ಉತ್ತಮ ಕೆಲಸಕ್ಕೆ ಮಂಡ್ಯದಲ್ಲಿ ಪ್ರೋತ್ಸಾಹ: ನಿವೃತ್ತ ಮುಖ್ಯ ಕಾರ್ಯದರ್ಶಿ ಟಿ.ಎಂ.ವಿಜಯ ಭಾಸ್ಕರ್ ಮೆಚ್ಚುಗೆ

ತಿಮ್ಮೇಗೌಡರಿಂದ ಮಾದರಿ ಜನಸೇವೆ
ಕಾರ್ಯಕ್ರಮ ಉದ್ಘಾಟಿಸಿದ ಬೆಂಗಳೂರು ಕಣ್ವ ಡಯಾಗ್ನೋಸ್ಟಿಕ್ ಸೆಂಟರ್ ಮಾಲೀಕ ಡಾ.ಎಚ್.ಎಂ.ವೆಂಕಟಪ್ಪ ಮಾತನಾಡಿ, ಗ್ರಾಮೀಣ ಪ್ರದೇಶದಿಂದ ಬಂದ ಅಧಿಕಾರಿ ಹಾಗೂ ನಗರ ಪ್ರದೇಶದಿಂದ ಬಂದ ಅಧಿಕಾರಿಗೂ ಬಹಳ ವ್ಯತ್ಯಾಸವಿದೆ. ಗ್ರಾಮೀಣರಿಗೆ ಕಷ್ಟ, ಸುಖಗಳ ಬಗ್ಗೆ ಅರಿವಿರುತ್ತದೆ. ನಗರ ಪ್ರದೇಶದವರಿಗೆ ಪುಸ್ತಕದ ಅನುಭವವಿದ್ದರೆ, ಕಷ್ಟದ ಅರಿವು ಇರುವುದಿಲ್ಲ. ತಿಮ್ಮೇಗೌಡರು ಗ್ರಾಮಾಂತರ ಪ್ರದೇಶದಿಂದ ಬಂದು ಅವಕಾಶ ಸಿಕ್ಕಿದ ನಂತರ ಅವರು ಮಾಡಿದ ಸೇವೆ ಹತ್ತಾರು ರಾಜಕಾರಣಿಗಳು ಮಾಡುವ ಕೆಲಸಕ್ಕೆ ಸಮಾನವಾಗಿದೆ. ಸಿಕ್ಕ ಅವಕಾಶದಲ್ಲಿ ಪ್ರಾಮಾಣಿಕತೆ ಮತ್ತು ದಕ್ಷತೆಯಿಂದ ಕರ್ತವ್ಯ ನಿರ್ವಹಿಸಿ ಅಲ್ಲಿಯ ಜನರ ಮನಸ್ಸಲ್ಲಿ ಒಳ್ಳೆ ಛಾಪನ್ನು ಮೂಡಿಸಿ ನೆನಪನ್ನು ಬಿಟ್ಟು ಬಂದಿದ್ದಾರೆ. ಇದೇ ವ್ಯಕ್ತಿಯ ಸಾಧನೆ ಮತ್ತು ಸಂಪತ್ತು ಎಂದು ಬಣ್ಣಿಸಿದರು.
ಅಧಿಕಾರಿಗಳಲ್ಲಿ 3 ವರ್ಗದವರು ಇರುತ್ತಾರೆ. ಉತ್ತಮ ಅಧಿಕಾರಿಗಳು, ಪ್ರಾಮಾಣಿಕರು ಮತ್ತು ಬುದ್ಧಿವಂತರಾಗಿರುತ್ತಾರೆ. ಆದರೆ ಕೆಲಸ ನಿಧಾನವಾಗುತ್ತದೆ. ಎರಡನೇ ವರ್ಗದವರಲ್ಲಿ ದಕ್ಷತೆ ಇರುತ್ತದೆ. ಹೊಂದಾಣಿಕೆಯಿಂದ ಕೆಲಸ ಮಾಡಬೇಕಾಗುತ್ತದೆ. ಇನ್ನೊಂದು ವರ್ಗ ದಕ್ಷತೆ ಪ್ರಾಮಾಣಿಕತೆ ಮೈಗೂಡಿಸಿಕೊಂಡು ತಾವು ಮಾಡುವ ಪ್ರತಿಯೊಂದು ಕೆಲಸವನ್ನೂ ತಾರ್ಕಿಕ ಹಂತಕ್ಕೆ ತರುತ್ತಾರೆ. ತಿಮ್ಮೇಗೌಡರು ಈ ವರ್ಗಕ್ಕೆ ಸೇರಿದವರು. ಇಂತಹವರು ಕಡಿಮೆ ಎಂದರು.