 ಸಮುದಾಯದವರು ಗ್ರಾಮದಲ್ಲಿ ನೆಲೆಸಿದ್ದಾರೆ. ಗ್ರಾಮದಲ್ಲಿ ಪೊಲೀಸ್ ಠಾಣೆ, ಸಾರಿಗೆ ಬಸ್ ನಿಲ್ದಾಣ, ಸಮುದಾಯ ಆರೋಗ್ಯ ಕೇಂದ್ರ, ಕೃಷಿ ಉತ್ಪನ್ನ ಉಪಮಾರುಕಟ್ಟೆ, ಪಶುಪಾಲನಾ ಆಸ್ಪತ್ರೆ, ಕಂದಾಯ ಇಲಾಖೆ ಹಲವು ಕಚೇರಿಗಳು, ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘ ಸೇರಿದಂತೆ ವಿವಿಧ ಸಹಕಾರ ಸಂಘ-ಸಂಸ್ಥೆಗಳು, ರಾಷ್ಟ್ರೀಕೃತ ಬ್ಯಾಂಕ್‌ನ ಶಾಖೆಗಳು ಈ ಗ್ರಾಮದಲ್ಲಿವೆ.

ಗ್ರಾಮವು ಸ್ವಾತಂತ್ರ್ಯ ಪೂರ್ವ ಇತಿಹಾಸ ಹೊಂದಿದ್ದು, ಗ್ರಾಮದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯು 1908ರಲ್ಲಿ ಸ್ಥಾಪನೆಯಾಗಿ ಪ್ರಸ್ತುತ 116 ವರ್ಷ ಪೂರೈಸಿದೆ. ಬ್ರಿಟಿಷ್ ಆಡಳಿತಾವಧಿಯಲ್ಲೂ ಗ್ರಾಮದ ಜನರಿಗೆ ಶಿಕ್ಷಣ ನೀಡಿರುವ ಹೆಗ್ಗಳಿಕೆ ಶಾಲೆಗಿದೆ. 1951ರ ವೇಳೆಗೆ ಶಾಲೆಯಲ್ಲಿ 200ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಶಿಕ್ಷಣ ಪಡೆಯುತ್ತಿದ್ದರು. ಬ್ರಿಟಿಷ್ ಆಡಳಿತ ವಿದ್ಯಾಭ್ಯಾಸಕ್ಕೆ ಪ್ರಮುಖ ಕೊಡುಗೆ ನೀಡಿದೆ ಎಂಬುದು ಗಮನಾರ್ಹ. 1910 ರಲ್ಲಿ ಸ್ಥಾಪನೆಯಾದ ಶತಮಾನ ಪೂರೈಸಿದ ಜಗನ್ಮೋಹನ ವ್ಯವಸಾಯ ಸೇವಾ ಸಹಕಾರ ಸಂಘ ಇಂದಿಗೂ ಕಾರ್ಯ ನಿರ್ವಹಿಸುತ್ತಿದೆ. ಕನ್ನಡ ಚಿತ್ರರಂಗದ ಡಾ.ರಾಜ್ ಕುಮಾರ್ ಸೇರಿದಂತೆ ಹಲವು ಮೇರುನಟರ ಜತೆಗೆ ಪೋಷಕ ನಟರಾಗಿ ನೂರಾರು ಚಿತ್ರಗಳಲ್ಲಿ ನಟಿಸಿದ್ದ ಶನಿಮಹದೇವಪ್ಪ ಹಾಗೂ ಹತ್ತಾರು ಚಿತ್ರಗಳಿಗೆ ಸಾಹಸ ನಿರ್ದೇಶನ ಮಾಡಿದ್ದ ಸಿದ್ದರಾಜು ಬೆಳಕವಾಡಿ ಗ್ರಾಮದವರು.